سۋرەتتى تۇسىرگەن - اقادىل رىسماحان
جيىنعا عىلىمي-زەرتتەۋ ينستيتۋتىنىڭ وكىلدەرى, اۋىل شارۋاشىلىعى سالاسىنىڭ عالىمدارى جانە اگروبيزنەس وكىلدەرى, اۋدان باسشىلارى مەن شارۋا قوجالىق جەتەكشىلەرى قاتىستى. سەمينار مەملەكەت باسشىسى قاسىم-جومارت توقاەۆتىڭ ۇلتتىق قۇرىلتايدىڭ IV وتىرىسىندا اۋىل شارۋاشىلىعى سالاسىنا قاتىستى بەرگەن تاپسىرمالارىن تالقىلاۋعا جانە ولاردى ىسكە اسىرۋ جولدارىن ايقىنداۋعا ارنالدى.
ءىس-شارادا اۋىل شارۋاشىلىعى كورمەسى مەن «QazMeatExport» شارۋا قوجالىعىنىڭ ەگىستىك القابى كوپشىلىك نازارىنا ۇسىنىلدى. ايداربەك ساپاروۆ جەرگىلىكتى تاۋار وندىرۋشىلەردىڭ ءونىمىن جوعارى باعالاپ, جۇمىستارىنا تابىس تىلەدى.
وبلىس اكىمى ەربول قاراشوكەەۆتىڭ ايتۋىنشا, اۋىل شارۋاشىلىعىن دامىتپاي, باسەكەگە قابىلەتتى ەكونوميكا قۇرۋ مۇمكىن ەمەس, سوندىقتان سالاداعى جۇمىستى شيراتۋعا بارلىق تاراپ مۇددەلى بولۋى ءتيىس.
«مەملەكەت باسشىسى مەن ۇكىمەتتىڭ قولداۋى اۋىل شارۋاشىلىعى سالاسىنىڭ دامۋىنا تىڭ سەرپىن بەردى. الدا ءبىزدى ەگىستىكتى تسيفرلاندىرۋ, اۋىل شارۋاشىلىعى تەحنيكاسىن جاڭارتۋ, ەگىس القاپتارىن ءارتاراپتاندىرۋ, سۋارمالى جەرلەردىڭ كولەمىن ارتتىرۋ, مينەرالدى تىڭايتقىشتاردى ەنگىزۋ جانە شارۋالاردى جوعارى ءونىمدى تۇقىمدارمەن قامتاماسىز ەتۋ سىندى اۋقىمدى مىندەتتەر كۇتىپ تۇر. اۋىل شارۋاشىلىعىنىڭ ستراتەگيالىق ماڭىزىن ەسكەرسەك, زاماناۋي عىلىمي جەتىستىكتەردى ءتيىمدى پايدالانۋدىڭ ماڭىزى زور», دەيدى ە. قاراشوكەەۆ.
مينيستر ا. ساپاروۆتىڭ ايتۋىنشا, اگرارلىق سالانى قولداۋ ءۇشىن بيلىك تاراپىنان قاراستىرىلعان قارجى كولەمى جىل سايىن ارتىپ كەلەدى. شارۋالارعا مەملەكەتتىك قولداۋدىڭ تەتىگىن ءتۇسىندىرۋ ءۇشىن سالا ماماندارى بىلەك ءتۇرىپ جۇمىس ىستەۋى كەرەك.
«جامبىل وبلىسىندا اۋىل شارۋاشىلىعىنا ءجىتى كوڭىل ءبولىنىپ, ۆەتەريناريا سالاسىنا جاڭاشىلدىقتار ەنگىزىلدى. مال دارىگەرلەرى قىزمەتتىك كولىكپەن قامتىلىپ, ۆەتەريناريالىق پۋنكتتەردىڭ قۇرىلىسى قارقىندى جۇرگىزىلىپ جاتىر. بۇل جۇمىستار كورسەتىلەتىن قىزمەتتىڭ ساپاسىن جاقسارتىپ, حالىقتىڭ تۇرمىس دەڭگەيىن كوتەرۋگە ىقپال ەتەدى» دەيدى ا. ساپاروۆ.
جامبىل وبلىستىق اۋىل شارۋاشىلىعى باسقارماسىنىڭ باسشىسى قايرات كوشەنوۆتىڭ ايتۋىنشا, بيىل سالانى دامىتۋعا 48,2 ملرد تەڭگە ءبولىندى. بۇگىنگە دەيىن 3,4 مىڭ شارۋاعا مەملەكەتتىك قولداۋ كورسەتىلدى. ناتيجەسىندە ءى توقساننىڭ قورىتىندىسى بويىنشا 38 ملرد تەڭگەنىڭ اۋىل شارۋاشىلىعى ءونىمى ءوندىرىلىپ, سالاعا 4,1 ملرد تەڭگە ينۆەستيتسيا تارتىلدى.
بيىل 641,2 مىڭ گەكتارعا اۋىل شارۋاشىلىعى داقىلدارىن ورنالاستىرۋ جوسپارلانعان, بۇل وتكەن جىلمەن سالىستىرعاندا 14,5 مىڭ گەكتارعا ارتىق.
كوكتەمگى دالا جۇمىستارىنا ۇكىمەت تاراپىنان 20 مىڭ توننا ديزەل وتىنى ءبولىندى. قازىرگى تاڭدا شارۋالارعا تاراتۋ جۇمىستارى بەكىتىلگەن جوسپارعا سايكەس جۇرگىزىلىپ جاتىر. 498, 5 مىڭ گەكتار القاپقا 99,7 مىڭ توننا مينەرالدى تىڭايتقىش ەنگىزۋ جوسپارلانعان.
جيىندا ءسوز العان قازاق ەگىنشىلىك جانە وسىمدىك شارۋاشىلىعى عىلىمي-زەرتتەۋ ينستيتۋتىنىڭ باسقارما توراعاسى شولپان باستاۋباەۆا جامبىلدىق شارۋالارمەن تىعىز ىنتىماقتاستىقتا جۇمىس ىستەۋگە دايىن ەكەنىن جەتكىزسە, قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتىنىڭ باسقارما توراعاسى تەمىرجان ايتباەۆ جامبىل وبلىسىندا تۇقىم شارۋاشىلىعىن دامىتۋ جونىندە باستاما كوتەرىپ, ناقتى باعىت-باعدارىن ۇسىندى.
كەيىننەن ۆەدومستۆو باسشىسى جاڭا تيپتىك ۇلگىدە سالىنعان ۆەتەريناريالىق پۋنكتتى ارالاپ, «الەل اگرو» اق-نىڭ تاۋلىگىنە 144 مىڭ باس تاۋىق ەتىن وڭدەيتىن كومبيناتىنىڭ قۇرىلىس بارىسىن كوردى. سونىمەن بىرگە اسا قاۋىپتى ماروككو شەگىرتكەسىنە قارسى حيميالىق كۇرەس شارالارىن زەردەلەدى.
جامبىل وبلىسى
