«شۇباركول كومىر» اق قىرىق جىلعا جۋىق كومىر ءوندىرىپ, ساتىپ كەلەدى. كالورياسى جوعارى ءارى كۇلدىلىگى تومەن بولعاندىقتان, شۇباركول كومىرى تەك ەل اۋماعىندا عانا ەمەس, شەت ەلدەردە دە جوعارى سۇرانىسقا يە.
شۇباركول كومىرى تمد مەن الىس شەتەلدەرگە دە ەكسپورتتالادى. 2025 جىلدىڭ ساۋىرىندە كاسىپورىن رەكوردتىق مەجەنى باعىندىرىپ, شەت ەلدەرگە 728 مىڭ توننا كومىر جەتكىزدى.
وندىرىلگەن جالپى كومىر كولەمىنىڭ تورتتەن ءبىرى ەل ىشىندەگى كوممۋنالدىق-تۇرمىستىق قاجەتتىلىككە باعىتتالادى. ءونىم ەلىمىزدىڭ ءتورت تارابىنا تۇگەل جونەلتىلەدى. جىلىتۋ ماۋسىمىندا (2024 جىلدىڭ تامىزى مەن 2025 جىلدىڭ ءساۋىرى ارالىعىندا) 2 656 974 توننا كومىر جونەلتىلدى. بۇل – ۇيىمشىل كوماندانىڭ جۇمىلا اتقارعان جۇمىسىنىڭ جەمىسى. اسىرەسە تاۋ-كەن كولىك, تەمىرجول, تاۋ-كەن تسەحتارىنىڭ جۇمىسىن بولە-جارىپ ايتۋعا بولادى.
سەرگەي كيمنىڭ ايتۋىنشا, كومپانيا مەملەكەتتىك ورگاندار, سونىڭ ىشىندە اكىمدىكتەر الدىنداعى كومىر جەتكىزىلىمدەرىنىڭ تۇراقتىلىعىن قامتاماسىز ەتۋ مەن كەزەك, قاتتى وتىن تاپشىلىعىن بولدىرماۋ مىندەتتەرىن تۇگەل ورىنداپ شىققان.
– جىلىتۋ ماۋسىمىن كومىردىڭ جەتكىلىكتى مولشەرىمەن اياقتاۋىمىزعا بايلانىستى «شۇباركول كومىر» اق تۇتىنۋشىلاردان قاجەتتى كومىردى الدىن الا ساتىپ الۋلارىن وتىنەدى. بۇل قىستا, ءداستۇرلى تۇردە سۇرانىس كۇرت ارتقان تۇستا ۇزىن-سونار كەزەك پەن كومىر تاپشىلىعىن بولدىرماۋعا سەپتىگىن تيگىزەدى. اكىمدىكتەرگە ەرەكشە ەكپىن ءتۇسىرىپ, قاجەتتى كومىر كولەمىنە تاپسىرىستاردى ۋاقتىلى جولداۋلارىن سۇرايمىز. بۇل قىستا ۇزدىكسىز جەتكىزىلىمدەردى قامتاماسىز ەتۋگە ىقپال ەتەدى, – دەپ اتاپ ايتتى سەرگەي كيم.
«شۇباركول كومىر» اق تۇرعىندار مەن مەكەمەلەرگە ساپالى ءونىم جەتكىزە وتىرىپ, ەلدىڭ ەنەرگەتيكالىق قاۋىپسىزدىگىن قامتاماسىز ەتۋ ىسىنە سۇبەلى ۇلەس قوسىپ كەلەدى.
