قازاقستان دەلەگاتسياسى جينالىس بارىسىندا يران ءارحيۆى مەن كىتاپحاناسىنىڭ ينفراقۇرىلىمىمەن, اتاپ ايتقاندا قۇجاتتاردى ساقتاۋ جۇيەسىمەن, قالپىنا كەلتىرۋ جانە كونسەرۆاتسيالاۋ بولىمدەرىنىڭ جۇمىسىمەن, سونداي-اق تسيفرلاندىرۋدىڭ زاماناۋي ادىستەرىمەن جان-جاقتى تانىستى.
كەزدەسۋ ناتيجەسىندە «عىلىم ورداسى» رمك باس ديرەكتورى ۇلار مۇقاجانوۆ پەن يران يسلام رەسپۋبليكاسىنىڭ ۇلتتىق كىتاپحاناسى جانە ءارحيۆى باسشىسى گوليامرەزا اميرحاني (Gholamreza Amirkhani) عىلىم, ارحيۆ جانە كىتاپحانا ءىسى سالالارىنداعى ىنتىماقتاستىقتى دامىتۋعا باعىتتالعان مەموراندۋمعا قول قويدى.
ۇلار مۇقاجانوۆ بۇل كەلىسىمدى ەكى ەل اراسىنداعى عىلىمي جانە مادەني بايلانىستاردى دامىتۋ جولىنداعى ماڭىزدى كەزەڭ رەتىندە اتاپ ءوتتى.
«يرانمەن ارحيۆ جانە كىتاپحانا ءىسى سالاسىنداعى ارىپتەستىك – بۇل تەك كاسىبي تاجىريبە الماسۋ عانا ەمەس, سونىمەن قاتار قۇجاتتىق مۇرانى ساقتاۋ, قالپىنا كەلتىرۋ جانە تسيفرلاندىرۋ باعىتتارىنداعى وزىق تاجىريبەمەن ءبولىسۋدىڭ ءتيىمدى الاڭى. مۇنداي ىنتىماقتاستىق ەكىجاقتى مادەني-عىلىمي قارىم-قاتىناستى جاڭا ساپالىق دەڭگەيگە كوتەرەدى», دەدى «عىلىم ورداسى» رمك باس ديرەكتورى.
مەموراندۋم قازاقستان مەن يران اراسىنداعى ارحيۆ جانە كىتاپحانا ىسىندەگى ىنتىماقتاستىقتى جاڭا دەڭگەيگە كوتەرىپ, حالىقارالىق سەرىكتەستىكتى كەڭەيتۋدىڭ ماڭىزدى نەگىزى بولدى. ول ەكى ەلدىڭ بىرلەسكەن عىلىمي جوبالارى مەن تسيفرلاندىرۋ سالاسىنداعى زەرتتەۋلەرىن جۇزەگە اسىرۋعا مۇمكىندىك بەرەدى. بۇل كەلىسىم «عىلىم ورداسىنىڭ» حالىقارالىق دامۋىنا سەرپىن بەرىپ, قازاقستاننىڭ عىلىمي جانە مادەني مۇراسىن الەمگە كەڭىنەن تانىتۋعا جول اشادى.
