فوتو: gov.kz
وبلىستا كۇن رايىنىڭ ىسۋىنا بايلانىستى سۋارۋ كەزەڭى 25 كۇنگە ەرتە باستالعان. جاۋىن-شاشىن بولماعاندىقتان, سۋارمالى سۋعا سۇرانىس الدىڭعى جىلدارمەن سالىستىرعاندا ەكى ەسە ارتىپ وتىر. بۇگىنگە دەيىن وڭىردەگى 15 مىڭ گەكتار ەگىس القابى سۋارىلعان.
قازىرگى كەزەڭدە جامبىل وبلىسىنىڭ «قازسۋشار» فيليالى ءتيىستى كەلىسىمشارتتار جاسالعان شارۋالاردى سۋارمالى سۋمەن قامتاماسىز ەتىپ جاتىر.
«13 گەكتارعا ارپا ەكتىم. قازىر ءبىر رەت سۋارىپ قويدىق. سۋ مول كەلىپ جاتىر. تەك كەلىسىمشارتقا وتىرىپ, اقشاسىن تولەۋ قاجەت. قازاقتا «سۋدىڭ دا سۇراۋى بار» دەگەن ءسوز بار. ءبىزدىڭ جەر ىلعالدى جاقسى ۇستايدى. ءبىر مارتە سۋارساق, سول بىزگە جەتكىلىكتى. ونىڭ وزىنەن جاقسى ءونىم الامىز. جوڭىشقانى دا ءبىر رەت سۋارعاننان كەيىن, ەكى رەت ورىپ الامىز. گەكتارىنا 150-170 ورام ءشوپ جينالادى. بۇل ءوزىمىز باعاتىن مالعا جەتەدى», دەدى قىزىلشارىق اۋىلىنىڭ تۇرعىنى, شارۋا قوجالىعىنىڭ يەسى ابدىبەك شىمىرباەۆ.
