قازاقستاندىق دەلەگاتسيانى ونەركاسىپ جانە قۇرىلىس ۆيتسە-ءمينيسترى ولجاس ساپاربەكوۆ باسقاردى. ول ەكى ەل اراسىنداعى ساۋدا-ەكونوميكالىق بايلانىستاردىڭ وڭ ديناميكاسىن اتاپ ءوتتى جانە شۆەد بيزنەسىن ءوزارا ءتيىمدى سەرىكتەستىك پەن تۇراقتى ءوسۋدىڭ جاڭا مۇمكىندىكتەرىن اشا وتىرىپ, ءارتۇرلى سالالارداعى ءوزارا ءىس-قيمىلدى كەڭەيتۋگە شاقىردى.
دوڭگەلەك ۇستەل ەكى ەلدىڭ ۇكىمەت, بيزنەس جانە سالالىق قاۋىمداستىق وكىلدەرىن بىرىكتىردى. يننوۆاتسيالاردى ىنتالاندىرۋ, وندىرىستەردى وقشاۋلاۋ جانە جاسىل تەحنولوگيالاردى قولدانۋ بويىنشا بىرلەسكەن شارالار تالقىلاندى.
دەلەگاتسيا قۇرامىنا نەگىزگى مەملەكەتتىك جانە سالالىق قۇرىلىمداردىڭ وكىلدەرى كىردى: قر ءسىم ينۆەستيتسيالار كوميتەتى, «Qazaq Green» قاۋىمداستىعى, قازاقستان ماشينا جاساۋشىلار وداعى, «Kazakh Invest» ۇك اق, سونداي-اق ماشينا جاساۋ, ەنەرگەتيكا جانە تسيفرلىق تەحنولوگيالار سالالارىندا جۇمىس ىستەيتىن قازاقستاندىق كاسىپورىندار.
ساپار اياسىندا شۆەتسيانىڭ جەتەكشى كومپانيالارىنىڭ باسشىلىعىمەن — Volvo Trucks, Scania CV AB, Sandvik, سونداي-اق Swedish Solar Energy قاۋىمداستىعىنىڭ وكىلدەرىمەن ەكىجاقتى كەلىسسوزدەر ءوتتى. يننوۆاتسيالىق شەشىمدەردى ەنگىزۋگە جانە قازاقستاندا جەرگىلىكتى ءوندىرىستى دامىتۋعا باعىتتالعان بىرلەسكەن جوبالاردى ىسكە اسىرۋ پەرسپەكتيۆالارى تالقىلاندى.
شۆەتسيا تاراپىنان شۆەتسيا سىرتقى ىستەر مينيسترلىگىنىڭ حالىقارالىق ساۋدا جانە دامۋ جونىندەگى مەملەكەتتىك حاتشىسى دانيەل يانسە, سونداي-اق ABB, Sandvik, Scania, Epiroc, Volvo Trucks, Ericsson, SKF AB, Väderstad AB جانە باسقا دا ءىرى كومپانيالاردىڭ وكىلدەرى قاتىستى.
بۇگىنگى تاڭدا قازاقستاندا 61 شۆەد كومپانياسى جۇمىس ىستەيدى, ونىڭ ىشىندە Sandvik جانە Atlas Copco, تاۋ-كەن ءوندىرۋ, كومپرەسسورلىق جۇيەلەر جانە ونەركاسىپتىك قۇرالدار سالالارىندا جابدىقتار مەن شەشىمدەر ۇسىنادى.
ساپار قورىتىندىسى بويىنشا تاراپتار ارىپتەستىكتى ودان ءارى دامىتۋعا جوعارى قىزىعۋشىلىقتى راستادى جانە بەيىندى مينيسترلىكتەر مەن ىسكەر توپتار دەڭگەيىندە ديالوگتى جالعاستىرۋ تۋرالى ۋاعدالاستىققا قول جەتكىزدى.
