جاپونيانى جەڭىپ, جارتىلاي فينالعا شىقتىق

استانا. 12 اقپان. يسپانيانىڭ گرانادا قالاسىندا ءوتىپ جاتقان قىسقى ۋنيۆەرسيادا ويىندارىندا حوككەيدەن ەرلەر اراسىنداعى باسەكەدە قازاقستان قۇراماسى جارتىلاي فينالعا شىقتى. بۇل تۋرالى egemen.kz حابارلادى. شيرەك فينالدا حوككەيشىلەرىمىز جاپونيا قۇراماسىمەن كۇش سىناستى. بۇل ازياداعى باستى قارسىلاسىمىز سانالاتىن جاپونيامەن وسى ۋنيۆەرسياداداعى ەكىنشى ويىنىمىز. بۇعان دەيىن توپتىق كەزەڭدە 3:2 ەسەبىمەن جەڭگەنىمىزدى ايتا كەتەيىك. ال توبىمىزداعى كەلەسى كوماندا اقش-تان ويىن سوڭىنداعى بۋلليت ارقىلى 3:2 ەسەبىمەن جەڭىلۋگە ءماجبۇر بولدىق. دەسەك تە, بۇل جەڭىلىس ءبىزدىڭ قۇراماعا «س» توبىندا ءبىرىنشى ورىن الۋعا ەش كەدەرگى بولمادى. شيرەك فينالدىق ويىندا قازاقستاندىق حوككەيشىلەر كۇن شىعىس ەلىنىڭ قاقپاسىنا 4 شايبا سوقتى. ونىڭ ەكەۋى العاشقى كەزەڭدە تىركەلدى. ويىننىڭ 8-مينۋتىندا داۋلەت كەنباەۆ پەن نۇرسۇلتان بەلگىباەۆ ۇيىمداستىرعان شابۋىل يۋليان ءپوپوۆيچتىڭ ءدال سوققىسىمەن اياقتالدى. ارادا 3 مينۋت ۋاقىت وتكەن كەزدە ميحايل كاچۋلين مەرگەندىگىمەن كوزگە ءتۇسىپ, كوماندامىزدىڭ ەكىنشى شايباسىن سوقتى. كەلەسى كەزەڭدە جاپوندىقتار ايتارلىقتاي قارسىلىق كورسەتتى. ويىننىڭ 27-مينۋتىندا ميحايل سمولنيكوۆ قورعاعان قاقپادان ساڭىلاۋ تاپقان جاپوندار شۋن تاتەدانىڭ مەرگەندىگىمەن ەسەپتى قىسقارتتى. ال ءۇشىنشى كەزەڭ تولىعىمەن قازاقستاننىڭ باسىمدىعىمەن ءوتتى. كەزدەسۋدىڭ 47-مينۋتىندا دانيار احمەتوۆتەن پاس العان ۆلاديسلاۆ ەلاكوۆ ەسەپتى 3:1-گە جەتكىزدى. جاپونيانىڭ باس جاتتىقتىرۋشىسى تارتىستىڭ اياقتالۋىنا 2 مينۋت قالعان كەزدە قاقپاشى شۋن ءحيتوميدىڭ ورنىنا التىنشى ويىنشىنى شىعاردى. الايدا, ونىڭ بۇل ارەكەتى وڭ ناتيجە بەرمەي, 59-مينۋتتا ۆلاديمير گرەبەنششيكوۆ بوس قاقپانى ءدال كوزدەپ, كوماندامىزدىڭ 4-شايباسىن سوقتى. ناتيجەسىندە, 4:1 ەسەبىمەن ءىرى جەڭىسكە قول جەتكىزگەن قازاقستان قۇراماسى جارتىلاي فينالدا ويناۋ مۇمكىندىگىنە يە بولدى. بۇل كەزەڭدەگى قارسىلاسىمىز چەحيا قۇراماسى. قوس كوماندا اراسىنداعى تارتىس 13 اقپان كۇنى وتەدى. كەلەسى جارتىلاي فينالدىق باسەكەدە كانادا مەن رەسەي شەشۋشى سىنعا بەرىلەر جولدامانى ساراپقا سالادى. ۋنيۆەرسيادا ويىندارى 14 اقپاندا اياقتالاتىنى بەلگىلى. ازىرگە قورجىنىمىزدا 5 التىن جانە 5 كۇمىس مەدال بار. بۇل كورسەتكىشپەن جالپى كوماندالىق تۋرنير كەستەسىندە ەكىنشى ورىندا كەلەمىز. كوش باسىنا 17 التىن, 15 كۇمىس جانە 17 قولا مەدالى بار رەسەي جايعاسقان. ال ۇزدىك ۇشتىكتى گەرمانيا سپورتشىلارى تۇيىندەپ تۇر. ولاردىڭ ەنشىسىندە 3 التىن, 3 كۇمىس جانە 1 قولا مەدال بار. ەلامان قوڭىر. دەرەك: egemen.kz. سۋرەت: granada2015.org.