ەسكە سالا كەتەيىك, قازاقستان رەسپۋبليكاسى پرەزيدەنتى قاسىم-جومارت توقاەۆتىڭ باستاماسىمەن بۇۇ باس اسسامبلەياسى 2026 جىلدى تۇراقتى دامۋ ماقساتتارىنداعى حالىقارالىق ۆولونتەرلەر جىلى دەپ جاريالاعان بولاتىن.
اتالعان جيىنعا قر مادەنيەت جانە اقپارات ءمينيسترى ايدا بالاەۆا, بۇۇ ەرىكتىلەر باعدارلاماسىنىڭ اتقارۋشى ۇيلەستىرۋشىسى تويلى قۇربانوۆ, مەملەكەتتىك ورگانداردىڭ, ۇكىمەتتىك ەمەس ۇيىمداردىڭ جانە ۆولونتەرلىك بىرلەستىكتەردىڭ وكىلدەرى قاتىستى.
جيىن بارىسىندا مينيستر ايدا بالاەۆا ەلىمىزدەگى ۆولونتەرلىك سالاسىندا اتقارىلىپ جاتقان جۇمىستار مەن وتانداستارىمىزدىڭ جەتىستىكتەرى جونىندە باياندادى.
– قازاقستاندىقتار الەمنىڭ تۇكپىر-تۇكپىرىندە ەرىكتىلىك جوبالارعا, سونىڭ ىشىندە بۇۇ, يۋنيسەف سياقتى حالىقارالىق ۇيىمداردىڭ باستامالارىنا بەلسەندى اتسالىسىپ كەلەدى. قازاقستان ۇكىمەتىنىڭ قولداۋىمەن 2020–2023 جىلدار ارالىعىندا توعىز وتانداسىمىز بۇۇ-نىڭ ءتۇرلى قۇرىلىمدارىندا ۆولونتەر رەتىندە قىزمەت اتقاردى. 2024 جىلى جەتى قازاقستاندىق ۆولونتەر بۇۇ-نىڭ كەنيا, تايلاند جانە تۇركياداعى اگەنتتىكتەرىنە جىبەرىلدى, – دەدى ايدا بالاەۆا.
ۇلتتىق ۇيىمداستىرۋ كوميتەتىنىڭ وتىرىسىندا ۆولونتەرلەر قوزعالىسىن دامىتۋعا جانە ازاماتتىق بەلسەندىلىكتى ارتتىرۋعا باعىتتالعان ماڭىزدى باستامالار مەن الداعى ءىس-شارالار تالقىلاندى. سپيكەرلەر سونىمەن قاتار ەرىكتىلەر جىلىنا دايىندىق بارىسى تۋرالى ايتىپ, جاڭا جوبالارعا قاتىستى ۇسىنىستارىن ورتاعا سالدى.
بۇۇ ەرىكتىلەر باعدارلاماسىنىڭ اتقارۋشى ۇيلەستىرۋشىسى تويلى قۇربانوۆ قازاقستان تاراپىنا حالىقارالىق ەرىكتىلەر جىلىن ۇيىمداستىرۋعا بەلسەندى كىرىسكەنى ءۇشىن ريزاشىلىعىن ءبىلدىرىپ, ەلىمىزدىڭ بۇل باستاماداعى كوشباسشىلىعىن ەرەكشە اتاپ ءوتتى.
– سىزدەردىڭ بۇل سالاداعى بەلسەندى قىزمەتتەرىڭىز ەلىمىزدەگى ۆولونتەرلىك مادەنيەتىنىڭ دامۋىنا تىڭ سەرپىن بەرىپ قانا قويماي, قازاقستاندى ازاماتتىق باستامالار سالاسىنداعى ماڭىزدى حالىقارالىق سەرىكتەس رەتىندە تانىتا ءبىلدى. بۇگىن قازاقستان – بۇۇ ەرىكتىلەر باعدارلاماسىنا قاتىسۋشى ەل رەتىندە ءوز پوزيتسياسىن نىقتاپ, كەلەشەكتە باسقا مەملەكەتتەرمەن جۇمىس بارىسىندا ءبىز قازاقستاننىڭ وڭ تاجىريبەسىن ۇلگى رەتىندە كەلتىرەتىن بولامىز, – دەدى تويلى قۇربانوۆ.
وتىرىستا تاعى ءبىر ماڭىزدى جاڭالىق – الماتى قالاسىندا بۇۇ ەرىكتىلەر قوزعالىسىنىڭ ورتالىق ازياداعى سۋبوڭىرلىك كەڭسەسى اشىلاتىنى جاريا ەتىلدى.
– ءبىزدىڭ ورتاق مىندەتىمىز – مەملەكەتتىك قۇرىلىمدار, قوعامدىق ۇيىمدار, ءبىلىم بەرۋ مەكەمەلەرى مەن بۇقارالىق اقپارات قۇرالدارى بىرلەسىپ, ۆولونتەرلىككە قولداۋ كورسەتۋدىڭ ورنىقتى جۇيەسىن قالىپتاستىرۋ. بۇل باعىتتاعى جۇمىس بارلىق تاراپتىڭ ۇيلەسىمدى ىنتىماقتاستىعىنا نەگىزدەلۋى ءتيىس, – دەپ قورىتىندىلادى ايدا بالاەۆا.
