ەلىمىزدە سۋ قاۋىپسىزدىگىن قامتاماسىز ەتەتىن ءىرى جوبالار ىسكە قوسىلادى

2027 جىلعا دەيىن قازاقستاندا سۋ شارۋاشىلىعى ينفراقۇرىلىمىن دامىتۋ مەن جاڭعىرتۋدىڭ ەكىنشى كەزەڭى اياسىندا اۋقىمدى جوبالار جۇزەگە اسىرىلادى. جوسپارلانعان 25 جوبانىڭ قاتارىندا جاڭا سۋ قويمالارىن سالۋ, قولدانىستاعىلارىن رەكونسترۋكتسيالاۋ جانە يرريگاتسيالىق جۇيەلەردى جاڭارتۋ جۇمىستارى بار.

اتاپ ايتقاندا, ەل اۋماعىندا 13 جاڭا سۋ قويماسى سالىنسا, 11 سۋ قويماسى قايتا جاڭعىرتىلادى. سونىمەن قاتار الماتى, اتىراۋ, اباي, شىعىس قازاقستان, جامبىل, جەتىسۋ, باتىس قازاقستان, قىزىلوردا, پاۆلودار جانە تۇركىستان وبلىستارىنداعى ۇزىندىعى 5000 شاقىرىمنان استام يرريگاتسيالىق كانال جاڭارتىلماق.

مينيسترلىكتىڭ مالىمەتىنشە, بۇل شارالار 200 مىڭنان استام حالىق تۇراتىن 134 اۋىلدىق ەلدى مەكەندى سۋ تاسقىنى قاۋپىنەن قورعاۋعا مۇمكىندىك بەرەدى جانە ەلدەگى سۋ ينفراقۇرىلىمىنىڭ جالپى جاعدايىن ەداۋىر جاقسارتادى.

سۋ رەسۋرستارىن باسقارۋ سالاسىنداعى تاعى ءبىر باسىم باعىت — حالىقارالىق ارىپتەستىك. سۋ شارۋاشىلىعى مينيسترلىگى شەتەلدىك ۇيىمدارمەن جانە ەلدەرمەن بىرلەسىپ جالپى قۇنى 12 ملن اقش دوللارىنان اساتىن گرانتتىق جوبالاردى ىسكە اسىرۋدا.

مىسالى:

• فرانتسۋز دامۋ اگەنتتىگىنىڭ (AFD) قولداۋىمەن بالقاش كولىنىڭ ماستەر-جوسپارى ازىرلەنۋدە (1,35 ملن ەۋرو);

• «قازاقمىس» كورپوراتسياسى بالقاش ەكوجۇيەسىن قورعاۋعا 5 ملن دوللار باعىتتاماق;

• جاپونيا ۇكىمەتى سۋ تاسقىنىنا قارسى شارالارعا 2 ملن دوللار كولەمىندە گرانت بولمەك;

• يسلام دامۋ بانكى 3,5 ملن دوللار كولەمىندەگى تەحنيكالىق كومەك اياسىندا زەرتتەۋ, باعالاۋ جانە جابدىقتاۋ جۇمىستارىن جۇرگىزبەك.

اتالعان قولداۋلار نەگىزىندە «قازسۋشار» كاسىپورنى مەن قازاق سۋ رەسۋرستارى عىلىمي-زەرتتەۋ ينستيتۋتىنىڭ الەۋەتى كۇشەيتىلۋدە, ال اقپاراتتىق-تالداۋ ورتالىعىنا ەرتە ەسكەرتۋ جۇيەسى ەنگىزىلەدى.

2024 جىلعى 11 ناۋرىزدا تۇركىستان وبلىسىنىڭ سارىاعاش, كەلەس, قازىعۇرت, جەتىساي جانە ماقتاارال اۋداندارىن اۋىز سۋمەن قامتاماسىز ەتۋ ماقساتىندا وگەم وزەنىندە گەس كاسكادى بار توپتىق سۋ قۇبىرىنىڭ قۇرىلىسى باستالدى. بۇل جوبانى «South Hydro Power» جشس ىسكە اسىرادى. جوبانىڭ قۇنى — 190 ملرد تەڭگە, ال ىسكە اسىرۋ بارىسىندا 600-دەن استام جۇمىس ورنى اشىلماق.

