«Kids Go Free» جوباسى 2022 جىلدان باستاپ ىسكە قوسىلعان. ونىڭ اياسىندا كامەلەتكە تولماعان بالالاردى اۋە ارقىلى تەگىن تاسىمالداۋ مۇمكىندىگى قاراستىرىلعان. ول ءۇشىن اتا-انالار نەمەسە زاڭدى وكىلدەر قازاقستان اۋماعىنداعى رەسمي تۋروپەراتورلاردان تۋريستىك پاكەت ساتىپ الۋى ءتيىس.
جوبانىڭ تاعى ءبىر ماڭىزدى ەرەكشەلىگى – «Kids Go Free» باعدارلاماسىن تەك تۋريستىك وپەراتورلار مەن سالا ماماندارىنان ارنايى تۋر ساتىپ العان جاعدايدا عانا پايدالانۋ مۇمكىن بولادى. ەگەر وتباسى ءوز بەتىنشە ساپارعا شىقسا, وندا بۇل جەڭىلدىك قاراستىرىلمايدى. سوندىقتان بۇل مۇمكىندىكتى پايدالانۋ ءۇشىن مىندەتتى تۇردە رەسمي تۋر پاكەتىن الۋ قاجەت.
باعدارلاماعا قاتىسۋ شارتتارى:
- بالانىڭ جاسى 2–17 جاس ارالىعىندا بولۋى جانە قازاقستان رەسپۋبليكاسىنىڭ ازاماتى بولۋى كەرەك;
- بالا اتا-اناسىمەن نەمەسە جاقىن تۋىستارىمەن (اتاسى, اجەسى, اعاسى, اپكەسى) بىرگە ساپار شەگۋى قاجەت;
- تۋريستىك پاكەتتى ساتىپ الۋ كەزىندە بالالاردىڭ اۋە بيلەتتەرىنىڭ قۇنى تۋروپەراتور ەسەبىنەن تولەنەدى, كەيىن بۇل شىعىن مەملەكەت تاراپىنان وتەلەدى.
تۋريستىك پاكەت ساتىپ الۋ ءۇشىن قوسىمشا قۇجات جيناۋدىڭ قاجەتى جوق. قاتىسۋ ءتارتىبى مىناداي:
- دەمالىستى جوسپارلاپ, باعىتتى تاڭداۋ;
- تاڭدالعان باعىت بويىنشا تۋريستىك كومپانياعا جۇگىنىپ, پاكەت راسىمدەۋ;
- بالالاردىڭ ۇشۋ بيلەتتەرىن ەسەپكە الىپ, تولىق تۋريستىك پاكەتتى تولەۋ;
- ساياحاتقا شىعۋ;
- دەمالىس اياقتالعان سوڭ, تۋروپەراتورعا ۇشاقتا بەرىلگەن جولاۋشى تالونىن تاپسىرۋ.
تۋريزم جانە سپورت مينيسترلىگىنىڭ ساۋالىمىزعا بەرگەن جاۋابىنا سۇيەنسەك 2025 جىلدىڭ باسىنان بەرى 176 بالا قازاقستاننىڭ تۋريستىك ايماقتارىنا تەگىن ۇشۋ مۇمكىندىگىنە يە بولعان. جالپى 2022-2024 جىلدار ارالىعىندا 5,5 مىڭنان اسا بالا وسى باعدارلامانى قولدانعان.
«ىشكى تۋريزم بويىنشا ساپارلاردى ۇيىمداستىرۋعا ليتسەنزياسى بار تۋروپەراتورلاردان ساتىپ الىناتىن تۋرعا ەنگىزىلگەن 2 جاستان 17 جاسقا دەيىنگى بالالار ءۇشىن بيلەتتىڭ قۇنى سۋبسيديالانادى. وسى باعدارلاماعا قاتىسۋدىڭ مىندەتتى شارتى تۋروپەراتوردان وتباسىعا ارنالعان تۋر ساتىپ الۋ بولىپ تابىلادى. باعدارداما اياسىندا تۋروپەراتور بالالار ءۇشىن اۆيابيلەتتەردى ءوز ەسەبىنەن ساتىپ الۋدى كوزدەيدى, كەيىننەن بالالاردىڭ اۆيابيلەتتەرىنىڭ شىعىستارى سۋبسيديالانادى», دەپ ءتۇسىندىردى مينيسترلىك.
ەرەجەگە سايكەس تۋروپەراتور كەلەسى قۇجاتتاردى تاپسىرۋى قاجەت:
- تۋروپەراتورلىق ليتسەنزيا;
- سالىق كوميتەتىنەن بەرەشەكتىڭ جوقتىعى تۋرالى انىقتاما;
- بالالار مەن اتا-انالاردىڭ قۇجاتتارى;
- تۋريستپەن جاسالعان شارت, اۆيابيلەتتەر.
ايتا كەتەيىك, ىشكى تۋريزم بويىنشا ليتسەنزياسى بار كەز كەلگەن تۋروپەراتورلار وسى باعدارلاماعا قاتىسۋعا قۇقىلى.
