كوپ ۇزاماي استانا قالاسىنىڭ اكىمدىگى ارداگەردەن كەشىرىم سۇراپ, جاعدايدى تۇسىندىرۋگە تىرىسقان. قالانىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب پەن ىشكى ساياسات باسقارماسىنىڭ باسشىسى نۇرداۋلەت ءالمۇحانوۆ تەڭدىك يزاقوۆتىڭ ۇيىنە ارنايى بارىپ, ول كىسىگە ۇزاق جىلعى ەڭبەگى ءۇشىن العىس ايتىپ, 9 مامىر كۇنى وتەتىن گۇل شوقتارىن قويۋ راسىمىنە رەسمي تۇردە شاقىرعان. اكىمدىكتىڭ رەسمي حابارلاماسىندا شەرۋ الاڭىنا كىرۋگە ارنالعان ءتىزىم سوعىس جانە تىل ارداگەرلەرىنىڭ تۋىستارىنىڭ تىكەلەي ءوتىنىشى نەگىزىندە جاسالعانى, ال تەڭدىك يزاقوۆتىڭ وتباسىنان ونداي ءوتىنىش بولماعانى ايتىلىپتى.
سونىمەن 93 جاستاعى ارداگەر كىم بولدى؟ ول – ەلىمىزدىڭ مەديتسينا سالاسىنداعى كورنەكتى تۇلعا. تەڭدىك اقساقال قازاقستانداعى العاشقى نەيروحيرۋرگتەردىڭ ءبىرى رەتىندە ەلدىڭ دەنساۋلىق ساقتاۋ جۇيەسىنە ولشەۋسىز ۇلەس قوسقان ازامات. 1932 جىلى قاراعاندى وبلىسى قارقارالى اۋدانىندا دۇنيەگە كەلگەن ول جاستايىنان ەڭبەككە ارالاسىپ, اۋىر كەزەڭدەردى باسىنان وتكەردى. كەيىن 1957 جىلى قاراعاندى مەديتسينالىق ينستيتۋتىن اياقتاعان سوڭ شالعايداعى اۋداندىق اۋرۋحانالاردا جۇمىس ىستەپ, كەيىن الماتى مەملەكەتتىك مەديتسينا ينستيتۋتىندا قىزمەت ەتتى.
وسى كەزەڭدە بەت جۇيكە اۋرۋىن ەمدەۋدىڭ تىڭ ءتاسىلى — گيدروتەرمودەسترۋكتسيا ءادىسىن العاش قولدانعان دارىگەرلەردىڭ ءبىرى بولدى. بۇل ءادىس بويىنشا ناۋقاستىڭ بەت جۇيكەسىنە قايناعان سۋ جىبەرۋ ارقىلى اۋىرسىنۋدى توقتاتۋ مۇمكىن بولدى. بۇل – دالدىك پەن تەرەڭ ءبىلىمدى تالاپ ەتەتىن, تاۋەكەلى جوعارى, بىراق ناتيجەلى ەم. ونىڭ بۇل ءتاسىلىن زامانداستارى دا قايتالاپ كورۋگە تىرىسقان, الايدا ءدال وسى شەبەرلىككە جەتە الماعان. سونداي-اق تەڭدىك يزاقوۆ ەمدەۋمەن قاتار عىلىمي-زەرتتەۋ جانە وقىتۋشىلىقپەن دە اينالىسىپ, كوپتەگەن جاس ماماننىڭ جولىن اشقان.
ارداگەردىڭ نەمەرەسى ەرلان امانگەلدى اتاسى تۋرالى بىلاي دەپ تولعانادى:
«ول ءومىر بويى نەيروحيرۋرگ بولىپ ەڭبەك ەتتى. قازىر 93 جاستا, اقىل-ەسى تىڭ, وتە بەلسەندى. ءالى كۇنگە دەيىن ادامدارعا كەڭەس بەرىپ, دياگنوز قويۋعا كومەكتەسىپ وتىرادى. راسىندا بۇل كىسى – ۇلى ادام!».
تەڭدىك يزاقوۆتىڭ ومىرلىك ۇستانىمى – ەڭبەك ەتۋ, ونىڭ قۇدىرەتىنە سەنۋ.
«باقىتتىڭ كىلتى – ەڭبەكتە. وي ەڭبەگى, قول ەڭبەگى بولادى. سوعان بەرىلە كىرىسۋ كەرەك. ەڭبەكتەن رۋح الاسىڭ. قازاق كىشكەنتاي بالا ەڭبەكتەدى دەپ بەكەر ايتپايدى. «قايعى كەلسە قارسى تۇر, قۇلاي بەرمە» دەيدى اباي. سوندىقتان كەز كەلگەن قيىندىق ادامدى شيراتادى. سول سەبەپتى ءاربىر ازامات ەڭبەككە داعدىلانۋ كەرەك», دەيدى ارداگەر. ول ءۇشىن ەڭبەك – ادامدى ادام ەتەتىن, رۋح بەرەتىن قۇندىلىق.
مىنە, وسىنداي ازاماتتىڭ اسكەري شەرۋگە كىرە الماي قالۋى قوعامدا ءادىل سىن تۋدىردى. دەگەنمەن, اكىمدىكتىڭ ۋاقىتىلى جاساعان قارەكەتى – ىزەتتىلىك بەلگىسى. ويتكەنى از عانا قالعان ارداگەرلەردى الاقاندا ايالاپ, قۇرمەت كورسەتۋ – ءبارىمىزدىڭ پارىزىمىز ەكەنى انىق. ەندىگى جولى مۇنداي كەلەڭسىز جاعدايدى بولدىرماۋعا تىرىسۋ – ەل تالابى بولىپ وتىر.
