اۋقىمدى جيىننىڭ ماقساتى – كليماتتىق كۇن ءتارتىبىن ناقتى ىسكە اسىرۋعا ىقپال ەتۋ, قارجىلىق تەتىكتەردى ءتيىمدى پايدالانۋ جانە ەكولوگيالىق تۇراقتىلىقتى قامتاماسىز ەتۋ باعىتىنداعى ايماقتىق ىنتىماقتاستىقتى تەرەڭدەتۋ. كونفەرەنتسيا بارىسىندا كليماتتىق قاۋىپسىزدىك, سۋ تاپشىلىعى, جاڭارتىلاتىن ەنەرگيا كوزدەرىن دامىتۋ, كليماتتىق وزگەرىستەرگە بەيىمدەلۋ شارالارىن كۇشەيتۋ ماسەلەلەرى جان-جاقتى قوزعالىپ جاتىر.
سونداي-اق پاريج كەلىسىمى اياسىندا ۇلتتىق ۇلەستەردى جاڭارتۋ, ترانسشەكارالىق سەرىكتەستىكتى ارتتىرۋ, ەكولوگيالىق ساياساتقا يننوۆاتسيالىق تەحنولوگيالاردى ەنگىزۋ جانە كليماتتىق قارجىلاندىرۋ كولەمىن الداعى بەس جىلدا 25 پايىزعا كوبەيتۋ سەكىلدى ناقتى باعىتتار كۇن تارتىبىنە قويىلدى. بۇعان قوسا كونفەرەنتسيا جۇمىسى الداعى COP-30 كونفەرەنتسياسىنا دايىندىق اياسىندا اتقارىلاتىن شارالاردى پىسىقتاۋعا ارنالدى.
ايتا كەتەيىك, ورتالىق ازيا ءوڭىرى – كليماتتىق وزگەرىستەر سالدارىنان ەڭ كوپ زارداپ شەگىپ وتىرعان ايماقتاردىڭ ءبىرى. مۇزدىقتاردىڭ قارقىندى ەرۋى, سۋ رەسۋرستارىنىڭ تاپشىلىعى, اپاتتىق سيپاتتاعى تابيعي قۇبىلىستار – وسىنىڭ ءبارى وڭىردەگى ەلدەردىڭ ەكونوميكالىق جانە الەۋمەتتىك دامۋىنا تىكەلەي اسەرىن تيگىزىپ جاتىر.
حالىقارالىق ءىس-شارا اياسىندا ۇيىمداستىرىلعان «ورتالىق ازيا ەلدەرىنىڭ كليماتتىق ساياساتى: جەتىستىكتەر مەن الداعى جوسپارلار» اتتى سەسسيادا قازاقستاننىڭ ەكولوگيا جانە تابيعي رەسۋرستار ۆيتسە-ءمينيسترى مانسۇر وشۋرباەۆ ەلىمىزدىڭ جاڭارتىلاتىن ەنەرگيا سالاسىنداعى تابىستارى مەن ستراتەگيالىق باعىتى تۋرالى كەڭىنەن ايتىپ بەردى.
ۆيتسە-ءمينيستردىڭ ايتۋىنشا, 2014 جىلدان بەرى ەلىمىزدە جاڭارتىلاتىن ەنەرگيا كوزدەرىنىڭ ورناتىلعان قۋاتى 18 ەسەگە وسكەن. بۇل – جۇيەلى تۇردە جۇرگىزىلگەن مەملەكەتتىك ساياساتتىڭ, حالىقارالىق ىنتىماقتاستىقتىڭ جانە ينۆەستيتسيالىق قولداۋدىڭ ناتيجەسى. قازاقستان بۇگىندە 2060 جىلعا دەيىن كومىرتەگى بەيتاراپتىعىنا قول جەتكىزۋ ماقساتىن ايقىن بەلگىلەپ, وسى باعىتتاعى جۇمىستاردى كەزەڭ-كەزەڭىمەن جۇزەگە اسىرىپ كەلەدى. سونداي-اق ەلىمىز ازەربايجان جانە وزبەكستانمەن بىرلەسىپ, تۇراقتى ەنەرگەتيكا سالاسىندا ورتاق جوبالاردى ىسكە اسىرۋدى كوزدەپ وتىر. بۇل باستامالار وڭىرلىك تەحنولوگيالىق الماسۋدى جانە بىرلەسكەن عىلىمي-زەرتتەۋ الەۋەتىن نىعايتۋعا باعىتتالعان.
«جاسىل دامۋ – قورشاعان ورتانى قورعاۋ عانا ەمەس, سونىمەن قاتار ەلدىڭ ەكونوميكالىق قۋاتىن ارتتىرۋدىڭ جاڭا مۇمكىندىگى», دەدى م.وشۋرباەۆ ءوز سوزىندە.
كونفەرەنتسيا قورىتىندىسىندا ايماق ەلدەرىنىڭ كليماتتىق ساياساتتاعى ىقپالداستىعىن ارتتىرۋعا باعىتتالعان بىرلەسكەن مالىمدەمە – قورىتىندى دەكلاراتسيا قابىلدانادى دەپ كۇتىلەدى. بۇل قۇجات وڭىرلىك تۇراقتىلىقتى قامتاماسىز ەتۋگە جانە ورتالىق ازيانىڭ كليماتتىق سىن-قاتەرلەرگە قارسى تۇرۋ قابىلەتىن نىعايتۋعا نەگىز بولماق.
