ءىس-شارا قازاقستانداعى ايەلدەردىڭ رەپرودۋكتيۆتى دەنساۋلىعى سالاسىنداعى وزەكتى ماسەلەلەر, ۇردىستەر مەن شەشىمدەر تالقىلانعان ساراپتامالىق ديالوگ الاڭىنا اينالدى. قاتىسۋشىلار پروفيلاكتيكا, ءبىلىم بەرۋ جانە زاماناۋي مەديتسينالىق قىزمەتتەردىڭ قولجەتىمدىلىگىن ارتتىرۋ ماسەلەلەرىنە ەرەكشە نازار اۋداردى.
نەگىزگى تاقىرىپتار قاتارىندا — رەپرودۋكتيۆتى دەنساۋلىقتى قورعاۋداعى زاماناۋي تاسىلدەر, الەۋمەتتىك فاكتورلاردىڭ اسەرى, كونتراتسەپتسيانىڭ زاماناۋي ادىستەرى تۋرالى اقپاراتتىڭ قولجەتىمدىلىگى, ەندومەتريوزدى ەمدەۋ, ايەلدەرگە ارنالعان كونتراتسەپتسيا جانە گورمونالدى تەراپيا, سونداي-اق بارلىق جاستاعى ايەلدەردىڭ دەنساۋلىعىنا باعىتتالعان كەشەندى ستراتەگيالاردى ازىرلەۋ شارالارى بار.
كەزدەسۋ Gedeon Richter Kazakhstan كومپانياسىنىڭ قولداۋىمەن جانە Kazakhstan Women’s Health جوباسى اياسىندا ۇيىمداستىرىلدى. جوبا ايەلدەردىڭ ءوز دەنساۋلىعىنا قاتىستى ءبىلىم دەڭگەيى مەن بەلسەندىلىگىن ارتتىرۋعا باعىتتالعان.
قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى جۇلدىزاي ىسقاقوۆا ءىس-شارانى اشىپ, رەپرودۋكتيۆتى دەنساۋلىق اپتالىعى اياسىندا وڭىرلەرگە ەرەكشە كوڭىل بولىنگەنىن اتاپ ءوتتى.
كوميسسيا مۇشەلەرى قوعام جانە جاستارمەن كەزدەسۋلەر بارىسىندا الەۋمەتتىك ماسەلەلەردى اشىق تالقىلاپ, مەديتسينالىق قىزمەتتەرگە قولجەتىمدىلىك, ءتۇرلى اۋرۋلاردىڭ الدىن الۋ ماڭىزدىلىعى, اپۆ-عا (ادام پاپيللوماسى ۆيرۋسى) قارسى ۆاكتسيناتسيا قاجەتتىلىگى تۋرالى ماسەلەلەردى كوتەردى.
Gedeon Richter Kazakhstan كومپانياسىنىڭ وكىلى دينارا بىرماعانبەتوۆا رەپرودۋكتيۆتى دەنساۋلىق جونىندە حالىقتى اقپاراتتاندىرۋدىڭ ماڭىزدىلىعىن ايتتى.
«بيىل ءبىز ايەلدەر دەنساۋلىعىنا قاتىستى حالىق اراسىندا ساۋالناما جۇرگىزدىك. گينەكولوگقا الدىن الا قارالۋ كورسەتكىشتەرى مىناداي: ساۋالناماعا قاتىسقان ايەلدەردىڭ 50%-ى دارىگەرگە جىلىنا ءبىر رەت باراتىنىن ايتتى. تاعى 38%-ى 1,5–2 جىلدا ءبىر رەت بارادى, ال 12%-ى ناقتى ارالىقتى اتاي المادى. مۇنداي الدىن الۋ كورسەتكىشى جەتكىلىكسىز», – دەدى دينارا بىرماعانبەتوۆا.
ساۋالناما ناتيجەسىندە تەك 44% رەسپوندەنت قانا ايەلدەر دەنساۋلىعىنا ناقتى انىقتاما بەرە العان. 30% تولىق ەمەس جاۋاپ بەرسە, 26% مۇلدە جاۋاپ بەرە الماعان. بۇل دەرەكتەر حالىقتىڭ بۇل سالادا جەتكىلىكتى ءبىلىمى جوق ەكەنىن كورسەتەدى.
