سالىستىرمالى تۇردە ايتساق, بىلتىر 55 مىڭ گەكتاردى لازەرمەن تەگىستەۋدىڭ ناتيجەسىندە 200 ملن تەكشە مەتر سۋ ۇنەمدەلگەن. ال ورتاشا ونىمدىلىك گەكتارىنا 40-55 تسەنتنەردەن 70-80 تسەنتنەرگە دەيىن ۇلعايدى. ايتا كەتسەك, ۇكىمەت اۋىل شارۋاشىلىعى كووپەراتيۆتەرىنىڭ لازەرمەن تەگىستەگىشتەردى ساتىپ الۋ شىعىندارىن 50%-عا دەيىن سۋبسيديالايدى.
«سىزدەرمەن ەڭ العاش كەزدەسكەنىمدە بىرنەشە ۇسىنىس ايتقان ەدىڭىزدەر. وتىنىشتەرىڭىز بويىنشا ءبىز كووپەراتيۆتەرگە ارنالعان سۋبسيديا مولشەرىن 25%-دان 50%-عا دەيىن ۇلعايتتىق. وسىعان دەيىن سۋبسيديا ەگىستىك القابى 200 گەكتاردان اساتىن شارۋاشىلىقتارعا عانا تولەنەدى دەگەن تالاپ بار ەدى. ءبىز اۋىل شارۋاشىلىعى مينيسترلىگىمەن بىرلەسە وتىرىپ, بۇل شەكتەۋدى دە الىپ تاستادىق», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.بۇگىنگى تاڭدا قىزىلوردا وبلىسىندا لازەرمەن تەگىستەيتىن 123 تەحنيكا بار. بۇل 100 مىڭ گەكتارعا دەيىن ەگىستىك القاپتى قامتۋعا مۇمكىندىك بەرەدى. بيىل اۋا رايىنىڭ ەرەكشەلىكتەرىنە بايلانىستى قىزىلوردا وبلىسىندا دا سۋارۋ ماۋسىمى ادەتتەگىدەن ەرتەرەك باستالدى. جاۋىن-شاشىن بولماعاندىقتان سۋارمالى سۋعا سۇرانىس ەكى ەسە ارتىپ وتىر. بۇگىندە ءوڭىر ديقاندارىن سۋمەن قامتۋ ءۇشىن شاردارا سۋ قويماسىنان سەكۋندىنا 600 تەكشە مەتر سۋ جىبەرىلىپ جاتىر.
«مينيسترلىگىمىز پرەزيدەنتتىڭ تاپسىرماسى بويىنشا سۋدىڭ «كولەڭكەلى نارىعىن» جويۋ ءۇشىن ماڭىزدى شەشىمدەر قابىلدادى. ەندى «قازسۋشار» فيليالدارى كەلىسىمشارتقا وتىرعان شارۋا قوجالىقتارىنا عانا سۋ بەرەدى. زاڭسىز سۋ الۋعا رۇقسات جوق. جاڭا سۋ كودەكسىندە دە وسى ماسەلەگە باسا نازار اۋدارىلىپ, جاۋاپكەرشىلىك كۇشەيتىلدى. قۇجات 10 ماۋسىمنان باستاپ كۇشىنە ەنەدى», دەدى ۆەدومستۆو باسشىسى.
