فوتو: تۋريزم جانە سپورت مينيسترلىگى
حالىقارالىق زاعيپتار سپورت فەدەراتسياسىنىڭ (IBSA) باستاماسىمەن قولعا الىنعان چەمپيونات 2028 جىلى اقش-تىڭ لوس-اندجەلەس قالاسىندا وتەتىن پاراليمپيادا ويىندارىنا ىرىكتەۋ اياسىنداعى ماڭىزدى رەيتينگتىك تۋرنير سانالادى.
قر تۋريزم جانە سپورت مينيسترلىگى ءمالىم ەتكەندەي, دوداعا الەمنىڭ 40-تان استام ەلىنەن كەلگەن 350-گە جۋىق مىقتى سپورتشى قاتىسادى. ولاردىڭ اراسىندا 15 پاراليمپيادا چەمپيونى مەن جۇلدەگەرلەرى بار.
الەم چەمپيوناتىندا ەل نامىسىن ۇلتتىق قۇرامانىڭ ۇزدىك سپورتشىلارى قورعايدى. اتاپ ايتساق, اقمارال ناۋاتبەك (48 كگ), ەرعالي شامەي (73 كگ), دايانا فەدوسوۆا (70 كگ) جانە جۇرقامىرزا شۇكىربەكوۆ (90 كگ) سىندى پاراليمپيادالىق جۇلدەگەرلەر تاتاميگە شىعادى.
سونىمەن قاتار ەلوردادا وتەتىن بەلدەسۋلەرگە الەمدىك دزيۋدونىڭ جۇلدىزدارى برازيليالىق الانا مارتينس مالدونادو, جاپونيالىق يۋجيتو شيرو, رۋمىنيالىق فلورين بولوگا, وزبەكستاندىق شەرزود ناموزوۆ, تۇركيالىق يبراحيم بولۇكباشى قاتىسادى.
ايتا كەتەيىك, سوڭعى ءۇش جىلدا استانادا دزيۋدودان Grand Prix سەرياسىنىڭ كەزەڭدەرى مەن 2023 جىلعى ازيا چەمپيوناتى ۇيىمداستىرىلدى. وسىنداي ماڭىزدى جارىستاردى وتكىزۋ ارقىلى ەلىمىز پارا دزيۋدودان الەم چەمپيوناتىن قابىلداۋعا لايىقتى ەكەنىن كورسەتتى.
وزدەرىڭىزگە ءمالىم, قازاقستان قۇراماسى بۇعان دەيىن دە ءىرى حالىقارالىق ارەنالاردا جوعارى ناتيجە كورسەتىپ ءجۇر. اتاپ ايتقاندا:
توكيو پاراليمپياداسىندا (2020 جىل):
انۋار ساريەۆ (60 كگ) — كۇمىس مەدال
تەمىرجان داۋلەت (73 كگ) — كۇمىس مەدال
زارينا بايباتينا (70 كگ) — كۇمىس مەدال
پاريج پاراليمپياداسىندا (2024 جىل):
اقمارال ناۋاتبەك (48 كگ) — التىن مەدال
ەرعالي شامەي (73 كگ) — كۇمىس مەدال
دايانا فەدوسوۆا (70 كگ) — قولا مەدال
زارينا رايفوۆا (70 كگ) — قولا مەدال
جۇرقامىرزا شۇكىربەكوۆ (90 كگ) — قولا مەدال جەڭىپ العان.
الەم چەمپيوناتىنىڭ سالتاناتتى اشىلۋى 13 مامىر ساعات 15:00-دە وتەدى. كىرۋ تەگىن.
