ءوڭىر عانا ەمەس, ەل بويىنشا ماڭىزدى اقتاۋ بيتۋم زاۋىتىن جاڭعىرتۋ جوباسى مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ىسكە اسىرىلدى. باس مەردىگەر «CITIC Construction» كومپانياسى جۇمىستى 2024 جىلدىڭ قاراشا ايىندا باستاعان بولاتىن. ۇتىمدى ۇيىمداستىرۋ ناتيجەسىندە, ياعني 230-عا تارتا ماماننىڭ جۇمىلۋىمەن قۇرىلىس-مونتاجداۋ جۇمىسىن تاۋلىك بويى ءتيىمدى جۇرگىزىپ, بەلگىلەنگەن مەرزىمنەن ءبىر اي بۇرىن اياقتادى.
جاڭعىرتۋ ناتيجەسىندە مۇناي وڭدەۋ زاۋىتىنىڭ جىلدىق قۋاتى 1 ملن توننادان 1,5 ملن تونناعا دەيىن, ال بيتۋم ءوندىرىسى 500 مىڭ توننادان 750 مىڭ تونناعا دەيىن ۇلعايدى. جوبا باستى تەحنولوگيالىق جابدىق سانالاتىن ەلوۋ-اۆت – مۇنايدى باستاپقى وڭدەۋ قوندىرعىسىن جاڭارتۋعا باعىتتالعان بولاتىن. جوبانىڭ نەگىزگى جانە تەحنيكالىق جاعىنان ەڭ كۇردەلى جۇمىسىنىڭ ءبىرى – بيىكتىگى 40 مەترگە جۋىق 140 توننالىق جاڭا ۆاكۋمدىق باعانانى ورناتۋ بولدى.
جاڭعىرتىلعان اقتاۋ بيتۋم زاۋىتىنىڭ اشىلۋ سالتاناتىنا ماڭعىستاۋ وبلىسىنىڭ اكىمى نۇرداۋلەت قيلىباي, «سامۇرىق-قازىنا» اق ستراتەگيا جانە اكتيۆتەردى باسقارۋ بويىنشا تەڭ باسقارۋشى ديرەكتورى باقىتجان تاۋباەۆ, ەنەرگەتيكا مينيسترلىگىنىڭ مۇناي تاسىمالداۋ جانە وڭدەۋ دەپارتامەنتىنىڭ ديرەكتورى داۋلەت ارىقباەۆ, «قازمۇنايگاز» ۇك» اق مۇناي وڭدەۋ جانە مۇناي حيمياسى دەپارتامەنتىنىڭ ديرەكتورى ساياتاي الىپباەۆ, سونداي-اق «CITIC Group» جانە «CITIC Construction» وكىلدەرى قاتىستى.
ءوڭىر باسشىسى ن.قيلىبايدىڭ ايتۋىنشا, «Caspi Bitum» زاۋىتىن تابىستى جاڭعىرتۋ – «قازمۇنايگاز» بەن «CITIC Group» اراسىنداعى ءتيىمدى ستراتەگيالىق سەرىكتەستىكتىڭ ناتيجەسى. سونداي-اق جوبانىڭ ەلىمىز ءۇشىن ستراتەگيالىق ماڭىزى زور. ەندى جاڭارتىلعان زاۋىت ىشكى نارىقتاعى سۇرانىستى وتەپ جانە يمپورتقا تاۋەلدىلىكتى ازايتا وتىرىپ, ساپاسى جوعارى وتاندىق بيتۋممەن تۇراقتى قامتاماسىز ەتە الاتىن بولادى.
بۇل – ەلىمىز بويىنشا ەرەكشە ماڭىزعا يە ينفراقۇرىلىمدىق جوبالاردىڭ ءبىرى. جاڭعىرتۋدان سوڭ جاڭا تىنىسپەن جۇمىس ىستەي باستايتىن زاۋىت ىشكى جانە سىرتقى نارىقتا وزىندىك سۇرانىسقا يە ونىمدەرىنىڭ قۋاتىن ارتتىرا تۇسەدى.
ماڭعىستاۋ وبلىسى
