ەلىمىزدەگى بۋىرقانعان يندۋستريالىق-يننوۆاتسيالىق دامۋ قوزعالىسىنان ۋاقىتتان وزا ءجۇرۋ ەكپىنى بايقالاتىنداي. قاراپ وتىرساق, «ۆەكتور» كومباين زاۋىتى» سەرىكتەستىگىنىڭ قۇرىلعانىنا ءتورت جىلعا اياق باسىپ قالىپتى. الدىمەن استىقتى وڭىردە قول جەتپەيتىندەي كورىنەتىن كومباين شىعارىلادى دەگەنگە توسىرقاي قارايتىن ديقان قاۋىم, «ۆەكتوردى» ءوزىنىڭ شەشۋشى وندىرىستىك بۋىنى سانايتىنداي جاعداي قالىپتاسقان قازىر. مۇندا كۇن ساناپ جاڭا تەحنيكالار تەمىرجول پلاتفورمالارىنا تيەلىپ, قازاقستاننىڭ تۇكپىر-تۇكپىرىنە ساپار شەگىپ جاتادى. كوكشەتاۋدىڭ كوشەلەرىمەن ماڭ-ماڭ باسقان «دالا كەمەلەرىنە» جول بەرىپ, قۇرمەت كورسەتكەن جەرگىلىكتى جۇرگىزۋشىلەرگە دە ريزا بولاسىڭ. استىقتى ءوڭىردىڭ ازاماتتارى وسىلاي تاربيەلەنگەن!
ەلگە يگىلىك قوسقان كاسىپورىننىڭ كوكشەتاۋدا اشىلۋى زاڭدىلىق بولماعانىمەن, قاجەتتىلىك ەكەندىگى ايقىن. بۇرناعى جىلدارى «روستسەلماش» كومباين زاۋىتى» ااق قازاقستان رىنوگىنا جىل سايىن 200-300 كومباين جىبەرىپ وتىردى. ءارينە, قالتا قاعىلاتىنداي باعامەن. رەسپۋبليكامىزدىڭ ءتيىمدى اگروونەركاسىپتىك ساياساتى بۇل تەحنيكالاردى وسىندا قۇراستىرۋ جونىندە شەشىم العانى قۇپتارلىق. ناتيجە سۇرانىستىڭ تەز وتەلگەندىگىندە بولىپ وتىر.
باستاپقىدا, 2012 جىلعى استىق وراعى قارساڭىندا زاۋىت ۇجىمى 18 كومبايندى سىناقتان وتكىزىپ, «قازاگروقارجى» جەلىسىمەن ساۋدالاي ءبىلدى. كاسىپورىن ماماندارى ناۋقان بويى استىقتى القاپتاردا بولىپ, جەرگىلىكتى تەحنيكانىڭ ءجۇرىس-تۇرىسىن, ونىمدىلىگىن ءجىتى باقىلاۋعا العان. جەتىلدىرىلەتىن تۇستارى دا پىسىقتالعان. وسىنىڭ ارقاسىندا, ودان كەيىنگى ەكى جىلدا اقمولا, قوستاناي, سولتۇستىك قازاقستان, قاراعاندى, پاۆلودار جانە شىعىس قازاقستان وبلىستارىنىڭ اگرارشىلارىنا 228 دانا تەحنيكا جونەلتىلدى.
– «ۆەكتور-410 كZ» – استىق جيناۋ كومبايندارىنىڭ جاڭا تولقىنى, – دەيدى بىزبەن اڭگىمەسىندە كاسىپورىن ديرەكتورى يۋري باشۋروۆ. – مۇندا اۋىلشارۋاشىلىق ماشينا قۇرىلىسى سالاسىنداعى سوڭعى جەتىستىكتەردىڭ ءبارى توپتاستىرىلعان. امبەباپ كومباين 6-7 جانە 9 مەترلىك شالعىمەن جاراقتانىپ, كەز كەلگەن القاپتاعى جۇمىستى ساپالى اتقارادى.
سونداي-اق, بۇل ماشينالاردى ناۋقان بويى پايدالانىپ, استىق, كۇنباعىس, جۇگەرى, راپس, ەكپە شوپتەردى جيناۋعا جەگۋگە بولادى. مەحانيزاتورلار ءۇشىن قاجەتتى قولايلىلىقتار كەڭىنەن قاراستىرىلعان.
