اباي ۋنيۆەرسيتەتىنىڭ كومانداسى ءبىلىم ساپاسىنداعى تەڭسىزدىكتى مۇعالىمدەردىڭ كاسىبي دەڭگەيى مەن مەكتەپتەردىڭ تەحنيكالىق جابدىقتالۋىنداعى الشاقتىقپەن بايلانىستىردى. ولاردىڭ ايتۋىنشا, قالا مەكتەپتەرىندە جوعارى ساناتتى ۇستازداردىڭ ۇلەسى – 31%, ال اۋىل مەكتەپتەرىندە بۇل كورسەتكىش نەبارى 18%. كوماندا بۇل پىكىرىن PISA حالىقارالىق زەرتتەۋىنىڭ دەرەكتەرىمەن بەكىتتى. 2018 جىلعى مالىمەتتەر بويىنشا, اۋىل مەن قالا وقۋشىلارى اراسىنداعى ءبىلىم دەڭگەيىندە ايقىن ايىرماشىلىق بايقالعان. 2022 جىلى بۇل الشاقتىق 4,5%-عا قىسقارعانىمەن, كوماندا مۇنى جەتكىلىكسىز ناتيجە دەپ باعالادى.
شەشىم رەتىندە تىرەك مەكتەپتەر جۇيەسى ۇسىنىلدى. قازاقستانداعى ەڭ ۇزدىك دەگەن 1000 مەكتەپ ءوز ايماعىنداعى شاعىن جيناقتى مەكتەپتەرمەن جۇيەلى بايلانىس ورناتۋعا ءتيىس. بۇل مەكتەپتەر اۋىل ۇستازدارىنا تۇراقتى تۇردە تاجىريبە ءبولىسىپ, ونلاين ساباقتار وتكىزىپ, اپتالىق كەرى بايلانىس ورناتۋى قاجەت. سونىمەن قاتار, اۋىل مەكتەپتەرىنە زاماناۋي تەحنيكامەن جابدىقتالعان ارنايى كابينەتتەر اشۋ ۇسىنىلدى. ءبىر كابينەتكە شامامەن 8 ميلليون تەڭگە قاجەت, ال ەكى كابينەت ورناتۋ ارقىلى مەكتەپتىڭ ءبىلىم بەرۋ الەۋەتىن بىرنەشە ەسە ارتتىرۋعا بولادى. قارجىلاندىرۋ كوزى رەتىندە مەملەكەتپەن قاتار, جەرگىلىكتى كاسىپكەرلەر مەن مەكتەپ تۇلەكتەرى دە اتسالىسا الادى.
تاراز وڭىرلىك ۋنيۆەرسيتەتىنىڭ كومانداسى اۋىل مەن قالا اراسىنداعى ءبىلىم تەڭسىزدىگىن جويۋ ءۇشىن مەملەكەتتىك-جەكەشەلىك ارىپتەستىك مودەلىن ء(مجا) ۇتىمدى پايدالانۋدى ۇسىندى. بۇل مەحانيزم ەلىمىزدە 2006 جىلدان بەرى بار, بىراق نەگىزىنەن ءىرى قالالاردا عانا جۇزەگە اسىرىلىپ كەلەدى. كوماندا ءبىلىم بەرۋ سالاسىنداعى ءمجا جوبالارىن الداعى بەس جىل بويى تەك اۋىلدىق ەلدى مەكەندەردە جۇزەگە اسىرۋعا باسىمدىق بەرۋ قاجەت دەپ سانايدى. وسىلايشا, ولار ارنايى ۋاقىتشا موراتوري ەنگىزۋ تۋرالى باستاما كوتەردى.
ولاردىڭ پايىمىنشا, بۇل ءتاسىل مەملەكەتكە الەۋمەتتىك ماڭىزى بار جوبالاردى ىسكە اسىرۋدا قارجىلىق جۇكتەمەنى بىردەن ەمەس, كەزەڭ-كەزەڭىمەن وتەۋگە مۇمكىندىك بەرەدى. ال كاسىپكەرلەر ءۇشىن بۇل – ۇزاق مەرزىمدى ينۆەستيتسيا مەن سالىقتىق جەڭىلدىكتەر الا وتىرىپ, ءبىلىم سالاسىنا ۇلەس قوسۋعا مۇمكىندىك. ەڭ باستىسى – جوبا تابىستى بولۋى ءۇشىن ينۆەستوردىڭ ءوزى دە بىلىكتى پەداگوگتەردى تارتۋعا, ينفراقۇرىلىمدى دامىتۋعا مۇددەلى بولادى. تاراز كومانداسى بۇل مودەل ارقىلى اۋىل مەكتەپتەرىنىڭ ماتەريالدىق-تەحنيكالىق بازاسىن جاقسارتىپ قانا قويماي, ءبىلىم ساپاسىن ارتتىرۋعا بولادى دەپ ەسەپتەيدى.
باعدارلامانىڭ ءادىل باعاسىن بەرگەن قازىلار القاسىنىڭ قۇرامىندا ءبىلىم سالاسىنىڭ بەدەلدى ماماندارى بولدى. ولاردىڭ قاتارىندا ء«بىلىم-يننوۆاتسيا» حالىقارالىق قوعامدىق قورىنىڭ پرەزيدەنتى دارحان وتە, كاسىپكەر ۇستاز, مەكتەپ ماسەلەلەرى جونىندەگى تاۋەلسىز ساراپشى نۇرمۇحاممەد دوسىباەۆ جانە Qazaq Debate قوزعالىسىنىڭ نەگىزىن قالاۋشى ەربولات مۇحامەدجان بولدى. قازىلار كوماندالاردىڭ ۇسىنىستارىن زەرتتەۋ تەرەڭدىگىنە, قۇرىلىمىنا جانە قوعامعا اسەر ەتۋ الەۋەتىنە قاراي باعالاپ, جەڭىس اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ كومانداسىنا بەرىلدى.
