فەستيۆالدىڭ اشىلۋ سالتاناتىندا مادەنيەت جانە اقپارات ءمينيسترى ايدا بالاەۆانىڭ قۇتتىقتاۋى وقىلدى. فەستيۆال تەاتر ونەرىنىڭ دامۋىنا ىقپال ەتەتىن شاراعا اينالاتىندىعىنا زور سەنىم ارتقان مينيستر ستۋدەنتتەر شىعارماشىلىعىنا ءسات-ساپار تىلەدى.
فەستيۆالدىڭ اشىلۋىندا تۇركسوي باس حاتشىسى سۇلتان راەۆ جانە ازەربايجان, قازاقستان, قىرعىزستان, وزبەكستان, تۇركيا جانە تۇرىكمەنستاننان كەلگەن جوعارى وقۋ ورىندارىنىڭ رەكتورلارى شارانىڭ ستۋدەنتتەر شىعارماشىلىعىن ارتتىرۋمەن حالىقارالىق مادەني,رۋحاني بايلانىستاردىڭ دامۋىنا زور ىقپالى تۋرالى ايتىپ ءوتتى.
اكادەميانىڭ رەكتورى ارمان جۇدەباەۆ تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ ۇجىمى وسى بەدەلدى فەستيۆال مەن قاۋىمداستىق وتىرىسىن جوعارى دەڭگەيدە وتكىزۋگە بارلىق شىعارماشىلىق قاجىرىن جۇمساپ وتىرعانىنا توقتالدى. ء«بىز بۇل ءىس-شارا مادەني-شىعارماشىلىق تاجىريبە الماسۋ ءۇشىن ماڭىزدى الاڭعا اينالاتىنىنا, جاس تالانتتار اراسىنداعى دوستىق بايلانىستى نىعايتۋعا مۇمكىندىك بەرەتىنىنە جانە تۇركى الەمىنىڭ تەاتر ونەرىن دامىتۋعا ۇلەس قوساتىنىنا سەنىمدىمىز» دەدى رەكتور.
فەستيۆال اياسىندا تۇركسوي ۇيىمىنا مۇشە ەلدەردىڭ شىعارماشىلىق جوعارى وقۋ ورىندارى قاۋىمداستىعىنىڭ كەزەكتى وتىرىسى وتەدى. بۇل وتىرىستا تەاترلىق ءبىلىم بەرۋدى دامىتۋدىڭ وزەكتى ماسەلەلەرى, وقىتۋ ادىستەمەلەرىمەن الماسۋ جانە قاتىسۋشى جوعارى وقۋ ورىندارى اراسىنداعى ىنتىماقتاستىقتى ودان ءارى نىعايتۋ مەن كەلەشەك جاڭاشا باعىتتار تالقىلانادى.
20-22 مامىر كۇندەرى وتەتىن فەستيۆال اياسىندا تۇركى الەمى ەلدەرى ستۋدەنتتەرىنىڭ قويىلىمدارى, شەتەلدىك جانە وتاندىق تەاتر ونەرىنىڭ جەتەكشى قايراتكەرلەرىنىڭ شەبەرلىك سىنىپتارى وتەدى.
تاجىريبە الماسۋعا جانە قاتىسۋشىلاردىڭ تالانتىن كورسەتۋگە باعىتتالعان شىعارماشىلىق كەزدەسۋلەر فەستيۆالدىڭ ماڭىزىن ارتتىرا تۇسپەكشى.
تۇركىتىلدەس ەلدەر اراسىنداعى مادەني بايلانىستى نىعايتۋ مەن ستۋدەنتتەر تەاترىنىڭ شىعارماشىلىعىن دامىتۋ جانە كاسىبي ديالوگ الاڭىن قۇرۋدى ماقسات ەتكەن فەستيۆال ونەرتانۋ, مۋزىكاتانۋ, تاعى باسقا سالالاردا تىڭ جوبالارعا جول اشاتىنى انىق.
الماتى