كاسىپورىن وزىق يەيالار ساباقتاستىعىنا دەن قويادى. بۇگىنگى كۇنى مۇندا «ۆەكتور-410 كZ» استىق كومبايندارىن تولىق قۇراستىراتىن كاسىپورىن قۇرىلىسى» ينۆەستيتسيالىق جوباسى جۇزەگە اسىرىلۋدا. ينتەگراتسيالىق باستاما «بيزنەستىڭ جول كارتاسى-2020» باعدارلاماسى مەن وڭىرلىك يندۋستريالاندىرۋ كارتاسىنا ەنگىزىلگەن. بيىل «روستسەلماش» ااق كوكشەتاۋلىق ارىپتەستەرىنە «ۆەكتور» كومبايندارىنىڭ بارلىق مودەلدىك تىزبەسىن قۇراستىرۋ جانە ساۋدا اينالىمىنا شىعارۋ قۇقىعىن بەرىپ, ۇلكەن سەنىم ارتىپ وتىر.
قازىر زاۋىتتىڭ 2,3 ميلليارد تەڭگەگە باعالانعان قوسىمشا قۇرىلىسى قارقىندى ءجۇرىپ جاتىر. ءۇش كەزەڭمەن اتقارىلاتىن جوبانى تاعى دا «قازاگروقارجى» قارجىلاندىرۋدا.
بۇگىنگى كۇنى جەتىلدىرىلگەن وندىرىستىك ينفراقۇرىلىم, بايلانىس, جىلۋ, سۋ جانە ەلەكتر قۋاتىمەن قامتاسىز ەتەتىن ينجەنەرلىك جۇيەلەر پايدالانۋعا دايىن. بۇعان قوسا, كاسىپورىننىڭ جەكە تەمىرجول تۇيىعىن سالۋ ماسەلەسى دە شەشىمىن تاپپاق. زاۋىت ۇجىمى مۇنى مەملەكەتتىك قولداۋدىڭ جەمىسى دەپ بىلەدى.
ىزدەنىس ۇستىندەگى كاسىپورىن, وسىمەن ءبىر مەزەتتە, «اكروس» كومبايندارى مەن «اگروسويۋز» پنەۆماتيكالىق تۇقىمسەپكىشتەرىن شىعارۋ نيەتىندە ەكەندىگىنەن حاباردار بولدىق. بۇل ءۇشىن ەكسپەريمەنتتىك ەكى دانا ماشينا اكەلىنىپ, ۇلگى بويىنشا جۇمىستار باستالىپتى. سونداي-اق, جاقىن بولاشاقتا تىركەمەلى اگرەگاتتار ءۇشىن «VERSATILE-2375» ماركالى تراكتورلاردى جەلىگە قوسۋ جوسپارلانعان. مۇنىڭ ءوزى, ينۆەستيتسيالىق جوبا تولىق قۋاتىنا ەنگەن تۇستا, كوكشەتاۋ زاۋىتى قازاقستاننىڭ اگروونەركاسىپ سالاسىن جىلىنا ەكى ماركاداعى 500-600 دانا كومباينمەن قامتاماسىز ەتەدى دەگەن ءسوز.
– ءونىمدى وتكىزۋ ماسەلەسى جان-جاقتى ويلاستىرىلعان, – دەيدى يۋ.باشۋروۆ ءبىزدىڭ كوكەيدەگى سۇراعىمىزدى ءدوپ باسىپ.
قولداعى دەرەكتەر بويىنشا, وتكەن جىلعى وراق ناۋقانىنا 48 مىڭ استىق جيناۋ كومباينى قاتىسقان, مۇنىڭ 75-80 پايىزى ەسكىرگەن تەحنيكالار. ونىڭ ۇستىنە, قازىرگى تاجىريبەدەگىدەي, قازاقستانعا شەتەلدىك فيرمالاردان جىل سايىن 1200-1500 دانا كومباين جەتكىزە بەرۋ ءمۇمكىن ەمەس. ەندەشە ءبىزدىڭ الەمدىك ستاندارتتارداعى تەحنيكالاردى شىعارۋعا تىرىسىپ, ىشكى-سىرتقى رىنوكتاعى باسەكەلەستىككە قوسىلۋىمىزعا ءمۇمكىندىك اشىلادى دەگەن ويدامىز. كونۆەيەرلەردەگى جابدىقتار ءتىزبەسىندە قازاقستاندىق ۇلەستىڭ كوبەيۋى باعا ساياساتىنا دا ىقپال ەتەدى. سونداي-اق, زاۋىت ءونىم ساپاسىنا كەپىلدىك بەرۋمەن قاتار, سەرۆيستىك جۇيەنىڭ اۋقىمىن كەڭىتە تۇسەتىن بولادى.
باقبەرگەن امالبەك,
«ەگەمەن قازاقستان».
اقمولا وبلىسى.
