فوتو: اشىق دەرەككوز
وسى ناۋقان اياسىندا الەۋمەتتىك وسال ساناتتاعى وتباسىلاردان شىققان 500 مىڭنان استام بالا ءتۇرلى باعىتتاعى باعدارلامالارمەن قامتىلادى. بۇعان قوسا, «قازاقستان حالقىنا» قوعامدىق قورىنىڭ قولداۋىمەن تاعى 10 مىڭ وقۋشىعا تەگىن دەمالىس مۇمكىندىگى بەرىلەدى.
جازعى باعدارلامانىڭ مازمۇنى كەڭ ءارى جان-جاقتى. بالالار ەڭبەك پەن شىعارماشىلىق باعىتتاعى جوبالارعا, تۋريستىك-تانىمدىق ساپارلارعا, ءبىلىم بەرۋ ءىس-شارالارىنا, سونداي-اق حالىقارالىق فورۋمدار مەن بايقاۋلارعا قاتىسا الادى. بۇل باعىتتاعى جۇمىستار توعىز مينيسترلىكتىڭ ۇيلەستىرۋىمەن ازىرلەنگەن بىرىڭعاي جوسپار اياسىندا ىسكە اسىرىلۋدا. رەسپۋبليكالىق جانە وڭىرلىك دەڭگەيدە ارنايى شتابتار قۇرىلىپ, دەمالىس ورتالىقتارىنىڭ تولىق ءتىزىمى جاساقتالعان.
بالالاردىڭ قاۋىپسىز دەمالىسىن قامتاماسىز ەتۋ باستى نازاردا تۇر. لاگەرلەردەگى سانيتارلىق جاعدايلار, تاعام ساپاسى, سۋ جاعالاۋلارىنداعى جانە سپورتتىق الاڭدارداعى قاۋىپسىزدىك تالاپتارى قاتاڭ قاداعالانادى. سونىمەن قاتار, اتا-انالار مەن بالالار ءۇشىن ارنايى جادىنامالار, قاۋىپسىزدىك بويىنشا نۇسقاۋلىقتار مەن گايدبۋكتار دايىندالىپ, تاراتىلماق.
بيىل وڭىرلەردە «كيەلى شىعىس», « ۇلى دالا كەرەمەتى», «Jas galym», «گاسترو تۋريزم», «قوناقجاي وتباسى» سياقتى بىرقاتار جاڭا فورماتتاعى جوبالار ىسكە اسىرىلادى.
جالپى, جاز مەزگىلىندە رەسپۋبليكا كولەمىندە جىل بويى ۇزدىكسىز جۇمىس ىستەيتىن 16 لاگەر, 188 ماۋسىمدىق لاگەر, 10 مىڭنان استام مەكتەپ جانىنداعى الاڭ جانە 512 شاتىرلى مەن كيىز ءۇي تيپىندەگى لاگەر كەزەڭ-كەزەڭىمەن اشىلادى دەپ جوسپارلانىپ وتىر. ولاردىڭ باسىم بولىگىندە بالالار ءۇشىن ىستىق تاماقپەن قامتۋ قاراستىرىلعان.