جوبادا:

• 12 كم تۋننەل توسەۋ,

• 40 كم سۋ قۇبىرى مەن تازارتۋ ستانتسياسىن سالۋ,

• 5 شاعىن گەس-تەن تۇراتىن كاسكاد سالۋ كوزدەلگەن.

وندىرىستىك قۋاتى جىلىنا 110 ملن م³ اۋىز سۋ جانە 72 مۆت/ساع ەلەكتر ەنەرگياسىن وندىرۋگە مۇمكىندىك بەرەدى.

2024 جىلعى قىركۇيەكتە مينيسترلىك سۋ شارۋاشىلىعى سالاسىندا حالىقارالىق ىنتىماقتاستىقتى ۇيلەستىرۋ ماقساتىندا سۋ سەكتورىن دامىتۋ جونىندەگى سەرىكتەستەردىڭ ۇيلەستىرۋ كەڭەسىن قۇردى. كەڭەستىڭ قۇرامىندا 47 ۇيىم بار, ولاردىڭ قاتارىندا:

• ۇلىبريتانيا, فرانتسيا, شۆەيتساريا, يزرايل, نيدەرلاندى, ۆەنگريا ەلشىلىكتەرى,

• بۇۇ دامۋ باعدارلاماسى,

• ەۋروپالىق وداق وكىلدىگى,

• «قازاقمىس» جانە باسقا دا ءىرى ۇلتتىق ءارى شەتەلدىك كومپانيالار.

مينيسترلىك قازىرگى تاڭدا فرانتسيا, گەرمانيا, نيدەرلاندى, يسپانيا, اقش, يزرايل, قىتاي ەلدەرىمەن جانە حالىقارالىق ۇيىمدارمەن 4 كەلىسىم مەن 19 مەموراندۋمعا قول قويعان.

سالاداعى جاڭعىرۋ اياسىندا 2024 جىلعى 1 اقپانداعى ۇكىمەت قاۋلىسىنا سايكەس «قازسۋشار» كاسىپورنى مەن «نۇرا توپتىق سۋ قۇبىرى» كاسىپورنى بىرىكتىرىلدى. قازىرگى تاڭدا كاسىپورىندا باسقارۋ جۇيەسى وزگەرتىلىپ, بيزنەس-پروتسەستەر اۆتوماتتاندىرىلۋدا, سونىمەن قاتار جاڭا باعىتتار ەنگىزىلىپ جاتىر.

كومپانيا ەندى سۋ شارۋاشىلىعى وبەكتىلەرىن كۇتىپ ۇستاۋ كەزىندە الىنعان قۇم مەن قيىرشىق تاستى ساتۋ قۇقىعىنا يە بولدى. بۇل قىزمەتتەن جىلىنا شامامەن 1 ملرد تەڭگە تابىس ءتۇسۋى مۇمكىن

2025 جىلى قارجى ليزينگى ارقىلى جالپى سوماسى 39 ملرد تەڭگەگە 757 ارنايى تەحنيكا مەن كولىك قۇرالىن ساتىپ الۋ جوسپارلانعان. بۇگىنگى تاڭدا 303 تەحنيكا ساتىپ الىندى.

سونىمەن قاتار, ق.ساتباەۆ اتىنداعى ماگيسترالدى كانال جاڭعىرتىلىپ جاتىر. بۇل باعىتتا 83 ملرد تەڭگە كولەمىندە قارجى قاراستىرىلعان. 2028 جىلعا دەيىن 17 ترانسفورماتور ساتىپ الۋ, 19 سورعى اگرەگاتىن جوندەۋ جانە جاڭعىرتۋ جوسپارلانعان.