اۆتوپارك مىڭ ادامعا جۇمىس بەرەدى

ويپاڭدا وتىرعان الماتىداي ەمەس, قىراتتا-اق ورنالاسقان شىم­كەنت ەكولوگيالىق احۋالىمەن ماقتانا المايدى. قازاقستان بويىنشا اۆتوماشينالاردىڭ كوپتىگىنەن الدىڭعى ورىندى بەرمەيتىن وبلىس كولىكتەردىڭ ۋلى تۇتىنىنە تۇنشىعىپ, وكپەسىن قولىنا الارداي دەمىگەر ەدى. قوعامدىق كولىكتەردىڭ ساپاسى دا سىن كوتەرمەيتىن. ەندى مىنە, قالاعا مەتان گازىمەن ءجۇ­رەتىن جاڭا 200 اۆتوبۋس اكەلىندى. شىمكەنتتەگى ءال-فارابي اتىنداعى الاڭدا جولاۋشىلاردى تاسىمالدايتىن اۆتوبۋستاردىڭ تانىستىرىلىمىنا وبلىس اكىمىنىڭ ورىنباسارى ساپاربەك تۇياقباەۆ پەن قالا اكىمى دار­حان ساتىبالدى قاتىسىپ, ءسوز سويلەدى. – اۆتوبۋستاردىڭ جالپى قۇنى 2,5 ملرد. تەڭگە, – دەدى ساپاربەك تۇياقباەۆ. – كولىكتەرگە گاز قۇياتىن كومپرەسسورلىق ستانسانىڭ اشىلۋ ءراسىمى جاقىن ارادا وتەدى. اۆتوپارك تولىعىمەن ىسكە قوسىلعاندا مىڭعا تارتا جۇمىس ورنى اشىلادى. جانار-جاعارمايمەن جۇرەتىن كولىكتەرگە قا­راعاندا بۇل اۆتوبۋستار كومىر قىش­قىل گازىن 80 پايىزعا دەيىن از بولەدى. «Green bus company» جشس الىپ كەلگەن 120 اۆتوبۋستىڭ ۇزىندىعى 10 مەتر, ورىندىق سانى 33, جالپى سىيىمدىلىعى 85 ادام. ال, 80 اۆتوبۋستىڭ سىيىمدىلىعى 70 ادامعا لايىقتالعان. سونىمەن قاتار, جاڭا اۆتوبۋستاردا ديسپەتچەرلىك باقىلاۋدى رەتتەۋ ءۇشىن GPS ناۆيگاتورلارمەن جانە جولاۋشىلار ءۇشىن تەگىن WI-FI ورناتىلعان. شىمكەنتتە بۇگىنگى تاڭدا جولاۋشىلار سانى 250 مىڭ ادامنان اسادى. تۇرعىنداردىڭ 31 پايىزى قوعامدىق كولىكتەردىڭ قىزمەتىنە جۇگىنەدى. جالپى, بۇل سالادا 33 كولىك كومپانياسى 86 باعىتتا جولاۋشىلارعا قىزمەت كورسەتۋدە. وسى اۆتوبۋستارعا ارنالعان گاز قۇيۋ بەكەتىنىڭ قۇنى جەكە ينۆەس­تورلارعا 5 ملن. اقش دوللارىنا تۇسكەن. بەكەتتە ورنالاسقان زاماناۋي قۇرىلعىلار ءبىر مەزەتتە 8 اۆتوبۋسقا گاز قۇيا الادى. ايتا كەتۋ كەرەك, تابيعي مەتان گازىنىڭ 1 ءليترى بۇگىندە 54 تەڭگەنى قۇرايدى. «Green bus company» جشس بۇل رەتتە اتالمىش تاسىمال كولىكتەرىن اۆتوبۋس شىعارۋ سالاسىندا الەمدە كوشباسشى بولىپ تابىلاتىن قىتاي حالىق رەسپۋبليكاسىنىڭ «يۋتونگ» جانە «گولدەن دراكون» زاۋىتتارىنان ساتىپ الىپتى. سۇيىتىلعان مەتان گازىمەن جۇرەتىن, ەكولوگيالىق تۇرعىدان العاندا تازا ءارى سىيىمدىلىعى ۇلكەن مۇنداي اۆتوبۋستار شىمكەنت قالاسىنا العاش رەت جەتكىزىلگەنىن دە اتاي كەتكەن ءجون. اۆتوبۋستاردىڭ جالپى قۇنى 2,5 ميلليارد تەڭگەنى قۇرايدى. بۇل ءۇشىن قاجەتتى قاراجاتتى سەرىكتەستىككە «Qazaq Banki» اق ۇسىنىپتى. «جاڭا جەتكىزىلگەن اۆتوبۋستار قالانىڭ ەكولوگيالىق احۋالىن جاقسارتۋدا ءتيىمدى قادام بولىپ وتىر, دەيدى «Green bus company» جشس-ءنىڭ ديرەكتورى ب.ك ۇلىشەۆ. اتالمىش جولاۋشىلار كولىگى ەكى جىلدىق قىزمەت كورسەتۋ كەپىلدەمەسىمەن الىندى. سونىمەن قاتار, جەرگىلىكتى تەحنيكالىق قىزمەتكەرلەردى دايىنداپ, ولاردىڭ بىلىكتىلىك دەڭگەيىن جەتىلدىرۋ ءۇشىن ءوندىرۋشى زاۋىتتىڭ 5 مامانى ءوز قولعابىسىن كورسەتەتىن بولادى». جاڭا اۆتوبۋستار مارشرۋتتارى بويىنشا جۇمىسقا كىرىستى. باقتيار تايجان, «ەگەمەن قازاقستان». شىمكەنت.