استانا قالاسىنداعى ادامنىڭ يممۋن تاپشىلىعى ۆيرۋسىنىڭ (ۆيچ) الدىن الۋ ورتالىعىنىڭ مالىمەتىنشە, قازىرگى تاڭدا ەلوردادا اۋرۋدى ەرتە كەزەڭدە انىقتاۋ مەن ەمدەۋگە باعىتتالعان بىرقاتار ەمدىك-پروفيلاكتيكالىق شارا قولعا الىنعان.
- ايتۆ ينفەكتسياسىن ەرتە انىقتاۋ ادامنىڭ يممۋندىق جۇيەسىنىڭ جاي-كۇيىن باقىلاۋعا جانە قوسالقى ينفەكتسيالاردىڭ دامۋىن بولدىرماۋعا مۇمكىندىك بەرەدى. سول سەبەپتى قالا تۇرعىندارىنا ايتۆ-عا تەستىلەۋدەن ەركىن وتۋگە جاعداي جاسالعان. 2025 جىلدىڭ العاشقى ءتورت ايىندا 160 مىڭنان استام ادام ينفەكتسياعا تەكسەرۋدەن ءوتتى. بۇل جالپى حالىقتىڭ شامامەن 12 پايىزىن قۇرايدى, - دەپ حابارلادى ورتالىقتان.
سوڭعى ون جىلدا انتيرەتروۆيرۋستىق تەراپيامەن قامتۋ كورسەتكىشى 5 ەسە وسكەن. قازىرگى ۋاقىتتا ايتۆ-مەن تىركەۋدە تۇرعان ادامداردىڭ 93%-ى قاجەتتى ەم الىپ جاتىر. ۆيرۋستىڭ انادان بالاعا جۇعۋ كورسەتكىشى 1%-دان اسپايدى, بۇل ءوز كەزەگىندە نارەستەلەر اراسىندا ينفەكتسيا جۇقتىرۋ قاۋپىن ەداۋىر ازايتادى.
- ارت-تەراپيا قولجەتىمدىلىگىنىڭ ارتۋىنىڭ ارقاسىندا جيتس-تەن ءولىم-ءجىتىم دەڭگەيى وسكەن جوق. ول بۇرىنعى كورسەتكىش دەڭگەيىندە ساقتالىپ وتىر, - دەيدى ماماندار.
حالىقارالىق جيتس-تەن قايتىس بولعانداردى ەسكە الۋ كۇنىنە وراي ايتۆ ينفەكتسياسىنىڭ الدىن الۋ ورتالىعى, قوعامدىق دەنساۋلىق ساقتاۋ باسقارماسى, ۇكىمەتتىك ەمەس ۇيىمدار, جاستار دەنساۋلىق ورتالىقتارى جانە سالاۋاتتى ءومىر سالتىن قالىپتاستىرۋ ورتالىعى بىرلەسىپ, بىرقاتار ءىس-شارا وتكىزدى. اتاپ ايتقاندا, «حان شاتىر» ساۋدا ورتالىعىندا حالىققا ارنالعان اشىق ەسىك كۇنى جانە ەكسپرەسس-تەست جۇرگىزۋ اكتسياسى, قازاق اگروتەحنيكالىق ۋنيۆەرسيتەتىنىڭ ستۋدەنتتەرىنە ارنالعان ءتۇسىندىرۋ شارالارى ۇيىمداستىرىلدى.
مامانداردىڭ ايتۋىنشا, تەك استانا قالاسىنىڭ وزىندە 2025 جىلدىڭ العاشقى ءتورت ايىندا ايتۆ ينفەكتسياسىنىڭ 130 جاڭا فاكتىسى تىركەلگەن. ونىڭ 60%-ى 20-39 جاس ارالىعىنداعى ازاماتتاردان انىقتالعان.
