ولار ءوز سوزدەرىندە قۇتقارۋ بولىمشەلەرىنىڭ ۇتقىرلىعى مەن توتەنشە جاعدايلارعا دەن قويۋ جىلدامدىعىن ارتتىرۋ ءۇشىن اۆياتسيالىق پاركتى تولىقتىرۋدىڭ ماڭىزدىلىعىن اتاپ ءوتتى. بۇل اسىرەسە اتىراۋ وبلىسى سياقتى شەكارا ماڭىنداعى جانە مۇناي وندىرەتىن وڭىرلەر ءۇشىن وزەكتى بولىپ وتىر, وندا ءىس-قيمىلداردىڭ جەدەلدىگى ادامدار مەن ينفراقۇرىلىم وبەكتىلەرىنىڭ قاۋىپسىزدىگىنە تىكەلەي اسەر ەتەدى.
«بۇگىن ءبىز ماڭىزدى وقيعانىڭ كۋاگەرى بولدىق — L 410 قازاقستان تجم «قازاۆياقۇتقارۋ» اق اۆياتسيالىق پاركىنىڭ بولىگى بولادى. كومپانيا بازاسىندا «سولتۇستىك–وڭتۇستىك, باتىس–شىعىس» قاعيداتى بويىنشا ەلدىڭ بۇكىل اۋماعىن قامتيتىن 20 اۋە جاساعى قۇرىلاتىن بولادى. بۇل ەل باسشىنىڭ قاۋىپسىزدىك پەن توتەنشە جاعدايلارعا دايىندىق ماسەلەلەرىنە باسىمدىق بەرۋىنىڭ ارقاسىندا مۇمكىن بولدى», - دەپ شىڭعىس ءارىنوۆ اتاپ ءوتتى.
L 410 - اۋە پاركىن جاڭارتۋ اياسىندا تجم ءۇشىن الىنعان وسى تيپتەگى ەكىنشى ۇشاق. جاقىن ارادا قازاقستانعا تاعى ەكى جاڭا ۇشاق كەلەدى دەپ كۇتىلۋدە, بۇل قۇتقارۋ اۆياتسياسىنىڭ الەۋەتىن ودان ءارى نىعايتۋعا مۇمكىندىك بەرەدى.
ۇشاق 19 جولاۋشىنى نەمەسە 1800 كگ-عا دەيىن جۇكتى كوتەرەدى, دايىن ەمەس الاڭداردا قونۋعا قابىلەتتى جانە -50-دەن +50 °C-قا دەيىنگى تەمپەراتۋرانىڭ كەڭ دياپازونىندا جۇمىس ىستەيدى.
مودەل سانيتارلىق اۆياتسياعا دا بەيىمدەلگەن. بورتتا اۋىر ناۋقاستاردى تاسىمالداۋعا ارنالعان زاماناۋي زەمبىلدەر مەن جۇيەلەر ورناتىلعان. قاجەت بولسا, ۇشاق ۇشۋ كەزىندە ومىرلىك ماڭىزدى فۋنكتسيالاردى ۇستاۋعا ارنالعان مەديتسينالىق تەحنيكامەن قوسىمشا جابدىقتالۋى مۇمكىن. بارلىق قاجەتتى جابدىقتار تجم قاراماعىنا بەرىلدى.
ەكىنشى ۇشاقتى ساتىپ الۋ تجم تەحنيكالىق جاڭارتۋ باعدارلاماسى شەڭبەرىندە ونەركاسىپتى دامىتۋ قورىنىڭ قارجىلاي جاردەمدەسۋىمەن مۇمكىن بولدى. جاقىن ارادا اتىراۋ وبلىسى اكىمدىگىنىڭ قولداۋىمەن ۇشاقتى ورنالاستىرۋ جانە وعان تەحنيكالىق قىزمەت كورسەتۋ ءۇشىن انگار قۇرىلىسى باستالادى. ءوڭىر ەكيپاجدى جۇمىس جانە دەمالىس ءۇشىن قولايلى جاعدايمەن قامتاماسىز ەتۋگە دە قاتىسادى.
پايدالانۋعا بەرىلگەنگە دەيىن ەكيپاج چەحيادا — ۇشاق ءوندىرۋشىسى, Omnipol جانىنداعى وقۋ ورتالىعىندا وقۋدان ءوتتى. دايىندىق باعدارلاماسى ۇشۋ بولىگىن دە, اۋە كەمەسىنە تەحنيكالىق قىزمەت كورسەتۋدى دە قامتىدى.
