فوتو: ۇكىمەت
بۇدان بولەك, رومان سكليار قىتايمەن شەكاراداعى «نۇر جولى» وتكىزۋ پۋنكتىنە جاساعان جۇمىس ساپارىنىڭ قورىتىندىسىن باياندادى. وندا وتكىزۋ مۇمكىندىگىن ارتتىرۋ, لوگيستيكالىق ينفراقۇرىلىمدى جاقسارتۋ, كەدەندىك راسىمدەردى تسيفرلىق تەحنولوگيالار ارقىلى جەدەلدەتۋ باعىتىنداعى جۇمىستاردى جۇزەگە اسىرۋ بارىسى قارالدى. اتاپ ايتقاندا, وسى جىلدىڭ سوڭىنا دەيىن «نۇر جولى» وتكىزۋ پۋنكتىندە ءىرى جۇكتەرگە ارنالعان اينالما جول قۇرىلىسى اياقتالادى. بۇل جۇك اعىنىن ارتتىرىپ, قىزمەت ساپاسىن جاقسارتادى جانە قازاقستان مەن قىتاي اراسىنداعى ساۋدا-ەكونوميكالىق بايلانىستارعا جاڭا سەرپىن بەرمەك. بۇگىندە قىتايلىق تاراپپەن وتكىزۋ پۋنكتتەرىنىڭ تاۋلىك بويى جۇمىس ىستەۋ مۇمكىندىگى جانە اۆتوكولىك قۇرالدارىن قابىلداۋ كولەمىن ۇلعايتۋ ماسەلەلەرى پىسىقتالىپ جاتىر.
تەمىرجول سالاسىندا 2025 جىلعى جەلتوقسانعا دەيىن «دوستىق – مويىنتى» ۋچاسكەسىندە ەكىنشى جولدار جانە الماتى ستانساسىنىڭ اينالما تەمىرجول جەلىسى قۇرىلىسىن اياقتاۋ جوسپارلانعان.
تەڭىز كولىگى سالاسىندا كونتەينەرلەردى وڭدەۋ قۋاتىن جىلىنا 240 مىڭ جفە (جيىرما فۋتتىق كونتەينەر) دەڭگەيىنە دەيىن جەتكىزۋ كوزدەلگەن. بۇل ماقساتتا وسى جىلدىڭ جەلتوقسانىندا جاڭا تەرمينال ىسكە قوسىلادى. جوبا ترانسكاسپي حالىقارالىق كولىك باعدارىنىڭ ترانزيتتىك الەۋەتىن ارتتىرۋعا مۇمكىندىك بەرەدى.
اۆتوموبيل كولىگى سالاسى بويىنشا قازاقستاننىڭ قىتاي, وزبەكستان جانە تۇرىكمەنستانمەن شەكاراداعى 5 اۆتوموبيلدىك كەدەندىك بەكەتتى: تەمىر بابا, قازىعۇرت, تاجەن, مايقاپشاعاي جانە باقتى جاڭعىرتۋ جۇمىستارى جىل سوڭىنا دەيىن اياقتالادى. سونىمەن قاتار كولىك قۇرالدارى مەن جۇكتەردىڭ ەلىمىزدىڭ اۋماعىنا كىرگەن ساتىنەن باستاپ, باعىت بويىنداعى قوزعالىسى مەن شىعۋىنا دەيىنگى ارالىقتى باقىلاۋعا مۇمكىندىك بەرەتىن ينتەللەكتۋالدى بەيناباقىلاۋ جۇيەلەرى كەزەڭ-كەزەڭىمەن ەنگىزىلىپ جاتىر.
اۋە كولىگى سالاسىندا 2025 جىلعى جەلتوقسانعا دەيىن ەلىمىزدەگى بارلىق اۋەجايدا «e-Freight» اقپاراتتىق جۇيەسى ەنگىزىلىپ, ول «كەدەن» جانە «Agriculture» جۇيەلەرىمەن تولىق ينتەگراتسيالانادى. بۇل قاعازسىز قۇجات اينالىمىنا تولىق كوشۋدى قامتاماسىز ەتەدى.
كەڭەس قورىتىندىسى بويىنشا پرەمەر-مينيستر قازاقستاننىڭ ترانزيتتىك-كولىكتىك الەۋەتىن كۇشەيتۋگە باعىتتالعان بارلىق جوبالاردىڭ ۋاقتىلى ىسكە اسىرىلۋىن باقىلاۋدا ۇستاۋدى تاپسىردى.
