فوتو: madeniportal.kz
بار عۇمىرىن وتانعا ارناعان باتىرعا رەسمي «حالىق قاھارمانى» اتاعى بەرىلمەگەن. كوزى تىرىسىندە «كەڭەس وداعىنىڭ باتىرى» داڭقى بۇيىرماعان. بۇل اتاق 1990 جىلدىڭ 12 جەلتوقسانىندا باۋىرجان مومىش ۇلى دۇنيە سالعاننان كەيىن 8 جىلدان كەيىن عانا بەرىلەدى.
«حالىق قاھارمانى» اتاعى تاۋەلسىز ەلىمىزدىڭ جوعارى دارەجەلى ەرەكشەلىك بەلگىسى. وسى ەرەكشەلىك بەلگىسىنىڭ سيپاتتاماسىندا:
«حالىق قاھارمانى» اتاعى قازاقستان رەسپۋبليكاسىنا سiڭiرگەن اسا ۇزدiك ەڭبەگi, ونىڭ بوستاندىعى مەن تاۋەلسiزدiگi جولىنداعى جاۋىنگەرلiك ەرلiكتەرi ءۇشiن بەرiلەدi», دەپ تۇسىندىرىلەدى. سيپاتتاماعا تولىق ساي بولمىس يەسىنە قاتىستى وسى جايت ءجيى-ءجيى ءسوز بولعانمەن, وڭ شەشىم ءالى دە شىقپاعان. بۇل ماسەلەمەن باتىردىڭ ۇرپاقتارى دا بەتپە- بەت كەلىپ ءجۇر. باتىردىڭ كەلىنى زەينەپ احمەتوۆا تۇڭعىش پرەزيدەنتتىڭ «تاۋەلسىزدىك ءداۋىرى» اتتى كىتابىندا باۋىرجان مومىش ۇلىنا وسى اتاقتىڭ بەرىلگەنى تۋرالى ايتىلعاندا وتباسى اتىنان جاۋاپتى ورگاندارعا ساۋال جولدانعانىن «جاس الاش» گازەتىندە جاريالانعان ماتەريالدا ەگجەي-تەگجەيلى تارقاتادى.
«2018 جىلدىڭ اقپان ايىندا وتباسىمىزعا قادىرلى ءبىر كىسى حابارلاستى. امان-ساۋلىقتان سوڭ: «سەندەر ىلعي باۋكەڭدى حالىق قاھارمانى اتاعىن العان جوق دەۋشى ەدىڭدەر, ال ەلباسىنىڭ «تاۋەلسىزدىك ءداۋىرى» دەگەن كىتابىندا باۋكەڭ بۇل اتاقپەن ماراپاتتالعانداردىڭ باسىن باستاپ تۇر عوي», دەدى. تاڭىرقاعان وتباسى انىق-قانىعىن بىلمەككە تۇسىندەرمە حات سۇراتادى. ساۋالعا سول كەزدەگى مادەنيەت جانە سپورت مينيسترلىگى بىلاي جاۋاپ بەرەدى:
«قۇرمەتتى ەرجان باحىتجان ۇلى!
…باۋىرجان مومىش ۇلىنىڭ ەل تاريحىندا ەرلىكتىڭ ەرەن ۇلگىسىن كورسەتكەن داڭقتى تۇلعا رەتىندە الار ورنى ەرەكشە. بۇل تۇرعىدا ب.مومىش ۇلىنا مەملەكەت جانە جۇرتشىلىق تاراپىنان بىرقاتار ماراپاتتار مەن اتاقتار بەرىلگەن. ەلباسىنىڭ 2017 جىلى شىققان «تاۋەلسىزدىك ءداۋىرى» اتتى كىتابىندا ەلىمىزدىڭ جاڭا تاريحى, ەگەمەن مەملەكەتىمىزدىڭ نەگىزى قالانعان كۇننەن باستاپ, ونىڭ قالىپتاسۋ كەزەڭدەرىنىڭ ەرەكشەلىكتەرى مەن تاۋەلسىزدىك داۋىرىندەگى ىشكى جانە سىرتقى سىن-قاتەرلەردى ەڭسەرۋگە بايلانىستى قابىلدانعان شەشىمدەردىڭ ءمان-مازمۇنى مەن تەتىكتەرى ەگجەي-تەگجەيلى جازىلعان. اتالعان كىتاپتا قازاقستان رەسپۋبليكاسى الدىنداعى كورنەكتى ەڭبەگى, ونىڭ تاۋەلسىزدىگى مەن ازاتتىعى جولىندا وشپەس ەرلىك كورسەتكەنى ءۇشىن ماراپاتتالعان تۇلعالار تۋرالى دا كەڭ تۇردە باياندالعان. وسى ورايدا حالىق اراسىندا باۋىرجان مومىش ۇلى ەلدىڭ باتىرى, حالىق قاھارمانى دەپ اتالىپ كەتكەندىكتەن, كىتاپتا جازىلعان اتالعان ماراپات داڭقتى تۇلعانىڭ رەسمي ەمەس جالپى تاريحي بولمىسىن جان-جاقتى ايشىقتاۋ ءۇشىن كورسەتىلگەن دەپ سانايمىز», دەگەن جاۋاپ كەلەدى.
ءيا, جاۋاپتا تايعا تاڭبا باسقانداي باياندالعان - رەسمي ەمەس. تۇڭعىش پرەزيدەنت كىتابىندا ناقتى بەرىلگەنى ايتىلعان. قاتە دەرەكتەردى اقيقاتقا اينالدىرۋ ءۇشىن «حالىق قاھارمانى» اتاعىن بەرۋ سۇرالعاندا, مومىش ۇلىنا «كەڭەس وداعىنىڭ باتىرى» اتاعى بەرىلگەنى العا تارتىلعان.
اسىلىندا حالقى قاھارمان دەپ بىلگەننەن بولار تۇلعانىڭ اتىمەن «حالىق قاھارمانى» تىركەسى قوسا ايتىلادى. بۇل - قاراپايىم جۇرتشىلىقتىڭ باتىرعا دەگەن قۇرمەتىنەن تۋعان ىزگى ويى. دەسە دە رەسمي دايەگى جوق - «حالىق قاھارمانى» اتاعىن مەملەكەت تاراپىنان بەرۋ بولاشاققا قاعاز بولىپ جەتەتىن تاريح ءۇشىن, ۇرپاق ءۇشىن ماڭىزدى ماندە قالا بەرمەك.
