12 ءساۋىر كۇنى تۇندە ەرتىس وزەنىندە جاعاعا بايلانعان بارجادان سۋعا سەكىرىپ, كەيىن سۋ بەتىنە شىقپاعان ەر ادامنىڭ دەنەسى ارادا ءبىر اي وتكەندە تابىلدى.
- 13 مامىر كۇنى ساعات 14.00-دە جەلەزين اۋىلىنان 8 كم قاشىقتىقتا ەرتىس وزەنىنىڭ جايىلماسىنان ەر ادامنىڭ دەنەسى تابىلدى. ونى جەرگىلىكتى تۇرعىندار بايقاعان. مارقۇمنىڭ دەنەسىن قۇتقارۋشىلار سۋدان الىپ شىعىپ, تۋىستارىنا كورسەتكەن.
تۋىستارى 12 ساۋىردە تەرەڭكول اۋدانىنىڭ بەرەگوۆوي اۋىلى ماڭىندا سۋعا باتىپ كەتكەن ەر ادامنىڭ دەنەسى ەكەنىن راستادى,-دەپ حابارلادى وڭىرلىك توتەنشە جاعدايلار دەپارتامەنتىنىڭ ءباسپاسوز قىزمەتىنەن.
بەلگىلى بولعانداي, مارقۇمنىڭ دەنەسىن قاتتى اعىس وقيعا بولعان جەردەن شامامەن 140-150 كيلومەترگە الىپ كەتكەن. بۇعان دەيىن ىزدەستىرۋ جۇمىستارى بارىسىندا قۇتقارۋشىلار ەحولوتتاردى پايدالانا وتىرىپ, ەرتىس وزەنىنىڭ تۇبىنە تەكسەرۋ جۇرگىزىپ, جاعالاۋلار تەكسەرىلگەن بولاتىن. 50-دەن استام سۇڭگۋىرلىك جۇمىستار جۇرگىزىلىپ, ولاردىڭ بارىسىندا شامامەن 700 شارشى مەتر زەرتتەلگەن.
مامانداردىڭ ايتۋىنشا, ىزدەۋ جۇمىستارىنا سۋدىڭ قاتتى اعىنى مەن لايلى بولۋى, سۋدىڭ جايىلۋى كەدەرگى كەلتىرگەن.
پاۆلودار وبلىسى
