شەگىرتكەنىڭ زالالى مەن زاردابىن زەرتتەپ, زەردەلەۋ جۇمىسىنا 4 600-دەن استام مامان تارتىلادى. بۇل وتكەن جىلمەن سالىستىرعاندا ەكى ەسە كوپ. زيانكەسكە قارسى كۇرەس ماقساتىندا 443 ارنايى بۇرىككىش تەحنيكا پايدالانىلادى. ونىڭ قاتارىندا جەرۇستى جەلدەتكىش جانە شتانگالى بۇرىككىشتەر, اەروزولدى گاز گەنەراتورلارى (گارد), اسا جەڭىل اۆياتسيا (اجا) قۇرالدارى, ۇشاقتار مەن ۇشقىشسىز ۇشۋ اپپاراتتارى (ۇۇا) بار. وڭىرلەردە جۇمىستى جەدەل ۇيلەستىرۋ ءۇشىن وبلىس اكىمى ورىنباسارلارى جەتەكشىلىگىمەن اكىمدىكتەر جانىنان جەدەل شتابتار قۇرىلدى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا اۋىل شارۋاشىلىعى ۆيتسە-ءمينيسترى ەرمەك كەنجەحان ۇلى باياندادى.
ونىڭ ايتۋىنشا, اسا قاۋىپتى زيانكەستەرگە قارسى كۇرەس شارالارىن جەتىلدىرۋ ماقساتىندا بۇرىككىش تەحنيكانىڭ وڭدەۋ نورمالارىنا قاتىستى نورماتيۆتىك-قۇقىقتىق اكتىلەرگە وزگەرىستەر ەنگىزىلدى. حيميالىق وڭدەۋ كەزىندەگى جۇمىس نورمالارى ەداۋىر تومەندەتىلدى, بۇل ءوز كەزەگىندە تەحنيكا سانىن ارتتىرۋعا مۇمكىندىك بەردى. وسىلايشا, بيىل تارتىلعان تەحنيكانىڭ سانى 443 بىرلىككە دەيىن كوبەيتىلدى. بىلتىر تۇركىستان وبلىسىندا جۇرگىزىلگەن اگرودرونداردى قولدانۋ جونىندەگى قاناتقاقتى جوبا جوعارى تيىمدىلىگىن كورسەتتى. وسىعان بايلانىستى اگرودروندار مەن بۇرىككىشتەردىڭ قۇنىن وتەۋ ءۇشىن اوك سۋبەكتىلەرىنە ينۆەستيتسيالىق سۋبسيديا بەرۋ قاعيداسىنا وزگەرىستەر ەنگىزىلدى. ەندى ولاردىڭ قۇنىنىڭ 25%-ى مەملەكەت تاراپىنان وتەلەدى.
«ۇشاقتارمەن حيميالىق وڭدەۋ كەزىندە ءوندىرۋ نورمالارى تاۋلىگىنە 1200-دەن 800 گا-عا دەيىن, اسا جەڭىل اۆياتسيا كەمەلەرىمەن تاۋلىگىنە 1500-دەن 800 گا-عا دەيىن جانە اەروزولدىك گاز گەنەراتورلارىمەن تاۋلىگىنە 750-دەن 300 گا-عا دەيىن تومەندەدى», دەگەن ۆيتسە-مينيستر, وتكەن جىلى شەگىرتكەگە قارسى كۇرەس شارالارىنا بولىنگەن قاراجاتتى ۇنەمدەۋ ەسەبىنەن قوسىمشا 53 درون (ونىڭ ىشىندە 46 – وڭدەۋ جۇمىستارىنا, 7 – مونيتورينگكە) جانە ينسپەكتورلار ءۇشىن 68 اۆتوكولىك ساتىپ الىنعانىن تىلگە تيەك ەتتى.
«FitoSpace» بىرىڭعاي اۆتوماتتاندىرىلعان اقپاراتتىق جۇيەسىن ەنگىزۋ جۇمىسى جۇرگىزىلىپ جاتىر. بۇل جوبا «عارىش ساپارى» ۇلتتىق كومپانياسىمەن بىرلەسىپ جۇزەگە اسىرىلۋدا. سونىمەن قاتار دروندار مەن جاساندى ينتەللەكت تەحنولوگيالارىن قولدانۋ ارقىلى گەواقپاراتتىق جۇيە ازىرلەندى. بۇل مونيتورينگ تيىمدىلىگىن ارتتىرۋعا مۇمكىندىك بەرەدى.
شەگىرتكەگە قارسى كۇرەس شارالارىن جۇرگىزۋ بويىنشا ەكىجاقتى كەلىسىمدەر اياسىندا قازاقستان ىرگەدەگى – وزبەكستان, رەسەي, قىتاي, قىرعىز ەلدەرىمەن بەلسەندى ءوزارا ءىس-قيمىل جاساپ وتىر. اقپارات الماسۋ, شەكارا ماڭىنداعى اۋماقتاردى بىرلەسىپ زەرتتەۋ جانە زيانكەستەردىڭ ميگراتسياسىنا جول بەرمەۋ بويىنشا ۇيلەستىرىلگەن شارالار قولعا الىنعان. سونىمەن قاتار دۇنيەجۇزىلىك ازىق-ت ۇلىك ۇيىمى فاو شەڭبەرىندە الىس جانە جاقىن شەتەلدەرمەن شەگىرتكەگە قارسى كۇرەس ماسەلەلەرى جونىندە اقپارات الماسۋ مەن ىنتىماقتاستىق جۇزەگە اسىرىلىپ جاتىر.
قازىرگى جاعداي بويىنشا, رەسپۋبليكالىق فيتوسانيتارلىق دياگنوستيكا مەن بولجامدار ورتالىعىنىڭ دەرەگىنە سايكەس, 1 485,7 مىڭ گا جەر زەرتتەلدى. ونىڭ 572,4 مىڭ گا اۋماعى شەگىرتكەمەن زالالدانعان. سونىڭ قاتارىندا 400,9 مىڭ گا القاپ وڭدەۋگە جاتادى. قازىر 397,3 مىڭ گا جەر وڭدەلدى. اتاپ ايتقاندا, جامبىل وبلىسىندا – 29,4 مىڭ گا, تۇركىستان وبلىسىندا – 367,3 مىڭ گا. بارلىق ءىس-شارا اۋىل شارۋاشىلىعى مينيسترلىگىنىڭ تۇراقتى باقىلاۋىندا.
