فوتو: قر دسم
فورۋمدا شۇعىل مەديتسينالىق كومەكتى ۇيىمداستىرۋ, زاماناۋي تەحنولوگيالاردى ەنگىزۋ, جانە ەمدەۋگە جاتقىزۋعا دەيىنگى كەزەڭدە كومەك كورسەتۋدىڭ تيىمدىلىگىن ارتتىرۋ ماسەلەلەرى تالقىلانادى.
قر دەنساۋلىق ساقتاۋ ۆيتسە-ءمينيسترى تيمۋر مۋراتوۆ كونفەرەنتسيانىڭ اشىلۋىندا قازاقستاندا شۇعىل مەديتسينالىق كومەكتى دامىتۋ بويىنشا جۇرگىزىلىپ جاتقان رەفورمالار تۋرالى ايتتى.
«قازاقستان – اۋماعى كەڭ, حالقى اركەلكى قونىستانعان ەل, بۇل شۇعىل مەديتسينالىق كومەكتى كورسەتۋگە ەرەكشە جاعداي تۋعىزادى. ءبىز زاماناۋي لوگيستيكالىق مودەلدەردى, تەلەمەديتسينا شەشىمدەرىن ەنگىزىپ, مامانداردىڭ بىلىكتىلىگىن ارتتىرۋ باعىتىندا بەلسەندى جۇمىس ىستەپ جاتىرمىز. ەڭ ماڭىزدى باسىمدىقتاردىڭ ءبىرى – قولجەتىمسىز وڭىرلەردەن پاتسيەنتتەردى دەر كەزىندە ەۆاكۋاتسيالاۋعا مۇمكىندىك بەرەتىن مەديتسينالىق اۆياتسيانى دامىتۋ بولىپ تابىلادى», دەدى تيمۋر مۋراتوۆ.
پانەلدىك سەسسيالاردا وزبەكستاندىق ارىپتەستەر شۇعىل مەديتسينالىق كومەك جۇيەسىندە اۋدانارالىق ورتالىقتاردىڭ جۇمىسىن ۇيىمداستىرۋ تاجىريبەسىمەن ءبولىستى, سونداي-اق قازاقستاننىڭ ءتۇرلى ايماقتارىنان جەدەل مەديتسينالىق كومەكتىڭ وزەكتى ماسەلەلەرى قارالدى. رەسەي فەدەراتسياسىنان كەلگەن ساراپشى جۇرەك-وكپە رەانيماتسياسى مەن رەانيماتسيالىق ءىس-شارالاردىڭ زاماناۋي تەحنولوگيالارىن تانىستىردى, ال سولتۇستىك قازاقستان وبلىسىنىڭ وكىلدەرى بەينەتىركەگىش قۇرىلعىلارىن پايدالانۋ تاجىريبەسىن ورتاعا سالدى.
كونفەرەنتسيادا سانيتاريالىق اۆياتسيانى دامىتۋ, شۇعىل مەديتسينالىق قىزمەت ماماندارىنىڭ قۇقىقتىق رەتتەلۋى جانە رەانيماتسيالىق ءىس-شارالارعا يننوۆاتسيالىق كوزقاراستارعا ەرەكشە نازار اۋدارىلدى.
«شۇعىل مەديتسينالىق كومەكتى دامىتۋ – دەنساۋلىق ساقتاۋ سالاسىنداعى مەملەكەتتىك ساياساتتىڭ باسىم باعىتتارىنىڭ ءبىرى. ءبىز حالىقارالىق ىنتىماقتاستىققا, زاماناۋي تەحنولوگيالاردى ەنگىزۋگە, كادر دايارلاۋدى جەتىلدىرۋگە جانە ءاربىر ازامات ءۇشىن شۇعىل كومەكتىڭ ساپاسى مەن قولجەتىمدىلىگىن ارتتىرۋعا مۇددەلىمىز. كونفەرەنتسيا ناتيجەلەرى قازاقستانداعى جەدەل مەديتسينالىق كومەك جۇيەسىن ودان ءارى نىعايتۋعا نەگىز بولادى دەپ سەنەمىن», دەدى ۆيتسە-مينيستر.
