اۆتووندىرۋشىلەردىڭ ءتيىمدى مامىلەسى

«قازاقستاننىڭ اۆتوكولىك وداعى» (قاو) پرەزيدەنتى انار ماقاشەۆا سەسسيادا سالانىڭ تۇراقتى دامۋىنا نەگىزگى شارت رەتىندە اۆتوكلاستەر جۇيەسى مەن كومپونەنتتىك بازانى دامىتۋدىڭ ماڭىزى جونىندە ايتتى. ونەركاسىپ جانە قۇرىلىس ۆيتسە-ءمينيسترى ولجاس ساپاربەكوۆتىڭ ايتۋىنشا, اۆتوكولىك سالاسى تۇراقتى وسىمگە يە – 2018 جىلى 31 مىڭ كولىك وندىرىلسە, بىلتىر بۇل كورسەتكىش 145 مىڭعا جەتكەن. الداعى مەجە – 160 مىڭنان اسىرۋ. ونىڭ ايتۋىنشا, سالانىڭ ءارى قاراي دامۋى تەرەڭدەتىلگەن لوكاليزاتسيانى ارتتىرۋ مەن ەكسپورتقا شىعارۋعا تىكەلەي بايلانىستى.

ءبىرىنشى مەموراندۋم «Almaty Autoparts Production» جشس مەن «سەماز» جشس اراسىندا جاسالدى. تاراپتار وتاندىق وندىرىستەگى اۆتوكولىك ورىندىعىن كوممەرتسيالىق تەحنيكا شىعارا­تىن زاۋىتقا جەتكىزۋگە كەلىستى.

ەكىنشى مەموراندۋم «كاينار-اكب» جشس مەن «Hyundai Trans Kazakhstan» جشس اراسىندا جاسالدى. كەلىسىمگە سايكەس, الما­تىداعى اۆتوكولىك زاۋىتى­نا وتاندىق اككۋمۋلياتور باتارەيا­لارىن جەتكىزۋ كوزدەلگەن. وتاندىق قۋات كوزدەرىنە كوشۋ وندىرىستىك تسيكلدىڭ تاۋەلسىزدىگىن نىعايتىپ, ماڭىزدى كومپونەنت بويىنشا يمپورتقا تاۋەلدىلىكتى ازايتادى. قاو پرەزيدەنتىنىڭ پىكىرىنشە, مۇنداي كەلىسىمدەر ەلدە تولىققاندى اۆتوكلاستەر قۇرۋعا باعىتتالعان ناقتى قادام, وندا وتاندىق كاسىپورىندار وندىرىستىك تىزبەككە تىعىز ينتەگراتسيالانىپ, ىشكى نارىقپەن عانا شەكتەلمەي, سىرتقى نارىققا دا باسەكەلەسە الادى.

«اعىمداعى جانە حالىقارا­لىق دەڭگەيدە بىرلەسكەن جو­بالار­دى ىلگەرىلەتىپ, ۇزاقمەر­­زىم­­دى سە­رىك­تەستىك قاتىناس ورناپ جا­تىر. وداق بارلىق نارىق قاتىسۋ­شى­سىنا قولداۋ كور­سەتۋدى جالعاستىرا بەرەدى», دەدى انار ماقاشەۆا.

«كاينار-اكب»جشس – ورتالىق ازياداعى ەڭ ءىرى اككۋمۋلياتور باتارەيالارىن ءون­دىرۋشى. تولىق وندىرىستىك تسيكل­گە يە كاسىپورىن جىل سايىن اۋىل شارۋاشىلىعى تەحنيكاسىنا, تەمىرجول كولىگى مەن مۇ­ناي-گاز سالاسىنىڭ قاجەتىنە ارنالعان, سونداي-اق جەڭىل جانە جۇك كولىكتەرىنە 3 ملن-نان استام اككۋمۋلياتور شىعارادى. كوم­پانيا ونىمدەرى «Kainar», «Bars», «nomad», «ۆوجاك» سەكىلدى تانىمال برەندتەرىمەن ايگىلى. تاۋارلار ەۋروپا مەن جاپونيانىڭ ساپا ستاندارتتارىنا ساي كەلەدى. ءونىمنىڭ 60%-دان استامى تمد ەلدەرى مەن جاقىن شەتەلدەرگە ەكسپورتتالادى.

«Hyundai Trans Kazakhstan» جشس قازىر تمد ەلدەرىندە كەڭى­نەن تانىمال. الماتىدا «Hyundai» اۆتوكولىكتەرىن ءوندىرۋ زاۋىتىنىڭ اشىلۋى – الەمدەگى ءىرى اۆتووندىرۋشىلەردىڭ ءبىرى «Hyundai Motor Company» كومپانياسىمەن وندىرىستىك كووپەراتسيانى كەڭەيتۋدىڭ جارقىن مىسالى. سونىمەن قاتار, بۇل ەلىمىز بەن كورەيا رەسپۋبليكاسى اراسىنداعى ءوزارا ءتيىمدى ىن­تى­ماقتاستىقتىڭ تەرەڭدەي تۇسكەنىنىڭ دالەلى.

«Hyundai Trans Kazakhstan» زاۋى­تىنىڭ قازىرگى مودەلدىك جەلىسى 8 مودەلدى قامتيدى – «Tucson», «Mufasa», «Sonata», «Elantra», «Santa Fe», «Palisade», «Staria» جانە «Custin». بيىل­دان باستاپ «Elantra»-داعى مۋل­تيمەديالىق جۇيە ينتەرفەيسى قازاق تىلىندە قولجەتىمدى بولادى.

بىلتىر بيزنەس-كلاستاعى «Genesis» كولىكتەرىن شىعارۋ جەلىسى ىسكە قوسىلدى. بيىل ەكىنشى توقساندا «Hyundai Santa Fe» ۇلگىسىنىڭ CKD-ءوندىرىسى جولعا قويىلادى. «Hyundai Trans Kazakhstan» زاۋىتى دانەكەر­لەۋ, بوياۋ, جيناقتاۋ, پلاستيك بولشەكتەرىن بوياۋ جانە كومپونەنتتەر قويماسى قىزمەتتەرىن ۇسىنادى.