قوستاناي. 12 اقپان. قوستاناي قالاسىنداعى مەكتەپتەردە ءدىني ەكسترەميزم مەن تەرروريزمگە قارسى شارالار جونىندە ساباقتار ءوتتى. بۇل تۋرالى egemen.kz ءتىلشىسى حابارلادى.
ساباقتاردى ءدىني ەكسترەميزم مەن تەرروريزمگە قارسى شارالار جونىندەگى 2013-2017 جىلدارعا ارنالعان مەملەكەتتىك باعدارلاما شەڭبەرىندە توتەنشە جاعدايلار جونىندەگى باسقارما جانە ءورت بولىمشەلەرى قىزمەتكەرلەرى ۇيىمداستىردى. ولار وقۋشىلارعا «وقۋ كورپۋسىندا تەررورلىق ارەكەت بولۋ قاۋپى تۋعان جاعدايدا وقۋشىلار نە ىستەۋ كەرەكتىگى» تۋرالى اڭگىمەلەپ بەردى. ساباقتىڭ ماقساتى – كەپىلدىككە العان ادامدار ءوزىن قالاي ۇستاۋى ءتيىس, جارىلعىش زاتقا ۇقسايتىن زات تابىلعاندا ونىڭ اينالاعا زالالى تيمەۋ ءۇشىن نە ىستەۋ كەرەكتىگىن ۇيرەتۋ. ماماندار كۇتپەگەن جاعدايدا وقۋشىلارعا پسيحولوگيالىق جاعىنان ۇستامدى بولۋ, ساسپاۋ كەرەكتىگىن ءتۇسىندىردى. حالىقارالىق تەرروريزم, تەررورلىق ارەكەتتەردىڭ تۇرلەرى, جارىلعىش زاتتار قويىلعانى جونىندەگى جالعان اقپاراتتار تاراتقانى ءۇشىن قىلمىستىق جاۋاپكەرشىلىك پەن ايىپپۇل تۋرالى تۇسىنىك بەردى. وقۋشىلار تەررورلىق ارەكەتتەر مەن ونىڭ بەيبىت تۇرعىندارعا كەلتىرگەن زارداپتارى جونىندە ۆيدەوروليك قارادى. سونىمەن قاتار وقۋشىلار مەكتەپتە جانە ۇيدە ءورت قاۋىپسىزدىگى شارالارىن ساقتاۋ جونىندە دە ءدارىس تىڭدادى. مۇنداي ساباقتار وبلىس ورتالىعىنداعى 25 مەكتەپتە ءوتتى.
ءنازيرا جارىمبەتوۆا.
دەرەك, سۋرەت: egemen.kz.
