فوتو:ria.ru
پرەزيدەنت سايلاۋى ءۇش كۇن بويىنا وتەدى. وسى ءۇش كۇندە 18 ملن سايلاۋشى, 19 مىڭ سايلاۋ ۋچاسكەلەرىندە (شەكارادان تىس 965 سايلاۋ ۋچاسكەسى بار) ءوز تاڭداۋلارىن جاسايدى. رۋمىنيا پرەزيدەنتتىگىنە 11 ادام ۇمىتكەر بولىپ وتىر. ەگەر بۇگىن ۇمىتكەرلەر 50% -دان جوعارى داۋىس جيناي الماسا سايلاۋدىڭ ەكىنشى كەزەڭى وتكىزىلەدى. ول 18 مامىرعا بەلگىلەنگەن.
رۋمىنيادا سايلاۋدىڭ الدىندا قوعامدىق پىكىرگە ساۋالناما جاسالعان بولاتىن. ساۋالناما ناتيجەسى سايلاۋدىڭ باستى ۇمىتكەرى ۋلتراوڭشىل «رۋمىنداردى بىرىكتىرۋ اليانسى» وپپوزيتسيالىق قوزعالىسىنىڭ ليدەرى دجوردج سيمەون ەكەنىن كورسەتكەن.
ال سيمەوننىڭ باستى قارسىلاستارى بۋحارەست مەرى نيكۋشور دان, ۇكىمەت كواليتسياسىنان كانديدات كرين انتونەسكۋ مەن ەلدىڭ بۇرىنعى پرەمەر-ءمينيسترى ۆيكتور پونتا.
ەسكە سالايىق, بۇل سايلاۋ رۋمىنياداعى ەڭ داۋلى ساياسي جانجالمەن بايلانىستى, سەبەبى ەلدە پرەزيدەنت وتكەن جىلدىڭ سوڭىنا دەيىن سايلانۋى ءتيىس بولاتىن. سول كەزدە ەكىنشى تۋرعا باتىسشىل ساياساتكەر ەلەنا لاسكوني مەن تاۋەلسىز كانديدات كەلين دجەوردجەسكۋ شىققان ەدى, الايدا ەلدىڭ كونستيتۋتسيالىق سوتى داۋىس بەرۋ ناتيجەلەرىن جويدى. بۇعان قوسا, سايلاۋ دوداسىندا العا شىققان دجەوردجەسكۋدى ورتالىق سايلاۋ كوميسسياسى قايتا وتەتىن سايلاۋعا مۇلدەم قاتىستىرماۋ تۋرالى شەشىم قابىلدادى, بۇل ونىڭ جاقتاستارى تاراپىنان جاپپاي نارازىلىققا سەبەپ بولدى.
سايلاۋ ناتيجەسىنىڭ جويىلۋى جەلتوقسان ايىندا رۋمىنيا وپپوزيتسياسى تاراپىنان جاپپاي نارازىلىق اكتسيالارىنا الىپ كەلدى. رەسەي سىرتقى ىستەر مينيسترلىگى رۋمىنياداعى پرەزيدەنت سايلاۋىندا بولعان وقيعانى «دەموكراتيالىق ەلدەر ءۇشىن بۇرىن-سوڭدى بولماعان جاعداي» دەپ اتادى.
اقپان ايىندا اقش ۆيتسە-پرەزيدەنتى دجەي دي دەنس ەۋروپا ەلدەرىن سىنعا الىپ, رۋمىنياداعى جاعدايدى دەموكراتيالىق ينستيتۋتتاردىڭ داعدارىسىنىڭ مىسالى رەتىندە كەلتىرگەن بولاتىن.
