- ارالاس جەكپە-جەكتەن الەمدەگى ەڭ بەلدى پروموۋشەن – UFC 26 شىلدەدە ءابۋ-دابيدە ءدۇبىرلى دودا ۇيىمداستىرۋدى كوزدەپ وتىر. سول جارىستا اسۋ الماباەۆ (21-3) ونەر كورسەتەدى. اسا جەڭىل سالماقتاعى قانداسىمىز ناۋرىز ايىندا پورتۋگاليالىق مانەل كاپەدەن تەحنيكالىق نوكاۋتپەن جەڭىلگەن ەدى. بۇل جولى اسۋ وزبەكستاننىڭ وكىلى رامازان تەمىروۆپەن (19-3) ايقاسادى.
- 30 مامىر – 1 ماۋسىم ارالىعىندا استاناداعى «ارعىماق» سپورت كەشەنىندە ات سپورتىنىڭ كونكۋر ءتۇرى بويىنشا ەۋرازيالىق ليگا اياسىنداعى الەم كۋبوگىنىڭ كەزەڭى جانە اتپەن مانەرلەپ جۇرۋدەن حالىقارالىق تۋرنير ۇيىمداستىرىلادى. سول جارىستا 60-تان اسا مەملەكەتتەن كەلگەن ساڭلاقتار ءوز شەبەرلىكتەرىن پاش ەتەدى.
- قىتايدىڭ نانچان قالاسىندا بايداركا مەن كانوە ەسۋدەن ازيا چەمپيوناتى ءوز مارەسىنە جەتتى. جارىستى وتانداستارىمىز 12 جۇلدەمەن قورىتىندىلادى. تارقاتىپ ايتساق, قايسار نۇرماعامبەتوۆ باپتاعان كوماندا ءتۇرلى-ءتۇستى مەدالداردىڭ ارقايسىن ءتورت-تورتتەن يەلەندى. جالپى ەسەپتە ءبىزدىڭ ەسكەكشىلەر يراننان عانا قالىپ قويىپ, ەكىنشى ورىندى ەنشىلەدى.
- بولگاريانىڭ پازاردجيك قالاسىندا قازىرگى بەسسايىستان الەم كۋبوگى اياقتالدى. دۋناي وزەنىنىڭ جاعالاۋىندا ەلىمىزدىڭ تۋى استىندا ونەر كورسەتكەن ەكى سپورتشى دا ساتسىزدىككە ۇشىرادى. ىرىكتەۋ سايىسىندا گەورگي بورودا-دۋدوچكين 18-ورىن السا, كونستانتين سىچەۆ 21-ساتىعا تابان تىرەدى.
- اۋىر اتلەتيكادان قىتايدىڭ تسزيانشان قالاسىندا ءوتىپ جاتقان ازيا چەمپيوناتىندا 102 كگ سالماقتاعى ارتيوم انتروپوۆ كۇمىس مەدالعا يە بولدى. قوسسايىستىڭ قورىتىندىسى بويىنشا 386 (165+221) كگ-لىق زىلتەمىردى ەڭسەرگەن جەرلەسىمىز وليمپيا ويىندارىنىڭ جەڭىمپازى, الەم, ازيا چەمپيونى ليۋ حۋانحۋادان قالىپ قويدى. جەڭىمپازدىڭ كورسەتكىشى – 410 (180+230) كگ. قولا مەدالدى تۇرىكمەنستاندىق داۋرانبەك حاسانباەۆ يەلەندى. ونىڭ ناتيجەسى – 377 (182+195) كگ.
