پاۆلودار. 13 اقپان. پاۆلوداردا «ەرمۇحان بەكماحانوۆ جانە ونىڭ وتاندىق تاريحقا قوسقان ۇلەسى» اتتى رەسپۋبليكالىق كونفەرەنتسيا ءوتتى. بۇل تۋرالى egemen.kz ءتىلشىسى حابارلادى.
سۇلتانماحمۇت تورايعىروۆ اتىنداعى پاۆلودار مەملەكەتتىك ۋنيۆەرسيتەتىندە وتكەن كونفەرەنتسيا جۇمىسى ەرمۇحان بەكماحانوۆتىڭ ەسكەرتكىشىنە گۇل شوقتارىن قويىپ, عالىم رۋحىنا تاعزىم ەتۋدەن باستالدى. سودان سوڭ جينالعاندار «رۋحى ماڭگىلىك عۇلاما» اتتى كىتاپ كورمەسىن تاماشالادى. وتاندىق تاريحتىڭ نەگىزىن سالعانداردىڭ ءبىرى ەرمۇحان بەكماحانوۆتىڭ 100 جىلدىق مەرەيتويى قازاق حاندىعىنىڭ 550 جىلدىعىمەن قاتار كەلىپ تۇر.
ەرمۇحان بەكماحانوۆ 1915 جىلدىڭ 14 اقپانىندا باياناۋىلدا تۋعان. ۇلتىنىڭ شىنشىل تاريحىن جازعانى ءۇشىن سىبىردە ايداۋدا بولدى.
كونفەرەنتسياعا قۇرمەتتى قوناق بولىپ كەلگەن پروفەسسور ناديا بەكماحانوۆا اكەسىنىڭ ەڭبەكتەرى مەن قايراتكەرلىگى تۋراسىندا ايتىپ بەردى.
جالپى, ۋنيۆەرسيتەتتەگى ەرمۇحان بەكماحانوۆ ورتالىعى وسى كۇنگە دەيىن 200-دەن استام عىلىمي تۋىندىلاردى جارىققا شىعارىپتى. پلەنارلىق وتىرىس كەزىندە ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى, پروفەسسور, ۇلتتىق عىلىم اكادەمياسىنىڭ كوررەسپوندەنت مۇشەسى حانكەلدى ءابجانوۆ «ە.بەكماحانوۆ تۇلعاسى زامانداستارى كوزىمەن» اتتى عالىم ءومىرى مەن شىعارماشىلىعىنا ارنالعان بايانداما جاسادى. سونداي-اق وسى كۇنى «ەرمۇحان بەكماحانوۆ جانە تاريحي شىندىق» اتتى تاعى ءبىر جاڭا كىتاپتىڭ تۇساۋكەسەرى بولدى.
جيىن سوڭىندا ەرمۇحان بەكماحانوۆتىڭ 100 جىلدىق مەرەيتويىنا ارنالعان ۇزدىك عىلىمي جۇمىستار بايقاۋىنىڭ ناتيجەلەرى بويىنشا ستۋدەنتتەر ماراپاتتالدى.
فاريدا بىقاي.
دەرەك, سۋرەت: egemen.kz.
