ايتا كەتەيىك, بۇعان دەيىن قالا اكىمدىگى تۇرمىستىق قاتتى قالدىقتاردى قايتا وڭدەۋگە ارنالعان پوليگوندى جەكە كاسىپكەرگە 15 جىل مەرزىمگە سەنىمگەرلىك باسقارۋعا بەرگەن بولاتىن. كەلىسىمشارت تالاپتارىنا ساي, كاسىپكەر ۋاكىلەتتى ورگاندارعا تۇراقتى ەسەپ بەرۋگە, تاپقان پايداسىنىڭ جارتىسىن سىياقى رەتىندە جانە تازا كىرىسىنىڭ ءبىر بولىگىن مەملەكەت پايداسىنا اۋدارىپ وتىرۋعا ءتيىس ەدى.
الايدا, سەنىمگەرلىك باسقارۋشى بۇل شارتتاردىڭ ەشبىرىن ورىنداماعان. ەڭ وكىنىشتىسى, اكىمدىك تاراپىنان كەلىسىمنىڭ ورىندالۋىنا باقىلاۋ جاسالماعان. ناتيجەسىندە, مەملەكەت مۇددەسىنە ەلەۋلى نۇقسان كەلدى.
اتالعان زاڭبۇزۋشىلىقتارعا قالالىق پروكۋراتۋرا نازار اۋدارىپ, تەكسەرىس جۇرگىزگەننەن كەيىن, جالپى قۇنى 900 ميلليون تەڭگە بولاتىن اكتيۆتەر – 700 ميلليون تەڭگەگە باعالانعان قالدىقتاردى قايتا وڭدەۋ كەشەنى مەن 210 ميلليون تەڭگە تۇراتىن, جالپى كولەمى 326 گەكتاردى قۇرايتىن 16 جەر تەلىمى مەملەكەت مەنشىگىنە قايتارىلدى.
