ۇلتتىق بانك باسشىسى ەسەپشوتتاردى قولدانۋعا شاقىردى

استانا. 12 اقپان. ەلىمىزدىڭ ازاماتتارى پاتەر مەن اۆتوكولىكتەردى قولما-قول اقشامەن ەمەس, باسقا جولدارمەن ساتىپ السا, دۇرىس. ۇلتتىق بانك توراعاسى قايرات كەلىمبەتوۆ وسىلاي دەدى. بۇل تۋرالى «قازاقپارات» حابارلادى. «ءبىزدىڭ ويىمىزشا, ءىرى ساۋدالار, ماسەلەن, پاتەر نەمەسە كولىك قۇرالىن ساتىپ الۋ قولما-قول اقشامەن ەمەس, باسقا جولدارمەن جاسالعانى دۇرىس. ەڭ باستىسى قاراجات بەلگىلى ءبىر شوتتار ارقىلى ءوتۋى كەرەك, وسىلايشا ءبىز سالىق ورگاندارىمەن بىرگە بارلىق تولەمدەردى كورىپ وتىرا الامىز. سوندىقتان, از ۋاقىتتىڭ ىشىندە وسى سالادا ءبىرشاما تياناقتىلىققا قول جەتكىزەمىز دەپ ويلايمىز», – دەپ ءتۇسىندىردى ول. ق. كەلىمبەتوۆتىڭ ايتۋىنشا, بۇگىندە قازاقستانداعى بارلىق ترانزاتسيالاردىڭ 93 پايىزى قولما-قول تولەنەدى. «بۇل قازىرگى كەزدە كەز كەلگەن ەكونوميكاداعى سوراقى جاعداي, نەگە دەسەڭىزدەر, بارلىق وسى تولەمدەر سالىقتان تىسقارى, كولەڭكەدە قالادى. ءبىز بۇل سالانى ازداپ تارتىپكە كەلتىرۋ كەرەك دەپ ويلايمىز, سونىمەن قاتار, دوللارمەن ەسەپتەلەتىن باعالاردى دا رەتتەۋ قاجەت. ءبىز ەلىمىزدەگى باعانىڭ قالىپتاسۋى ۇلتتىق ۆاليۋتاعا نەگىزدەلەتىنىن سانامىزعا ابدەن ءسىڭىرۋىمىز قاجەت», – دەپ ءتۇيدى توراعا. جولدىباي بازار. دەرەك, سۋرەت: «قازاقپارات».