وبلىس اكىمدىگىنىڭ مالىمدەۋىنشە, قۇقىق قورعاۋ ورگاندارىنىڭ وكىلدەرى قاتىسۋىمەن جۇمىس توبى قۇرىلعان. ەندى وڭىردە زاڭ تالاپتارىنا ساي ەمەس سالىنعان قۇرىلىستار مەن زاماتتاردىڭ قارجىسىن تۇرعىن ءۇي قۇرىلىسىنا زاڭسىز تارتقان قۇرىلىس كومپانيالارىنىڭ جۇمىستارى باقىلاۋعا الىناتىن بولدى.
اباي وبلىسى بويىنشا مەملەكەتتىك ساۋلەت-قۇرىلىس باقىلاۋ باسقارماسى باسشىسىنىڭ مىندەتىن اتقارۋشى سايلاۋ باينازاروۆتىڭ مالىمدەۋىنشە, سەمەي قالاسىنداعى سەلەۆين كوشەسى 12 ب مەكەن-جايىندا ورنالاسقان ورتالىق ۇلەسكەرلەرگە زاڭدىق تۇرعىدان كومەك كورسەتەدى.
«مۇندا ۇلەسكەرلەر وزدەرىنىڭ كەلىسىمشارتتارىن اكەلىپ, تىركەۋگە بولادى. ول تىركەۋ نە ءۇشىن كەرەك؟ ءاربىر ۇلەسكەردىڭ ماسەلەسىن جەكە-جەكە قاراستىرۋ ءۇشىن قاجەت. ەگەر ءبىزدىڭ قولىمىزدا كەلىسىمشارتتاردىڭ قۇجاتتارى بولماسا, ازاماتتاردىڭ تۇرعىن ۇيگە قارجىسىن سالعان-سالماعانىن دالەلدەيتىن فيسكالدى تۇبىرتەكتەرى بولماسا قالاي قاراستىرامىز؟ تۇرعىندار كەلىسىمشارتتارىن ورتالىققا تىركەگەن كەزدە زاڭدى تۇرعىدا قاراي الامىز», دەدى باسقارما وكىلى.
رەسمي مالىمەتكە سايكەس, 2022-2024 جىلدارى سەمەي قالاسىندا ونداعان كوپ قاباتتى ءۇي رۇقساتسىز سالىنعان. بۇل تۇرعىن ۇيلەرگە قازىرگى كەزدە 547 ۇلەسكەردىڭ ءوز قارجىلارىن سالعانى انىقتالدى.
سايلاۋ باينازاروۆتىڭ ايتۋىنشا, ۇلەسكەرلەردىڭ ەشقايسىسى نازاردان تىس قالمايدى. بۇل ماسەلەنى وبلىس اكىمى جەكە باقىلاۋىندا ۇستاپ وتىر. اكىمدىك پەن باسقارما وكىلدەرى ۇلەسكەرلەرمەن جەكە-جەكە جۇمىس جۇرگىزىپ, اشىق ديالوگ قۇرۋعا دايىن.
