فوتو: اشىق دەرەككوز
مينيسترلىكتىڭ مالىمەتىنشە, جاڭا قولداۋ تەتىكتەرىنىڭ ءبىرىنشىسى – قۇنى 7 ميلليارد تەڭگەدەن اساتىن ءىرى جوبالارعا ارنالعان. بۇل قۇرال ارقىلى ونەركاسىپ, ەنەرگەتيكا, ينفراقۇرىلىم جانە ەكسپورت سىندى ەكونوميكانىڭ ماڭىزدى سالالارىنداعى جوبالار قارجىلاندىرىلادى. مەملەكەت بانكتەر ءۇشىن تاۋەكەلدى ازايتۋ ماقساتىندا نەسيەگە كەپىلدىك بەرەدى. سونىڭ ارقاسىندا بيزنەس وكىلدەرى قارجىنى وڭاي الىپ, جوبالارىن جۇزەگە اسىرا الادى.
ەكىنشى تەتىك شاعىن جانە ورتا كاسىپكەرلىك سۋبەكتىلەرىن قولداۋعا باعىتتالعان. قۇنى 7 ميلليارد تەڭگەگە دەيىنگى جوبالاردى قامتيدى. كاسىپكەرلەر كەپىلدىكسىز قارجىلاندىرۋ مۇمكىندىگىنە يە. قازىرگى ۋاقىتتا بەس بانكپەن كەلىسىم جاسالعان: بانك تسەنتركرەديت, Halyk Bank, Freedom Bank, Fortebank جانە Bank RBK. تاعى ەكى بانكپەن كەلىسسوزدەر جۇرگىزىلۋدە. سەرىكتەس بانكتەر ءتىزىمى الداعى ۋاقىتتا كەڭەيتىلەدى.
«باعدارلامانىڭ العاشقى ناتيجەسى دە بەلگىلى. جالپى سوماسى 3,3 ملرد تەڭگەگە 34 جوبا قولداۋ تاپقان. كەپىلدىك بەرۋ ءراسىمى جەڭىلدەتىلىپ, ەكى جۇمىس كۇنى ىشىندە ورىندالادى. مۇنى الۋشى – ءوندىرىس, كولىك, ءبىلىم بەرۋ سەكىلدى ءتۇرلى سالا وكىلى. 2025 جىلدىڭ سوڭىنا دەيىن 10 مىڭ جوبا قولداۋ تاپپاق. 2028 جىلعا قاراي كەپىلدىك پورتفەلىنىڭ كولەمى 1,4 ترلن تەڭگەگە جەتكىزىلەدى. وسىلايشا, جىل سايىن بيزنەستىڭ 50 مىڭنان استام باستاماسىنا قولداۋ كورسەتىلەدى», دەپ حابارلادى مينيسترلىكتىڭ ءباسپاسوز قىزمەتى.
«دامۋ» قورىنىڭ بۇگىنگى تاڭداعى سەرىكتەستەرى قاتارىندا بانك تسەنتركرەديت, Halyk Bank, Freedom Bank, Fortebank, Bank RBK, Bereke Bank جانە قازاقستان–زيراات ينتەرنەشنل بانك بار. قور تاراپىنان كاسىپكەر العان نەسيە سوماسىنىڭ 85%-ىنا دەيىن كەپىلدىك بەرىلەدى. بۇل بانكتەر ءۇشىن دە, كاسىپكەرلەر ءۇشىن دە نەسيە ءراسىمىن قولجەتىمدى ءارى ءتيىمدى ەتەدى.
حابارلانعانداي, ۇسىنىلعان جاڭا قارجى قۇرالدارى بانكتەردىڭ تاۋەكەلىن ازايتىپ, قارجىلىق ينفراقۇرىلىمدى دامىتۋعا جول اشادى. بۇل ءوز كەزەگىندە وتاندىق بيزنەستىڭ ءوسۋ الەۋەتىن ارتتىرىپ, ەكونوميكالىق دامۋعا سەرپىن بەرەدى.
ايتا كەتەيىك, جاڭا باستامالار ەكونوميكالىق ءوسىمدى جەدەلدەتۋ شارالارى اياسىندا جۇزەگە اسىرىلىپ وتىر. بۇعان دەيىن 2025 جىلى «بايتەرەك» حولدينگىنىڭ جارعىلىق كاپيتالىن 1 تريلليون تەڭگەگە ۇلعايتۋ جوسپارلانعانى حابارلانعان بولاتىن. بۇل قادام 8 تريلليون تەڭگەگە دەيىنگى ينۆەستيتسيانى جاڭا جوبالاردى ىسكە قوسۋعا, وندىرىستىك قۋاتتى ارتتىرۋعا جانە جوعارى ءونىمدى جۇمىس ورىندارىن قۇرۋعا باعىتتاۋعا مۇمكىندىك بەرەدى.
