ونەركاسىپ جانە قۇرىلىس ءمينيسترى ەرسايىن ناعاسپاەۆ بۇگىندە جالپى ينۆەستيتسيا كولەمى شامامەن 10 ملرد دوللار جانە 8,7 مىڭنان استام تۇراقتى جۇمىس ورنىن اشاتىن 5 ءىرى باستامانىڭ جۇزەگە اسىرىلىپ جاتقانىن باياندادى.
اباي وبلىسىندا قۋاتتىلىعى 300 مىڭ توننا كاتودتى مىس بالقىتۋ زاۋىتىنىڭ قۇرىلىسى جۇرگىزىلۋدە. ينۆەستيتسيانىڭ جالپى كولەمى 1,5 ملرد دوللارعا جەتەدى. زاۋىت جۇمىس ىستەپ تۇرعان بوزشاكول, اقتوعاي جانە شىعىستۇستىمەت كەن ورىندارىنان كونتسەنتراتتاردى وڭدەۋگە ارنالعان. ءبىر مىڭنان استام تۇراقتى جۇمىس ورنىن اشۋ كوزدەلگەن. بۇگىندە جوبا بىرىڭعاي يندۋستريالاندىرۋ كارتاسىنا ەنگىزىلىپ, ينفراقۇرىلىمعا قوسىلۋ بويىنشا ءىس-شارالار جۇرگىزىلۋدە.
قاراعاندى وبلىسىندا «Qarmet» اق ءوندىرىس كولەمىن ارتتىرا وتىرىپ ماشينا جانە اۆتوموبيل جاساۋ كاسىپورىندارى ءۇشىن ءونىمنىڭ جاڭا تۇرلەرىن شىعارۋ ارقىلى اۋقىمدى جاڭعىرتۋ باعدارلاماسىن ىسكە اسىرۋدا. ينۆەستيتسيا كولەمى 3,5 ملرد دوللاردى قۇرايدى. 2028 جىلعا دەيىن جىل سايىن 9 ملن تونناعا دەيىن كومىر ءوندىرۋدى, 5 ملن تونناعا دەيىن تەمىر كەنى كونتسەنتراتى مەن بولات ءوندىرۋدى قامتاماسىز ەتۋ جوسپارلانۋدا. ەكى مىڭ جاڭا جۇمىس ورنى اشىلادى. بۇعان دەيىن جۇرگىزىلگەن جۇمىستاردىڭ ناتيجەسىندە 2024 جىلى وندىرىستىك قىزمەت تولىق قالپىنا كەلتىرىلدى, جابدىقتاردى كۇردەلى جوندەۋ اياقتالدى, سەگىز شاحتانىڭ 7-ەۋىندە كومىر ءوندىرۋ جۇمىستارى جۇرگىزىلۋدە, بۇل ءوندىرۋ كولەمىن 7%-عا ارتتىرۋعا مۇمكىندىك بەردى.
قوستاناي وبلىسىندا «سسكوب» اق بازاسىندا قۋاتى جىلىنا 2 ملن توننا, قۇرامىندا 90%-دان استام تەمىر بار ىستىق بريكەتتەلگەن تەمىر وندىرەتىن زاۋىت سالۋ جوسپارلانۋدا. كاسىپورىن مەتاللۋرگيادا ەكولوگيالىق تازا تەحنولوگيالاردى ەنگىزۋ ءۇشىن تىرەك نىسانىنا اينالادى. قازىرگى تاڭدا حالىقارالىق قارجى ينستيتۋتتارىنىڭ قاتىسۋىمەن گاز جەتكىزۋ, ينفراقۇرىلىمعا قوسىلۋ جانە قارجىلاندىرۋ كوزدەرى ماسەلەلەرى پىسىقتالۋدا. ينۆەستيتسيالاردىڭ جالپى كولەمى 1,2 ملرد دوللاردى قۇرايدى. جوبانى جۇزەگە اسىرۋ ناتيجەسىندە ءبىر مىڭ تۇراقتى جۇمىس ورنى اشىلادى.
باتىس قازاقستان وبلىسىندا «ساتيمولا» كەن ورنى بازاسىندا كالي ءحلوريدىن شىعارۋ بويىنشا بايىتۋ-وندىرىستىك كەشەن سالۋ جوباسى ىسكە اسىرىلۋدا.
كاسىپورىن قۋاتىن جىلىنا كالي ءحلوريدىن 12 ملن تونناعا دەيىن بىرتىندەپ ارتتىرا وتىرىپ, ءتورت كەزەڭ بويىنشا ىسكە قوسىلادى دەپ جوسپارلانعان. قازىردە بۇرعىلاۋ جۇمىستارى جۇرگىزىلىپ جاتىر, جەر تەلىمدەرى الىندى, تاۋ جىنىستارىن مۇزداتۋ ۇدەرىستەرى ىسكە قوسىلدى, سىرتقى ينفراقۇرىلىم قالىپتاسۋدا. جوبانىڭ جالپى قۇنى 2,4 ملرد دوللاردان اسادى.
سونداي-اق پرەمەر-مينيسترگە ماڭعىستاۋ وبلىسىنداعى «KazAzot Prime» جشس اممياك-كارباميد كەشەنىنىڭ قۇرىلىسى تۋرالى باياندالدى. جوبا ىشكى نارىقتىڭ مينەرالدى تىڭايتقىشتارعا دەگەن سۇرانىسىن قامتاماسىز ەتەدى. ىسكە اسىرۋ ناتيجەسىندە 700 جۇمىس ورنى اشىلادى. ىسكە قوسۋ 2029 جىلى كۇتىلۋدە. ينۆەستيتسيا كولەمى شامامەن 1,5 ملرد دوللار.
كەڭەس بارىسىندا زاماناۋي ونەركاسىپتىك كلاستەرلەردى قالىپتاستىرۋعا كەشەندى كوزقاراستىڭ قاجەتتىلىگى اتاپ ءوتىلدى.
«وسى سەكتورلارداعى جاڭا جوبالار قوسىلعان قۇنى جوعارى ءونىم شىعارۋعا, زاماناۋي تەحنولوگيالاردى ەنگىزۋگە جانە باسەكەگە قابىلەتتى كلاستەرلەردى قالىپتاستىرۋعا باعىتتالعان يندۋستريالىق ءوسۋدىڭ بەرىك تۇعىرىنا اينالۋعا ءتيىس. ولاردىڭ اينالاسىندا شاعىن جانە ورتا بيزنەس كاسىپورىندارى, سەرۆيستىك كومپانيالار, لوگيستيكالىق ورتالىقتار جانە زاماناۋي ينفراقۇرىلىم بەلسەندى تۇردە دامۋى كەرەك. ءبىز مىڭداعان جاڭا جۇمىس ورنىن قۇرۋعا, بارلىق ءوڭىردىڭ ەكونوميكاسىن جانداندىرۋعا مۇمكىندىك بەرەتىن قۋاتتى مۋلتيپليكاتيۆتىك اسەرگە سەنەمىز», دەدى و.بەكتەنوۆ.
