قازاقستان مەن گرۋزيانىڭ سىرتقى ىستەر مينيسترلىكتەرى اراسىندا كەزەكتى كونسۋلدىق كونسۋلتاتسيالار ءوتتى. بۇل جونىندە قر ءسىم ءباسپاسوز قىزمەتى حابارلادى.
كەزدەسۋ بارىسىندا تاراپتار ەكىجاقتى ىنتىماقتاستىقتىڭ ءتۇرلى اسپەكتىلەرىن تالقىلادى. ونىڭ ىشىندە گرۋزياعا بارعان قازاقستاندىق ازاماتتاردى مەملەكەتكە كىرگىزبەۋ جاعدايلارىنىڭ جيىلەگەنى دە ءسوز بولدى.
«كەزدەسۋ بارىسىندا قازاقستاندىق تاراپ سوڭعى ۋاقىتتا ەلىمىزدىڭ ازاماتتارىنا گرۋزيا شەكاراسىنان كىرۋگە رۇقسات بەرىلمەي, ولاردىڭ دەپورتاتسيالانۋى جيىلەگەنىنە بايلانىستى الاڭداۋشىلىق ءبىلدىردى. الايدا, ەلىمىزدەن باراتىن ازاماتتاردىڭ باسىم بولىگى گرۋزياعا تۋريستىك ماقساتتا بارىپ, قابىلداۋشى ەلدىڭ زاڭىن ادال ساقتايتىنى ايتىلدى», دەلىنگەن ءسىم حابارلاماسىندا.
ءوز كەزەگىندە, گرۋزيا تاراپى مامىر ايىنىڭ باسىنان باستاپ كىرۋگە تىيىم سالۋ جاعدايلارىنىڭ ەداۋىر ازايعانىن اتاپ ءوتتى. كونسۋلدىق وكىلدەر بۇل وڭ ءۇردىس جالعاسىن تاباتىنىنا سەندىرىپ, قازاقستاندىق ازاماتتاردىڭ گرۋزيا اۋماعىنا كىرۋىنە بارىنشا قولايلى جاعداي جاسالاتىنىن ايتىپ ءوتتى.
