اكتسيا قارساڭىندا قالامگەر مولدابەك جانبولاتوۆتىڭ ء«مۇسىنشى مۇراتبەك» كىتابىنىڭ تۇساۋكەسەرى ۇيىمداستىرىلىپ, « ۇلىلاردى مۇسىندەگەن مۇراتبەك» كورمەسىنىڭ اشىلۋى بولدى. جالپى مەرەكەلىك شاراعا مىڭعا جۋىق ادام قاتىستى. مادەني كەشكە ەلىمىزگە تانىمال ازاماتتار مەن قالا تۇرعىندارى ەكسپوزيتسيانى تاماشالاپ, مۋزەيدە ءوتىپ جاتقان ءتۇرلى شارالاردىڭ كۋاسى بولدى. اكتسياعا ۇلتتىق ۇلاننىڭ «شىعىس» وڭىرلىك قولباسشىلىعىنا قاراستى 5511 اسكەري ءبولىمىنىڭ اسكەري وركەسترىنىڭ مۋزىكانتتارى قاتىسىپ, زاماناۋي كومپوزيتسيالاردىڭ اسكەري شەرۋلەرى مەن پوپۋرريلەرى قالا تۇرعىندارى ءۇشىن مەرەكەلىك كوڭىل-كۇي سىيلادى.
مۋزەيدىڭ دينو-كۆەست بولىمىندە بالالار گيپستەن جاسالعان جۇمىرتقالاردىڭ ىشىنەن دينوزاۆر ويىنشىقتارى ارقىلى دينوزاۆرلار تۋرالى مالىمەت بەرەتىن كارتوچكالاردى قاراپ, ەجەلگى جاراتىلىستار جايلى قىزىقتى دەرەكتەرمەن تانىستى. ال «كوكتەمگى شابىت» قولونەر شەبەرلەرىنىڭ كورمە-جارمەڭكەسىندە كەلۋشىلەر جەرگىلىكتى قولونەر شەبەرلەرىنىڭ گيپس, ساز, ەپوكسيدتى شايىر, سابىن جانە تابيعي ماتەريالداردان جاسالعان اشەكەيلەرى مەن مۇسىندەرى سياقتى بىرەگەي بۇيىمداردى تاماشالادى. سونىمەن قاتار مۋزەي كەلۋشىلەرگە ينتەراكتيۆتى پالەو-ارت ايماعى ارقىلى ەجەلگى ۇڭگىردەن ءۇن قاتتى. مۇندا ءاربىر كەلۋشى ءوزىن ناعىز كونە ءداۋىر سۋرەتشىسى رەتىندە سەزىنىپ, وحرا ءتۇستى بوياۋدىڭ كومەگىمەن ەجەلگى تاسقا سالىنعان سۋرەتتەردەن شابىتتانىپ, ءوز «پەتروگليفتەرىن» جاسادى. بۇعان قوسا ۇلتتىق زياتكەرلىك ويىندى ناسيحاتتاۋ ماقساتىندا مەكتەپ وقۋشىلارى توعىزقۇمالاق ويىنىنان تاپقىرلىق پەن ۇتقىرلىقتا باق سىناستى. ال «مۋزەي جانە تۋعان ولكە» تاريحي-تانىمدىق زياتكەرلىك جارىسىندا اباي وبلىسى مادەنيەت, تىلدەردى دامىتۋ جانە ارحيۆ ءىسى باسقارماسىنا قاراستى مەكەمە قىزمەتكەرلەرى اراسىندا 7 كوماندا قاتىسىپ, ناتيجەسىندە جۇلدەلى ءۇشىنشى ورىندى «داريعا-اي» جاستار تەاترى مەن اباي وبلىسىنىڭ لينگۆيستيكالىق ورتالىعى يلەنسە, ەكىنشى ورىندى سەمەي قالالىق مادەنيەت سارايى, ءبىرىنشى ورىندى اباي اتىنداعى وبلىستىق امبەباپ كىتاپحانا ۇجىمى الدى.
سونداي-اق مۋزەيگە كەلۋشىگە ۇلى اباي قۇنانباي ۇلى, ءاليحان بوكەيحان, شىلىكتى التىن ادامى مەن ءۇرجار حانشايىمى جانە قازاق باتىرى ناقىشىندا كيىنگەن كەيىپكەرلەرمەن سۋرەتكە تۇسۋگە فوتوزونا ۇيىمداستىرىلدى.
تاعى ءبىر ەرەكشەلىك تاريح پەن تابيعاتتىڭ ۇيلەسىمى بولدى. وندا «وزگەرىستەر زامانى جانە تابيعات» تسيكلى, «قۇستار – ءبىزدىڭ قاناتتى دوستارىمىز» ينتەراكتيۆتى ءدارىسى, «قازاقستاننىڭ فلوراسى جانە فاۋناسى» تاقىرىبىندا توپتىق جۇمىس, «بيولوگيا جانە جاساندى ينتەللەكت» اتتى پراكتيكالىق ءدارىس ءوتتى. بۇدان سوڭ اباي ەلىنىڭ تالانتتى جاس اقىندارى ولكەنىڭ تاريحىن جىرعا قوسىپ, مۋزەيگە كەلۋشىلەردى جالىندى جىرلارىمەن ءتانتى ەتتى.
اباي وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنا قاراستى وبلىستىق تاريحي-ولكەتانۋ مۋزەيىنىڭ ديرەكتورى قايرات زەكەن ۇلىنىڭ ارنايى شاقىرتۋىمەن ءبىز دە بارىپ, كەرەمەت كەشتىڭ كۋاسى بولىپ قايتتىق.
اباي وبلىسى
