«بولاشاق» مۇناي مەن گازدى دايىنداۋ قوندىرعىسى اتىراۋ وبلىسىنىڭ ماقات اۋدانى اۋماعىندا ورنالاسقان. قاراباتان ەلدى مەكەنى تۇسىنداعى قوندىرعى مەن اتىراۋ قالاسىنىڭ ارالىعى – شامامەن 35 شاقىرىم.
تەلەگرام ارنالارىندا «بولاشاق» قوندىرعىسىنىڭ اۋماعىندا كۇكىرتتىڭ جيناۋلى تۇرعانى جونىندە فوتو جۇكتەلدى. وسىعان وراي ماسەلەنىڭ ءمان-جايىن اتىراۋ وبلىستىق ەكولوگيا دەپارتامەنتىنىڭ ءباسپاسوز قىزمەتىنەن سۇراستىردىق.
«ەكولوگيالىق ينسپەكتسيا 2022 جىلى North Caspian Operating Company N.V. (NCOC) كومپانياسىنىڭ جەرۇستى كەشەنىن تەكسەرۋ ناتيجەلەرى بويىنشا بىرنەشە بۇزۋشىلىقتى انىقتادى. بىرىنشىدەن, رۇقسات ەتىلگەن 730 توننا كۇكىرتتىڭ ورنىنا 1,7 ملن توننا كۇكىرت ورنالاستىرىلعان. نورمادان ارتىعى – 1,02 ملن توننا. ەكىنشىدەن, قورشاعان ورتانى قورعاۋ شارالارىن ورىندالماعان. ۇشىنشىدەن, ەكولوگيالىق رۇقساتسىز سارقىندى سۋلاردى اعىزعان. تورتىنشىدەن, مەملەكەتتىك ەكولوگيالىق ساراپتامانىڭ قورىتىندىسىندا قامتىلعان تالاپتار ساقتالماعان», دەپ حابارلادى دەپارتامەنتتىڭ ءباسپاسوز قىزمەتى.
الايدا, NCOC كومپانياسى تەكسەرۋ ناتيجەلەرىمەن كەلىسپەي, استانا قالالىق سوتىنا شاعىم تۇسىرگەن. سوت كومپانيانىڭ تالاپ ارىزىن ءىشىنارا قاناعاتتاندىرىپ, ۇيعارىمداعى 10 تارماقتىڭ ۇشەۋىن زاڭسىز دەپ تانىعان.
«استانا قالاسىنىڭ اكىمشىلىك ىستەر جونىندەگى سوت القاسى 2024 جىلعى 27 اقپاندا ەكولوگيا دەپارتامەنتىنىڭ شاعىمىن تولىعىمەن قاناعاتتاندىردى. تابيعات قورعاۋ ينسپەكتورلارى ۇيعارىمىنىڭ بارلىق تارماعى زاڭدى دەپ تانىلدى. NCOC اتالعان سوت قاۋلىسىنا كاسساتسيالىق شاعىم ءتۇسىردى. قازىر بۇل شاعىم جوعارعى سوتتا قارالىپ جاتىر», دەپ ءمالىم ەتتى دەپارتامەنتتىڭ ءباسپاسوز قىزمەتىنەن.
اتىراۋ وبلىسى
