كوشە اتاۋىن بەرۋ تۋرالى باستامانى العاش بولىپ تالدىقورعان قالالىق قارۋلى كۇشتەر ارداگەرلەر كەڭەسى كوتەرگەن. ۇزىندىعى 1,7 شاقىرىمدىق بۇل كوشە – تالدىقورعاندا حالىق قاھارمانى قۇرمەتىنە العاش رەت بەرىلىپ وتىر.
شارا بارىسىندا كوشە اتاۋى جازىلعان بەلگى اشىلىپ, اسكەري وركەستر مەملەكەتتىك گيمندى ورىندادى, سالتاناتتى وق اتىلدى. وبلىس اكىمى بۇل قادام – سوعىس ارداگەرلەرى مەن ەل قورعانى بولعان ازاماتتارعا دەگەن حالىقتىڭ قۇرمەتى ەكەنىن اتاپ ءوتتى.
ايجان نۇرماعامبەتوۆا ءوز سوزىندە اتاسىنىڭ اسكەري جولىن جاستارعا ۇلگى ەتۋ قاجەتتىگىن ايتىپ, ۇيىمداستىرۋشىلارعا العىس ءبىلدىردى.
سالتاناتتى جيىن «كۇرەڭبەل» ءانسامبلىنىڭ ورىنداۋىنداعى «وتان» انىمەن اياقتالدى.
انىقتاما: ساعادات نۇرماعانبەتوۆ – ۇلى وتان سوعىسىنىڭ ارداگەرى, كەڭەس وداعىنىڭ باتىرى, قازاقستاننىڭ تۇڭعىش قورعانىس ءمينيسترى. 1994 جىلى «حالىق قاھارمانى» اتاعى بەرىلگەن العاشقى ازامات.
