18 مامىر كۇنى ساعات 13:00-دەن باستاپ تاۋلىك بويى نايزاعاي ويناپ, بۇرشاق ارالاس نوسەر جاڭبىر جاۋادى دەگەن بولجام بار. جاۋىن-شاشىن مولشەرى 20 مم-گە دەيىن جەتۋى مۇمكىن. باتىستان, سولتۇستىك-باتىستان سوققان جەلدىڭ ەكپىنى 3–8 م/س, نايزاعاي كەزىندە 18–23 م/س دەيىن جەتەدى.
19 مامىردا دا قۇبىلمالى اۋا رايى ساقتالىپ, تۇندە ساعات 05:00-گە دەيىن جاڭبىر جاۋى مۇمكىن, كۇندىز جاۋىن-شاشىنسىز. اۋا تەمپەراتۋراسى تۇندە +13…+15°س, كۇندىز +20…+22°س. جەل وڭتۇستىك-باتىستان 3–8 م/س.
سوندىقتان الماتى قالالىق كوممۋنالدىق قىزمەتتەرى كۇشەيتىلگەن رەجيمگە اۋىستىرىلدى. تۇنگى ۋاقىتتا 366 ارنايى تەحنيكا بىرلىگى مەن 355 جول جۇمىسشىسى جۇمىلدىرىلدى. ال 18 مامىر كۇندىز سەلدىڭ الدىن الۋ ماقساتىندا 515 تەحنيكا بىرلىگى, 27 موتوپومپا جانە 755 جۇمىسشى قالا كوشەلەرىنە شىعادى.
سونىمەن قاتار, موتوپومپالارمەن جابدىقتالعان 42 جەدەل بريگادا دايىندىق رەجيمىندە جۇمىس ىستەيدى.
ارىق جەلىلەرى مەن جاۋىن سۋىن قابىلدايتىن تۇزاقتاردى تازالاۋ مەن باقىلاۋ جۇمىستارىنا ەرەكشە كوڭىل ءبولىنىپ وتىر. قالاداعى پروبلەمالىق ۋچاسكەلەردە تاۋلىك بويى تازالاۋ جۇمىستارى جۇرگىزىلۋدە.
الماتى قالاسى قۇتقارۋ قىزمەتى («الماتى قالاسىنىڭ قۇتقارۋ قىزمەتى» مكك) تاراپىنان 15 تەحنيكا بىرلىگى مەن 50 قىزمەتكەر, ال تجد تاراپىنان 55 تەحنيكا بىرلىگى مەن 245 مامان كەزەكشىلىككە شىقتى.
