فوتو: اشىق دەرەككوز
بيىلعى اسكەري پارادقا شىمكەنت قالاسىنداعى №35748 اسكەري ءبولىمىنىڭ وكىلدەرى بەلسەندى قاتىستى. اتالعان ءبولىمنىڭ ۇرلەمەلى اسپاپتار وركەسترى شەرۋدە ونەر كورسەتىپ, مەرەكەلىك رۋحتى كوتەرە ءتۇستى. سونىمەن قاتار, وسى بولىمنەن 7 ايەل اسكەري قىزمەتشى ساپ تۇزەپ, شەرۋگە قاتىستى. ولار – اسكەري قىزمەتتىڭ ءتۇرلى باعىتىندا تابىستى ەڭبەك ەتىپ جۇرگەن نازىك جاندى ماماندار.
قالانىڭ وزگە دە اسكەري بولىمدەرىنەن ارنايى تەحنيكالار, ساربازدار مەن وفيتسەرلەر قاتىستىرىلىپ, پاتريوتتىق شارا جوعارى دەڭگەيدە ءوتتى. پارادتىڭ شىمىلدىعىن شىمكەنت اۆياتسيالىق اسكەري ءبولىمىنىڭ 6 سۋ-25 شتۋرموۆيگى جاپتى. بۇل توپتى ءى-سىنىپ ۇشقىشى, ءىى دارەجەلى «ايبىن» وردەنىنىڭ يەگەرى, پولكوۆنيك عايرات تالاپشوەۆ باسقاردى. ۇشقىشتار قازاقستان رەسپۋبليكاسى تۋىنىڭ بەينەسىن اسپاندا ايشىقتاپ, كورەرمەندەرگە ۇمىتىلماس اسەر سىيلادى.
سالتاناتتى شارانى كورۋ مۇمكىندىگى شىمكەنتتەن ارنايى استاناعا بارعان 15 ەڭبەك ارداگەرىنە دە بۇيىرعان. ولار پارادتى ارنايى شاقىرتۋمەن الدىڭعى قاتاردان تاماشالادى.
«مەنىڭ اتام مەن اكەم دە ۇلى وتان سوعىسىنا قاتىسقان. بۇگىنگىدەي بەيبىت زاماندا مۇنداي تاريحي شارالاردى كورۋ — مەن ءۇشىن ۇلكەن ماقتانىش. ەلدىڭ قورعانىس قابىلەتىن, جاستاردىڭ ساپ تۇزەگەن ءساتىن كورۋ — بولاشاققا دەگەن سەنىمدى ارتتىرادى», دەيدى قالا تۇرعىنى, زەينەتكەر وتەلباي امالبەكوۆ.
