ەلىمىزدە ترەنينگتەر, شەبەرلىك سىنىپتارى مەن سەمينارلاردىڭ ساپاسىنا كوڭىلى تولمايتىن ازاماتتار سانى ۇلعايىپ كەلەدى. جۇرت تاۋداي ۋادەگە سەنىپ, تۇيمەدەي ناتيجەمەن قالادى. وقۋعا ۇلكەن قاراجات سالۋ ءۇشىن كەيدە نەسيە الادى. بىراق ماردىمدى ساباق تا الا الماي, جۇمسالعان اقشانى دا قايتارا الماي سان سوعىپ جاتقانى. تۇرعىندار نەگىزىنەن ونلاين جانە وفلاين كۋرستاردىڭ ساپاسىنا, دايىندىقتىڭ تومەندىگىنە, وقۋ اقىسىن قايتارۋدان باس تارتۋ, وقىتۋشىلاردا ليتسەنزيانىڭ بولماۋى سياقتى كەلەڭسىزدىكتەرگە نارازى. شاعىمدار ءبىلىم بەرۋ سالاسىنداعى ۋاكىلەتتى ورگاندارعا جىبەرىلگەن. قازىرگى كۇنى تۇتىنۋشىلار وداعىنا تۇسكەن ءاربىر بەسىنشى ءوتىنىش ءبىلىم بەرۋ قىزمەتتەرىنە قاتىستى بولىپ وتىر. ادامدار كوبىنە وسىنداي مەكەمەلەردىڭ ۋادەسى ىسىنە ساي كەلمەيتىن جاعدايعا تاپ بولادى. نەگىزىنەن ترەنينگتەر مەن سەمينارلار وتپەس بۇرىن الدىن الا كەلىسىمشارت جاسالمايدى, ال تولەم اۋدارىم ارقىلى جۇزەگە اسىرىلادى, بۇل قۇقىقتاردى قورعاۋدى قيىنداتادى.
«مۇنداي ءبىلىم بەرۋدە ناقتى ستاندارتتار جوق, جاتتىقتىرۋشىنىڭ نەمەسە وقىتۋشىنىڭ بىلىكتىلىگىن راستايتىن, ءوزىن-ءوزى رەتتەيتىن ۇيىم جوق. جاي عانا ىنتالاندىرۋ سەمينارلارىنا ادامدار قىرۋار اقشا تولەيدى», دەيدى ەۋرازيالىق تۇتىنۋشىلار وداعىنىڭ باسقارما توراعاسى سۆەتلانا رومانوۆسكايا.
وسىعان بايلانىستى ماماندار ءاردايىم كەلىسىمشارت جاساسۋعا, وقۋ اقىسىن رەسمي تۇردە, راستاۋ ارقىلى تولەۋگە, سونداي-اق ترەنينگكە قاتىسقانىن دالەلدەيتىن پروتسەستى تىركەۋگە كەڭەس بەرەدى. ەگەر قۇقىقتار بۇزىلسا, الدىمەن ساتۋشىعا سوتقا دەيىنگى شاعىم جىبەرۋ, سودان كەيىن تۇتىنۋشىلاردىڭ قۇقىقتارىن قورعاۋ جونىندەگى قوعامدىق بىرلەستىكتەرگە حابارلاۋ, داۋ رەتتەلمەگەن جاعدايدا سوتقا جۇگىنۋ قاجەت.
