قىزىلوردا وبلىسىندا قىلمىستىق توپ ۇستالدى

استانا. 13 اقپان. قىزىلوردالىق پوليتسەيلەر مال ۇرلاۋمەن اينالىسقان قىلمىستىق توپتى قولعا ءتۇسىردى. بۇل تۋرالى «قازاقپارات» حابارلادى. جۋىردا 1992 جىلى تۋعان شيەلى اۋدانىنىڭ تۇرعىنى, 1989 جىلعى قىزىلوردا قالاسىنىڭ تۇرعىنى وڭاي جولمەن اقشا تابۋ ماقساتىندا الدىن الا كەلىسىمگە كەلىپ, Nissan Primera ماركالى اۆتوكولىگىمەن قاراۋىلتوبە اۋىلىنا بارادى. وسى اۋىلدىڭ تۇرعىنى ج.ق. ەسىمدى ازاماتتىڭ مال قوراسىنان 1 باس قويىن كولىكتىڭ جۇكسالعىشىنا سالىپ, وقيعا بولعان جەردەن بوي تاسالاعان. ولار بۇل قىلمىستارىمەن توقتاماي, قاڭتار ايىنىڭ 28-نە قاراعان ءتۇنى جوعارىدا كورسەتىلگەن 2 ازامات تيتوۆ قىستاعى تۇرعىنىنىڭ ءۇي اۋلاسىنداعى مال قوراسىنان 2 قويدى جانە سول ءتۇنى قاراوزەك ەلدى مەكەنىنىڭ تۇرعىنى ب.ب. ەسىمدى ازاماتتىڭ جەكە يەلىگىندەگى مال قوراسىنان تاعى 2 باس قوي ۇرلاعان. بارلىق قىلمىستارىن كولىكتەرىنىڭ كومەگىمەن ىسكە اسىرىپ, وقيعا بولعان جەردەن دەرەۋ بوي تاسالاپ وتىرعان. جوسپارلاعان قىلمىستىق ىستەرىن بۇدان ءارى جالعاستىرىپ, قاستارىنا ورتاق تانىستارى – 1993 جىلى تۋعان م.ب. ەسىمدى ازاماتتى قوسىپ الادى. ءۇش ادامنان قۇرالعان قىلمىستىق توپ 2015 جىلدىڭ اقپان ايىنىڭ 5-نە قاراعان ءتۇنى اباي اۋىلى تۇرعىنىنىڭ 2 باس قويىن, كوكجيدە اۋىلى تۇرعىنىنىڭ 1 تايىنشاسىن ۇرلاعان. جوسپارلى ىستەرىن جۇزەگە اسىرىپ كەلە جاتقان جولدا قىزىلوردا قىىب-نىڭ جول-ءپاترۋلدى پوليتسيا باتالونى قىزمەتكەرلەرى كۇدىك تۋدىرعان اۆتوكولىكتى توقتاتىپ, ۇستاعان. قازىرگى تاڭدا شيەلى اۋدانى, سۇلۋتوبە اۋىلىنىڭ تۇرعىنى م.م. ەسىمدى جانە قىزىلوردا قالاسىنىڭ تۇرعىندارى ا.م., م.ب. ەسىمدى ازاماتتار كۇدىكتى رەتىندە ۇستالىپ, قىزىلوردا قالالىق ءىىب-نىڭ ۋاقىتشا ۇستاۋ اباقتىسىنا قامالدى. تەرگەۋ جۇمىستارى بارىسىندا, بۇل ازاماتتاردىڭ قاتىسۋىمەن جوعارىدا اتالعان قىلمىستاردان بولەك تاعى 6 مال ۇرلىعى شيەلى اۋدانىندا  جاسالعانى انىقتالدى. سەزىكتىلەر ورىن العان بارلىق مال ۇرلىعى دەرەكتەرى بويىنشا كىنالارىن مويىنداپ وتىر. سوتقا دەيىنگى تەرگەپ-تەكسەرۋ امالدارى جۇرگىزىلۋدە. جولدىباي بازار. دەرەك, سۋرەت: «قازاقپارات».