فورۋم جاھاندىق سىن-قاتەرلەر مەن گەوساياسي شيەلەنىستەر جاعدايىندا مەملەكەتارالىق ىنتىماقتاستىق پەن ديپلوماتياعا جاردەمدەسۋدەگى ءوز ميسسياسىن جالعاستىرىپ جاتىر.
فورۋمدى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ اشادى.
ۇيىمداستىرۋشىلار 39 پانەلدىك سەسسيا وتەدى جوسپارلاپ وتىر. ونىڭ ىشىندە 10 ەكسكليۋزيۆتى سەسسيا جوعارى دارەجەلى قوناقتارمەن جانە الەمدىك كوشباسشىلاردىڭ جەكە قاتىسۋىمەن وتەدى.
فورۋم باعدارلاماسى «سىرتقى ساياسات جانە حالىقارالىق قاۋىپسىزدىك», «ەنەرگەتيكا جانە كليماتتىڭ وزگەرۋى», «ەكونوميكا جانە قارجى» دەپ اتالاتىن ءۇش نەگىزگى تاقىرىپتان تۇرادى.
سىرتقى ساياسات جانە حالىقارالىق قاۋىپسىزدىك سالاسىنداعى الەمدىك ساراپشىلار بولاشاق تۋرالى پاكت, سونداي-اق كوپپوليارلى الەمدەگى «ورتا دەرجاۆالار» ساياساتىن, سونداي-اق تاياۋ شىعىستاعى جاڭا تەپە-تەڭدىككە اپاراتىن جولداردى تالقىلايدى.
ايتا كەتەيىك, ەلشى, ميۋنحەن قاۋىپسىزدىك كونفەرەنتسياسىنىڭ توراعاسى (2022-2025 جج.) كريستوف حويسگەن, ەلكانو كورولدىك ينستيتۋتىنىڭ ديرەكتورى چارلز پاۋەلل, جەنەۆا قاۋىپسىزدىك ساياساتى ورتالىعىنىڭ (Gcsp) اتقارۋشى ديرەكتورى توماس گرەمينگەر اتالعان تاقىرىپ بويىنشا فورۋمعا قاتىساتىنىن راستادى.
ەنەرگەتيكا جانە كليماتتىڭ وزگەرۋى تۋرالى پانەلدىك سەسسيالاردا قاتىسۋشىلار سۋ جانە ەنەرگەتيكالىق قاۋىپسىزدىكتى, ورتالىق ازيانىڭ ورنىقتى بولاشاعىن, كليمات سالاسىنداعى جاھاندىق ءىس-قيمىلداردى, يننوۆاتسيالىق سىن-تەگەۋرىندەردى تالقىلايدى.
بۇل تاقىرىپتار بويىنشا Power International Holding كومپانيالار توبىنىڭ توراعاسىنىڭ ورىنباسارى, پرەزيدەنتى جانە باس اتقارۋشى ديرەكتورى رامەز ءال-حايات, جاڭارتىلاتىن ەنەرگيا كوزدەرى جونىندەگى حالىقارالىق اگەنتتىكتىڭ (IRENA) باس ديرەكتورى فرانچەسكو لا كامەرا, ۇلىبريتانيا پارلامەنتى لوردتار پالاتاسىنىڭ مۇشەسى لورد فرەنسيس موۋد, سور29 پرەزيدەنتى مۇحتار باباەۆ ءسوز سويلەيدى.
«ەكونوميكا جانە قارجى» تاقىرىبى بويىنشا نەگىزگى باعىتتار: الەمدىك ساۋدانىڭ بولاشاعىن انىقتاۋ, جاساندى ينتەللەكت, جاھاندىق ەكونوميكالىق قۋاتتى قايتا قاراۋ, تسيفرلىق اكتيۆتەر رەۆوليۋتسياسى بولادى. فورۋمنىڭ قوناقتارى Berlin Global Dialogue نەگىزىن قالاۋشى جانە توراعاسى لارس-حەندريك ريوللەر, Google كومپانياسىنىڭ ورتالىق جانە شىعىس ەۋروپا جونىندەگى ۆيتسە-پرەزيدەنتى پاتريك ۋورنكينگ, مينيستر-شەتەلدەگى فرانتسۋز ازاماتتارىنىڭ سىرتقى ساۋدا جانە ىستەر جونىندەگى دەلەگاتى لوران سەنت-مارتەن, ەۋروپالىق ينۆەستيتسيالىق بانكتىڭ ۆيتسە-پرەزيدەنتى كيرياكوس كاكوريس بولادى.
2025 جىلعى استانا حالىقارالىق فورۋمى - جاھاندىق ديالوگ پەن وزەكتى الەمدىك پروبلەمالاردى تالقىلاۋعا ارنالعان نەگىزگى الاڭ. جوبا جاھاندىق سىن-قاتەرلەردى بىرلەسىپ شەشۋ ءۇشىن ەلدەردى بىرىكتىرە وتىرىپ, مۋلتيلاتەراليزمنىڭ جاڭا ءداۋىرىن قالىپتاستىرۋعا ىقپال ەتەدى. ءىس-شارا ەكونوميكاعا, كليماتقا جانە مەملەكەتارالىق قاتىناستارعا باعىتتالعان جاھاندىق وزگەرىستەر جاعدايىندا حالىقارالىق ىنتىماقتاستىقتى نىعايتۋعا باعىتتالعان.
