ەۋرووداقتاعى ۇلكەن ينۆەستوردىڭ ءبىرى

كەشە اقوردادا مەملەكەتتىك حاتشى گۇلشارا ابدىقالىقوۆا يتاليا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ستەفانو راۆانيانى قابىلدادى. مەملەكەتتىك حاتشى ەلشىنى قا­زاقستاندا قىزمەتكە كىرىسۋىمەن قۇت­تىقتاي كەلىپ, ەكى ەلدىڭ ارا­سىن­داعى ساۋدا-ەكونوميكالىق ىنتىماقتاستىقتىڭ جىلدان-جىل­عا ارتىپ كەلە جاتقانىنا قاناعات ءبىلدىردى. بۇل ىسكە پرەزيدەنت نۇر­سۇلتان نازارباەۆتىڭ 2009 جىلى يتالياعا جاساعان رەسمي ساپارى تىڭ سەرپىن بەرگەنىن ايتا كەلىپ, گ.ابدىقالىقوۆا سول ساپاردا سترا­تەگيالىق سەرىكتەستىك تۋرالى مەم­لەكەتارالىق كەلىسىمگە قول قويىلعانىن اتاپ ءوتتى. ودان ءارى مەملەكەتتىك حاتشى يتا­ليانىڭ قازاقستان ءۇشىن الەم­دەگى ءۇشىنشى ورىندا تۇرعان ساۋ­دا ارىپتەسى ەكەندىگىن جانە ەلى­مىز­دىڭ ەكونوميكاسىنا اسا ءىرى كو­لەمدە ينۆەستيتسيا قۇيۋشى ەكە­نىن دە ەسكە الدى. قازاقستاننىڭ ەۋرو­وداق ەلدەرىمەن اراداعى تاۋار اينالىمىنىڭ 13 پايىزى يتا­ليا­نىڭ ۇلەسىنە تيەدى. ال يتاليانىڭ قازاقستان ەكونوميكاسىنا سالعان ينۆەستيتسياسىنىڭ جالپى كولەمى 6,5 ملرد. اقش دوللارىن قۇرايدى, دەدى ول. ودان ءارى گ.ابدىقالىقوۆا يتا­ليانىڭ اكۆيل قالاسىندا بولعان جويقىن جەر سىلكىنىسىنەن كەيىن قازاقستان يتاليا حالقىمەن دوستىقتىڭ بەلگىسى رەتىندە وسى قالاداعى «اميتەرنۋمدەگى قاسيەتتى بيادجو» شىركەۋىن قايتادان قال­پى­نا كەلتىرۋگە 1,7 ملن. ەۋرو كولە­مىندە قارجىلىق كومەك بەرگەنىن ايتتى. كەزدەسۋ بارىسىندا ەكىجاقتى ارىپتەستىكتىڭ بۇگىنگى جاي-كۇيى مەن ىنتىماقتاستىقتى ودان ءارى دامى­تۋدىڭ بولاشاعى, ونىڭ ىشىندە يتا­ليالىق كومپانيالاردىڭ يندۋس­تريالاندىرۋدىڭ ەكىنشى بەسجىل­دىعىنا, «نۇرلى جول – بولاشاققا باستار جول» اتتى پرەزيدەنت جولداۋىندا بەلگىلەنگەن جاڭا ەكونوميكالىق ساياساتتىڭ اياسىن­داعى ينفراقۇرىلىمدىق دامۋ جوسپارىنىڭ جوبالارىنا قاتىسۋ مۇمكىندىكتەرى تالقىلاندى. مەملەكەتتىك حاتشى قازاقستان ءوزىنىڭ جەكە ۇلتتىق پاۆيلونىن ۇسىنۋ ارقىلى يتاليانىڭ ميلان قالاسىندا وتەتىن «ەكسپو-2015» حالىقارالىق كورمەسىنە بەلسەنە قاتىسۋعا نيەتتى ەكەنىن جەتكىزدى. سونداي-اق, گ.ابدىقالىقوۆا يتا­ليا­لىق ارىپتەستەردىڭ استانادا بولاتىن «ەكسپو-2017» كورمەسىنىڭ جۇمىسىنا بەلسەنە قاتىساتىنىنا ءۇمىت ءبىلدىردى. سونىمەن قاتار, كەزدەسۋدە قا­­زاقستان مەن يتاليا اراسىن­داعى وزگە دە ىسكەرلىك جانە مادە­ني-گۋ­ما­نيتارلىق قارىم-قاتى­ناس­تار­دى نىعايتۋدىڭ ماسەلەلەرى تالقى­لاندى. جاقسىباي سامرات, «ەگەمەن قازاقستان».