«سوندىقتان دا رەپرودۋكتيۆتى دەنساۋلىقتى تەك مەديتسينالىق ماسەلە رەتىندە ەمەس, كەشەندى الەۋمەتتىك قۇبىلىس رەتىندە قاراستىرۋ اسا ماڭىزدى. ءبىز Gedeon Richter Kazakhstan كومپانياسىندا وسى باعىتتا بەلسەندى جۇمىس ىستەپ كەلەمىز, ءدال وسىلايشا Kazakhstan Women’s Health الەۋمەتتىك جوباسى دۇنيەگە كەلدى», – دەپ قوستى كومپانيا وكىلى.
قر پرەزيدەنتى ءىس باسقارماسى مەديتسينالىق ورتالىعى اۋرۋحاناسىنىڭ ۋرولوگيا ءبولىمىنىڭ مەڭگەرۋشىسى باحتيار قاسىموۆ ەرلەر دەنساۋلىعى ماسەلەسىنىڭ دە وزەكتىلىگىن اتاپ ءوتتى.
«مەنىڭ ءبىر عانا ۇسىنىسىم بار — مۇمكىندىگىنشە "ەرلەر دەنساۋلىعى جىلىن" جاريالاپ, ونى جاس ەرەكشەلىكتەرىنە قاراي تاقىرىپتارعا ءبولۋ. مىسالى, بالالار ۋرولوگياسى. بۇگىندە تۋا بىتكەن جانە ءجاسوسپىرىم كەزدە پايدا بولاتىن ۋرولوگيالىق اۋرۋلار ءجيى كەزدەسەدى», – دەدى ول.
اشىق پىكىرتالاس بارىسىندا جاسوسپىرىمدەردىڭ جىنىستىق جەتىلۋى, ەرتە جۇكتىلىك, ججبي (جىنىستىق جولمەن بەرىلەتىن ينفەكتسيالار), سونداي-اق ەر ازاماتتاردىڭ رەپرودۋكتيۆتى دەنساۋلىقتى ساقتاۋداعى ءرولى مەن جاۋاپكەرشىلىگى سەكىلدى تاقىرىپتار دا كوتەرىلدى.
«ايەلدەر ءالسىز بولىپ كورىنەمىن دەپ قورقادى, سۇراق قويۋعا ۇيالادى, كەيدە ءتىپتى كەيبىر بەلگىلەردىڭ مامانعا قارالۋعا سەبەپ ەكەنىن بىلمەيدى. مىنە, سوندىقتان دا Kazakhstan Women’s Health سەكىلدى جوبالار وتە ماڭىزدى. ولار قوعامعا جاڭا نورمانى – اشىق سويلەسۋ, سۇراق قويۋ, وزىنە قامقور بولۋ مادەنيەتىن سىڭىرەدى», – دەدى رەپرودۋكتولوگ دارىگەر الماز يبراگيموۆ.
دوڭگەلەك ۇستەل بارىسىندا اپۆ-عا قارسى ۇلتتىق ۆاكتسيناتسيا باعدارلاماسىن كەڭەيتۋ, ياعني ۇل بالالاردى دا ەرىكتى تۇردە ۆاكتسيناتسيالاۋدى ەنگىزۋ باستاماسى ايتىلدى.
باسقا ۇسىنىستار قاتارىندا ديۋشەنن اۋرۋى مەن سما-نى انىقتاۋعا ارنالعان گەنەتيكالىق سكرينينگتەردى, ەگدە جاستاعى ايەلدەر ءۇشىن وستەوپوروز سكرينينگىن ەنگىزۋ تۋرالى باستامالار بولدى.
ءىس-شارا قورىتىندىسىندا قاتىسۋشىلار ايەلدەر دەنساۋلىعىن جۇيەلى دامىتۋ ءۇشىن مەملەكەتتىك, قوعامدىق جانە بيزنەس قۇرىلىمداردىڭ كۇشىن بىرىكتىرۋ قاجەت ەكەنىن اتاپ ءوتتى.
