زۋبروبيزون – ەۋروپالىق زۋبر مەن امەريكاندىق بيزوننىڭ بۋدانداسقان ءتۇرى. بۇل جانۋار دەنە ءبىتىمى مىعىم, ءجۇنى قالىڭ, باسى ءىرى بولىپ كەلەدى. ورتاشا ءومىر ءسۇرۋ ۇزاقتىعى – 25 جىل. جەتىلگەن بۇقالارىنىڭ سالماعى 900 كەلىگە دەيىن جەتەدى.
زۋبروبيزون الەمدە – بەلارۋس پەن كانادادا عانا كەزدەسەدى. تابيعي ورتادا ءومىر سۇرمەيدى, تەك قورىقتار مەن زووباقتاردا مەكەندەيدى. سۋىق اۋا رايىنا بەيىمدىلىگىمەن ەرەكشەلەنەتىن بۇل جانۋار كەيبىر ەلدەردىڭ قىزىل كىتابىنا سيرەك بۋدان رەتىندە ەنگەن.
«بۋرابايدا تۋعان ءتول ءوزىن جاقسى سەزىنەدى. وعان ۆەتەرينار زور ىقىلاسپەن كۇتىم جاساپ جاتىر. قازىر زووباقتا ءتورت زۋبروبيزون بار. ولار — ەلىمىزدىڭ تابيعاتىندا سيرەك كەزدەسەتىن, ەرەكشە جانۋارلاردىڭ ءبىرى», دەيدى زووباق قىزمەتكەرلەرى.
بۋراباي زووباعىندا بۇل عانا ەمەس, ءتۇرلى سەبەپپەن قۇتقارىلعان, قامقورلىققا الىنعان 30-دان استام جانۋار مەكەندەيدى.
«زووباق كۇن سايىن ساعات 10:00-دەن 18:00-گە دەيىن اشىق. تابيعاتپەن قاۋىشىپ, وسى كەرەمەت جانۋاردى كورەمىن دەۋشىلەردى اسىعا كۇتەمىز!», دەيدى «بۋراباي دامۋ» جشس ءباسپاسوز قىزمەتى.
