فوتو: zakon.kz
ۇلتتىق مۋزەيگە رۋحاني ساياحات
وتكەن ءتۇنى استاناداعى ۇلتتىق مۋزەي مۇراسىنا 37 563 كورەرمەن كوزايىم بولدى. كەلۋشىلەر 20 زالدان تۇراتىن ەكسپوزيتسيالىق الاڭدارداعى جادىگەرلەر تۋرالى تەرەڭ ماعلۇمات الدى. مەرەكەگە وراي گيد قىزمەتىن ەلگە ەسىمى بەلگىلى تەلەجۇرگىزۋشىلەر دانا نۇرجىگىت, زەيىن الىپبەك, ەرقانات كوپجاسار, يرينا تەن ت.ب اتقاردى. سونداي-اق, «ميراس» ۇيىرمەسىنىڭ زەرەك شاكىرتتەرى مەن «بالدىرعان گيدتەر» بال تىلىمەن كونە ءداۋىر زالدارىنا جەتەلەپ, تاريحتىڭ تاعىلىمدى قۇپيالارىن ەرەكشە ىقىلاسپەن اڭگىمەلەدى. ال «كۇمىس جاس» جوباسىنىڭ قاتىسۋشىلارى جۇرەك تەربەتەر اڭگىمەلەرى ارقىلى مادەني مۇرامىزدىڭ ءمانىن تەرەڭنەن تولعادى.
تەاترالداندىرىلعان ەكسكۋرسيا وتكەن ءداۋىردىڭ ءۇنىن سەزىندىرىپ, كونە تاريحپەن جۇزدەستىردى. بۇل سيقىرلى تۇندە جادىگەرلەرگە جان ءبىتىپ, كۆەست ساباققا بەلسەندى اتسالىستى. مۋزەيدىڭ ءار بۇرىشىندا جوسپارلانعان مۋزىكالىق, شەبەرلىك ساباقتارى سيمفونيا ۇنىمەن استاسىپ, ەرەكشە اتموسفەرالىق لەپ ەستى.
ايماقتارداعى الۋان-الۋان شارا قالاي ءوتتى؟
مۋزەي ءتۇنى ەل ىشىندەگى تاريحي-ولكەتانۋ, مەموريالدىق مۋزەيلەردىڭ ەسىگى دە ايقارا اشىق بولدى. بارلىعى دەرلىك ارنايى شارالار ۇيىمداستىرىپ, تاريحتىڭ ءتىرى ءتىلىن - قورجىنىنداعى جادىگەرلەرىن جارقىراتا ۇسىندى.
الماتى وبلىسىندا «بابالار ءتىلى - مۋزەيلەر ءۇنى» شاراسى قوناەۆ قالاسىنىڭ باستى الاڭىندا اشىق اسپان استىندا ءوتتى. شارا بارىسىندا ايماققا قاراستى مۋزەيلەر مەن ەسىك مەملەكەتتىك تاريحي - مادەني مۋزەي قورىعى, تاڭبالى مەملەكەتتىك تاريحي-مادەني جانە تابيعي مۋزەي-قورىعى مۋزەيى كورمە جاساقتادى. شارادا بارىسىندا كۇنباستى ادامدار, ساق, عۇن داۋىرىنەن بەلگىلى ابىز بيلەر, حاندار مەن اقىن, باتىرلاردان باستاپ قوناەۆ اتامىزعا دەيىنگى بابالارىمىزدىڭ ءجۇرىپ وتكەن جولىن بەدەرلەيتىن قويىلىم قويىلدى.
شىعىستا دا مۋزەي مەرەكەسى شىرايلى ءوتتى. سەمەي قالاسىنىڭ وبلىستىق تاريحي-ولكەتانۋ مۋزەيىندەگى شارا «ۋاقىت جانە مۋزەي» تاقىرىبىندا ءوربىدى.
مەرەكەلىك شاراعا مىڭعا جۋىق ادام قاتىسىپ, تۋعان ولكە تاريحىنان تاعلىمدى ماعلۇمات الىپ, كورمە-جارمەڭكەلەرگە كۋا بولدى. سونداي-اق مۋزەيگە كەلۋشىلەر ۇلى اباي قۇنانباي ۇلى, ءاليحان بوكەيحان, شىلىكتى التىن ادامى مەن ءۇرجار حانشايىمى جانە قازاق باتىرى ناقىشىندا كيىنگەن كەيىپكەرلەرمەن سۋرەتكە ءتۇسۋ ءۇشىن فوتوزونا ۇيىمداستىرىلدى.
بۇل كۇنى باتىستاعى اقتوبە ءوڭىرى قازاقتىڭ باتىر قىزى ءاليا مولداعۇلوۆانىڭ مەموريالدىق مۋزەيىندە باس قوستى. مايدانگەردىڭ 100 جىلدىعىمەن تۋرا كەلگەن شارادا تۇرعىندار ونىڭ ءومىرى مەن ەرلىگىنە قاتىستى ۆيكتورينادا باق سىنادى. سوعىس جىلدارىنداعى بەينەنى حالىق بويىنا جاقىنداتا ءتۇسۋ ءۇشىن قاراقۇمىقتان ازىرلەنگەن اس تاراتىلدى.
تۇركىستان وبلىستىق تاريحي-ولكەتانۋ مۋزەيىندە «مۋزەي بارشاعا اشىق» بىركۇندىك اكتسياسى ءوتتى. كەلۋشىلەر مۋزەي ەكسپوناتتارىن شام جارىعىمەن تاماشالادى. وسى مادەني ورداعا قاراستى اۋداندارداعى 24 مۋزەيدە دە تاعلىمدى شارالار, ارنايى باعدارمالامار ۇيىمداستىرىلدى.
وسىلايشا, ەلىمىزدىڭ تۇكپىر-تۇكپىرىندەگى مادەنيەت وردالارى 14: 00-00: 00 ارالىعىندا, ءتۇن اۋعانشا قالىڭ قاۋىمعا قىزمەت كورسەتتى.
