ادام پاپيللوما ۆيرۋسى – ادامنىڭ تەرىسى مەن شىرىشتى قاباتىن زاقىمدايتىن ۆيرۋس. ماماننىڭ ايتۋىنشا, ونىڭ 200-دەن استام ءتۇرى بار. سونىڭ ىشىندە 16 جانە 18 تۇرلەرى وتە قاۋىپتى. ولار ۇزاق ۋاقىت اعزادا قالىپ, قاتەرلى ىسىكتىڭ دامۋىنا اكەلۋى مۇمكىن.
دارىگەردىڭ سوزىنشە, اپۆ جىنىستىق قاتىناس كەزىندە جۇعاتىنى بەلگىلى. الايدا كەيدە ۆيرۋس تەرى نەمەسە شىرىشتى قاباتتاردىڭ جاناسۋى ارقىلى دا بەرىلۋى مۇمكىن. سيرەك جاعدايدا بوسانۋ كەزىندە انادان بالاعا دا جۇعۋى ىقتيمال.
اپۆ – الەمدە كەڭ تاراعان ۆيرۋستىڭ تۇرىنە جاتادى.
«ەر ادام بولسىن, ايەل ادام بولسىن 80 پايىز جاعدايدا اپۆ جۇقتىرىپ الۋ ىقتيمالدىلىعى بار. ستاتيستيكا بويىنشا, الەمدەگى ءار 10-شى ەر ادام جانە ءار 8-ءشى ايەل ادامدا اپۆ-نىڭ ءبىر نەمەسە بىرنەشە ءتۇرى انىقتالادى. سونىمەن قاتار الەمدەگى انىقتالعان جاڭا قاتەرلى ىسىكتىڭ 4,5 پايىزى, ياعني 630 مىڭنان استامى وسى اپۆ-مەن بايلانىستى», دەيدى دارىگەر.
ايتا كەتەتىن جايت, اپۆ-عا قارسى ۆاكتسينا – جاتىر موينى قاتەرلى ىسىگىنىڭ الدىن الاتىن الەمدەگى جالعىز ەكپە. دۇنيەجۇزىلىك دەنساۋلىق ساقتاۋ ۇيىمى بۇل ۆاكتسينانى قاۋىپسىز ءارى ءتيىمدى دەپ تانىعان.
«اپۆ-عا قارسى ەكپە 9–13 جاس ارالىعىنداعى قىزدار مەن ۇلدارعا ۇسىنىلادى. سەبەبى, جاستاردىڭ ەڭ ءبىرىنشى جىنىستىق قاتىناسقا تۇسكەنگە دەيىن ولاردىڭ اعزاسىندا اپۆ-عا قارسى يممۋنيتەت قالىپتاستىرۋ كەرەك. سوندىقتان وسى جاس ارالىعى الىنىپ وتىر», دەپ تۇسىندىرەدى مامان.
قازاقستاندا 2024 جىلدان باستاپ 11 جاستاعى قىزدارعا اپۆ-عا قارسى ۆاكتسيناتسيا جۇرگىزىلىپ كەلەدى. ۆاكتسينا اتا-انانىڭ جازباشا رۇقساتىمەن تەگىن سالىنادى. سونىمەن قاتار 12–13 جاسقا تولىپ ۆاكتسينا الماعان قىزدارعا دا ەكپە سالۋعا مۇمكىندىك بار.
«قازىرگى تاڭدا ەلىمىزدە قولدانىلىپ جۇرگەن گارداسيل-4 ۆاكتسيناسى اپۆ-نىڭ 6, 11, 16 جانە 18 تۇرلەرىنەن قورعايدى. بۇل – جاتىر موينى وبىرىنىڭ 97 پايىزىنا سەبەپ بولاتىن نەگىزگى ۆيرۋستار», دەيدى دارىگەر.
ماماننىڭ ايتۋىنشا, كەيبىر اتا-انالار اپۆ تۋرالى اقپاراتتىڭ ازدىعىنان ەكپەدەن باس تارتىپ جاتادى. الايدا دارىگەرلەر بۇل شەشىم بالانىڭ بولاشاق دەنساۋلىعىنا زيان تيگىزۋى مۇمكىن ەكەنىن ەسكەرتەدى.
«جاتىر موينى وبىرى باستاپقى كەزەڭدەردە ەشقانداي بەلگىلەرسىز وتەدى. كوپ جاعدايدا اۋرۋ ءۇشىنشى نەمەسە ءتورتىنشى ساتىدا عانا انىقتالادى. ول كەزدە ەمدەلۋ مۇمكىندىگى كۇرت تومەندەپ, ولىمگە اكەپ سوعۋى مۇمكىن», دەيدى مامان.
سوڭعى جىلدارى اپۆ-عا قارسى اقپاراتتىق ناۋقاندار كوبەيىپ, مەكتەپتەردە اتا-انالار مەن وقۋشىلار اراسىندا ءتۇسىندىرۋ جۇمىستارى جۇرگىزىلىپ جاتىر.
«قۋانتاتىنى – 15–19 جاستاعى قىزدارىنا ۆاكتسينا سالدىرعىسى كەلەتىن اتا-انالار كوبەيىپ كەلەدى. بۇل – قوعامدا تۇسىنىك قالىپتاسىپ كەلە جاتقانىن كورسەتەدى. باستىسى – اتا-انا ءوز بالاسىنىڭ بولاشاعى ءۇشىن دۇرىس شەشىم قابىلداۋى كەرەك», دەيدى دارىگەر.
اپۆ – قاۋىپتى, بىراق الدىن الۋعا بولاتىن ۆيرۋس.
ء«اربىر اتا-انا بۇل ماسەلەگە سالماقپەن قاراپ, ءوز قىزدارىنىڭ دەنساۋلىعىنا جاۋاپكەرشىلىكپەن قاراۋى ءتيىس», دەپ تۇيىندەدى دارىگەر.
